السلام عليكم: أولاً أنا عندي عشرين سنة، وعندي مشكلة ونفسي ألاقي لها حل، ونفسي أسمع رأي مؤثر فيّ، علشان كده باكتب لكم دلوقتي. أنا مشكلتي إني بحب ولد، هو فعلاً محترم جداً، وبيراعي ربنا فيّ، وأنا الحمد لله مش وحشة، وهو مقدر إني مش زي كل البنات. بقالنا سنتين مع بعض؛ بس طول السنتين دول مشاكل كتير جداً، وهو عنده مشاكل كتير في حياته بسبب انفصال باباه ومامته، وهو مش عارف يخلّص دراسته علشان بيشتغل علشان يصرف على نفسه، ومشاكل كتير بسبب الانفصال مخلياه حاسس إنه وحيد وما لهوش حد يهتم بيه. المفروض بالنسبة له إن أنا أهتم بيه؛ بس أنا ظروفي ما تسمحش إني أهتم بيه في الفترة دي، علشان ما فيش بيننا حاجة رسمية زي خطوبة مثلاً؛ غير إن أنا مستحرمة إني باكلمه؛ رغم إننا بنعامل بعض باحترام أوي.. على طول فيه بيننا حدود في المعاملة، وماما عرفت ورافضة إني أكلمه. وهو بيقول لي إنت مش بتهتمّي بيّ ومش محسساني باختلاف في حياتي, ودايماً فيه مشاكل معاه بسبب أهلي، ومع أهلي فيه مشاكل بسببه. وأنا مش عارفة أرضي الطرفين خالص والاتنين بالنسبة لي حاجة كبيرة أوي ومهمين جداً في حياتي. nanos