فلان : مبروك الشرطة رجعت؟ علان : انت شفتها فين؟ فلان : ياراجل وزير الداخلية نزل بنفسه للشارع أكثر من مرة علان : جايز ..! فلان : ومالك بتقولها من تحت الضرس! علان : اصل في محطة مترو حلوان شفت بتوع الشرطة قافلين الاوضه علي نفسهم.. والبياعين دخلوا المحطة ده غير الجبابره اللي في الشارع. فلان : تلاقيها قوة صغيرة ومش حمل بهدلة! علان : لدرجة يطفوا النور في مكتبهم ويخلعوا اللبس الميري فلان : يمكن بيتنكروا عشان يعرفوا يقبضوا علي المجرمين! علان : ياريت كنا لقينا المحطة زي ماكانت احنا يامحترم بندخلها دلوقت "بصابونه" وبنطلع منها بالطبل البلدي. فلان : ماهي شرطة المترو .. غير شرطة المرافق غير شرطة الامن العام علان : بس المواطن المسكين واحد .. ونفسه يلاقي الحماية.. حتي لو كان البقال يقدر يبيعها في عبوات محفوظه زي الكازوزه. فلان : يعني حضرتك مش معترف بالامن اللي موجود في الشارع! علان : لا للأسف لغاية دلوقتي أنا مقتنع بالشارع وبس.. وخايف انزل من بيتي ما عرفش أرجع!