كلام مسئول

محمد صلاح: نظرة واحدة على شط إسكندرية تشفي الروح هو الشط اللي غنت له فيروز يا شط الهوى وعبد الحليم دقوا الشماسي وقاضي البلاج يا قاضي مشتاق من الصيف الماضي ومحمد قنديل بين شطين ومية عشقتهم عينيا وداليدا إسكندرية اجدع ناس ومحمد منير ياسكندرية بحرك عجايب ياريت ينوبني من الحب نايب وهدى سلطان من بحري وبنحبوه وع الإمة بنستنوه شبك الجمالات وشبكني ازاي عايزنا ننسوه ايوووه .....
تبدأ المتاعب لما تدي ضهرك للبحر كورنيش high way من غير إشارات رعب وحوادث وفي بعض الأماكن اللي اعرض فيها الكورنيش سبق سيارات مفيش كده كورنيش في العالم الكورنيش يعني السير بهدوء وإشارات وعساكر مرورإحنا مقدرناش ع السرعة فعملنا انفاق مُتعبه في استخدامها نازل طالع مخيفة في بعض الأحيان طبعا قليلة محدش بيستخدمها كتير مكان تاني من طريق الكورنيش زحمة مرور تقف بالساعات خصوصا إذا كنت رايح المعمورة أو المنتزة تقاطع شارع خالد بن الوليد على البحر مالوش حل إذا قررت بقى تاخد الدائري مسافة قصيرة شوية لكن بعدها هتبدا المتاهة الكبرى لا علامات إرشادية ولا ضوئية ومع النزول المستمر من الدائري تشتبك مع أحياء شعبية ومطبات صناعية تتوه منك معالم الطريق البحر للسعداء والمخالفين أبراج طلعت فجأة سدت البحر زي ما بتوع الكافيتريات سدوا الشاطئ خلوه بقى للي يدفع وطبعا فيه minimum charge أنا طبعا ما بيضايقنيش في حياتي قد موضوع ال minimum charge دا حاسبني على قد اللي اطلبه مش إتاوة والسلام كمان الكافيتريات بدأت تتوسع مظلات خشب وبلاستيك واسمنت على الشط احتكرته زرعت شجر غطى البحر اللي ما احتلتوش الكافيتريات احتلته الصخور الحجرية الضخمة يعني رقعة الشاطئ بتتاكل قدام الناس ما انكرش إن في جهود ضخمة للمحافظ للتصدي للحيتان وإعادة الشط لأهله وناسه ووقف بيع الميه والهوا لكن المسالة مش سهلة خصوصا ان الفساد رَمَح كرّس اوضاع واضحة لكل صاحب عينين منها الابراج بقى اللي فصلت اسكندرية البشرعن اسكندرية البحروالكورنيش مش بس منعت الرؤية لا ..دي خلت اسكندرية من جوه نار بعد ما منعت الهوا انه يدخل الاحياء الداخلية ، اسكندرية اللي اتوسعت في الماضي لراغبي المتعة والهدوء ناحية العجمي معدش عجمي دا بقى "عجبي " عمارات انزرعت على الشط نفسه زحام رهيب شوارع بطنها مفتوح اذا استمرينا مديين ضهرنا للبحر في اسكندرية حنلقى اتنين اسكندرية يفصل بينهما قطر ابو قير كاننا في بلدين مختلفين اسكندرية التانية اللي تحت خط القطر مشاكل النضافة والعشوائيات اللي بلغت رسميا في اسكندرية 30 منطقة بنحب اسكندرية شط الهوى عايزين نزورها في السنة اكتر من مرة بنتمنى عودتها لاسكندرية الاحلام الجميلة والتسامح اسكندرية اولياء الله الصالحين المرسي ابو العباس اسكندرية المكتبة ورواد الصحافة اسكندرية اللي أي واحد فينا راحها سايب فيها سر جميل في مطعم في فندق في كابينة او في ودع رماه البحر على الرمل او ع الإمة عن اسكندرية البحر والهوا والناس هيكون لينا النهاردة كلام ........ مسئول
