أنا مشكلتي إن أنا بحب خطيبي جدا وهو كمان بيعشقني وبيحبني أوي لدرجة إنه ما يقدرش يستغنى عني وأنا وهو زمايل في الشغل وفي قسم واحد يعني تعاملي في الشغل معاه هو وبس، قليل لما باتعامل مع حد تاني إحنا مش قايلين في الشغل إن إحنا مخطوبين علشان صاحب الشركة لو عرف هيفصلنا ومش هيخلينا في قسم واحد، وهو مش هيخليني أشتغل مع حد غيره. المشكلة بقى واللي تاعباني إني باغير عليه أوي، هو شكله حلو ودايما كان بيقول على بنات الشركة إن هما شكلهم وحش إلا أنا، عمره ما جاب سيرتي بحاجة حتى قبل ما نتخطب ومفيش ولد بيقول لبنت إن هي وحشة، ومن ساعتها وهما بيحبوا يتكلموا معاه، ويفتحوا مواضيع بأي شكل علشان يتكلموا معاه، وأنا باغير أوي وباتضايق وفيه بنت أنا مش بحب تصرفاتها، هي كويسة بس بتحب الولاد كلهم وتحب علاقتها دايما بأولاد تكون حلوة حتى أكتر من البنات، والولاد كلهم في الشركة بيحبوا يتكلموا معاها علشان هي فري، بتضحك وتهرّج مع أي حد، أنا باغير أوي لما بالاقيها تكلم خطيبي، وهي طبعا مش عارفة إنه خطيبي قلت له قبل كده ما تتكلمش معاها إلا في حدود الشغل بس علشان هي ابتدت تقرب منه، أنا واثقة فيه وعارفة إنه عمره ما هيبص لواحدة غيري بس دي غيرة عليه، قلت له على الأقل ما تفتحش أنت كلام معاها وعدني كذا مرة بكده بس هو مش مقتنع بكلامي وقال لي اللي في دماغك ده غلط وإن أنا كده مش واثقة فيه، وبيقول لي دي وحشة لو حلوة كنتِ عملتِ إيه؟ حسيت إنه بقى يعند معايا ويفتح معاها كلام ويهزر علشان يشوف في عينيّ نظرة الغيرة، هو مش بيهزر مع أي بنت هزار أوفر، كله في حدود، بس أنا باتضايق نفسي أبطل الغيرة ولما أشوفه بيهزر مع حد غيري ما أزعلش أو على الأقل ما يبانش عليّ.. هو بيقول لي إن إحنا زمايل وطبيعي نتكلم ونهزر مع بعض طالما في الحدود، مع العلم إن أنا ممنوع أكلم أي زميل في أي حاجة غير الشغل هو بيقول إن هو راجل وإن أنا بنت هو يهزر عادي أنا لأ.. أنا عايزة أؤكد أني واثقة فيه جدا وعمري ما شكيت فيه بس أنا باغير عليه لما يكلم أي بنت في حاجة تانية غير الشغل وهو مش قادر يفهمني بيقول عليّ إن أنا عبيطة بتفكيري ده؟؟ أرجوكم ردوا عليّ أنا محتارة.. م
