السلام عليكم ورحمة الله وبركاته.. أنا بحبكم جداً، ونفسي تساعدوني لأني حاسة إني هاموت.. أنا آنسة، عندي 23 سنة، حبيت واحد جداً، هو جاري، وهو كان بيحبني جداً؛ بس للأسف سابني مش مرة، لا 3 مرات؛ لأن باباه مش موافق عليّ عشان ظروفي المادية أقل منهم وباباه بيدوّر على المال والجاه؛ مع إني -والحمد لله- على قدر من الجمال والأدب؛ بس والده مش بيفكّر في الأدب قد المال. وطبعاً اللي حبيته وكان أول حب في حياتي سابني وسمع كلام باباه وخطب غيري بدل المرة 3 مرات، وكل مرة يسيب خطيبته يرجع لي تاني ويقول لي ما عرفتش أستريح معاها وأنا بطيبتي أرجع له تاني لأني بحبه جداً. ودلوقتي هو خاطب برضه وأنا بحبه ومش عارفة أعمل إيه لأني لما باشوفه باحس إنه بيحبني من نظراته، واللي تاعبني إنه قدامي على طول لأننا جيران. بالله عليكم أفيدوني لأني مُحبطة تماماً ومحتارة.. هو فعلاً حبني ولا لأ؟ عاشقة الجنة