فاصل تقرير وثائقي
اكتسبت الإسكندرية سمعتها من الاعتناء بالعلم حيث بدأت كمدينة عسكرية وتحولت إلى مدينة ملكية حدائق وأعمدة رخامية وشوارع متسعة وجامعة ومجمع علمي ومكتبة شهيرة ومنارة عُدت من بين عجائب الدنيا السبع ، ولم يفتح التاريخ أبوابة لأحد العلماء إلا ويكون قد مر بمدارس الإسكندرية وكما يحار العالم في موقع مقبرة الإسكندر فإن آثار الإسكندرية تخفي تحت الماء أطلال وأساطير ومدن قديمة ، ظلت الإسكندرية مدينة مفتوحة لكل الأجناس والثقافات واتسمت بالتسامح تجاه كل الأديان وعاش فيها خليط من كل الأعراق كانت سنداً روحيا للعالم المسيحي وازدهرت في العصر الإسلامي واحتضنت حياة وممات الكثير من أولياء الله الصالحين وهي الثغر الذي فتح زراعية للشوام الذين هربوا من الاضطهاد ، وكما ترك الزمن القديم في الإسكندرية عمود السواري والمسرح الروماني وصهريج الشلالات وقلعة قايتباي فإن التراكم استمر وتأسست فيها متاحف وقصور وكنائس ومساجد ، الإسكندرية التي غادرها الملك فاروق على المركب المحروسة وغادر منها أخر جندي بريطاني وفي ميدان المنشية أمم عبد الناصر قناة السويس هي الإسكندرية التي عادت إليها مكتبتها بعد قرون والتي هناك سباق مع الزمن لتحديثها وإكمال بنيتها الأساسية واسترداد بحرها وتحرير شواطئها وتنظيم مرورها ومبانيها وتوسعة الكورنيش الذي سيظل دائما رغم أي متاعب الوجهة الأولى لزوارها
فاصل
محمد صلاح: عشان الجو بقى حر في القاهرة ومعظم المحافظات اسكندرية هي الحل ربما قال البعض ان الساحل الشمالي سحب البساط من اسكندرية وانها اصبحت مصيفا للفقرا هما الفقرا يعني مالهمش نفس يصيفوا مش هو دا العدل الاجتماعي اللي بتتكلم عليه الحكومة عموما مش هي دي القضية القضية انه يكون المصيف دا فعلا على قد الفقرا يقدروا يصيفوا فيه وكمان الطبقة الوسطى اللي متقدرش على شاليه او فيلا في الساحل الشمالي الجهود المبذولة في اسكندرية لسه عايزة اكتر ان اهلها وناسها وزوارها يستحقوا اكتر واكتر مع محافظ الاسكندرية اللواء عادل لبيب هيكون لينا النهاردة كلام .......... مسئول
ومن كلام اللواء عادل لبيب "لن اوافق على تاجير الشواطئ مرة اخرى لرجال الاعمال وشركات السياحة اللذين استغلوا الشواطئ لبيع الهواء والماء للمصطافين واهالي اسكندرية" .. "نعتزم انشاء 20 نفقا جديدا على طريق كورنيش الاسكندرية وذلك للحد من الكوارث وتلك الانفاق ستقام بنظام عالمي والتعاون مع المستثمرين ورجال الاعمال وستزّود بسلالم كهربائية وتحتوي بداخلها على عدد من المحال التجارية لجذب المواطنين لاستخدامها" وقال كمان محافظ الاسكندرية "مشروع مدينة الاسكندرية الجديدة سيقام على مساحة 3800 فدان خلال الشهرين المقبلين وهناك 30 منطقة عشوائية بالاسكندرية تم عمل خطة استراتيجية بالتعاون مع وزارة الاسكان لتحزيمها بشبكة من الطرق لوقف تمددها مع وضع عدة مرافق لتطوير تلك المناطق العشوائية" .. "رئيس الوزراء الدكتور احمد نظيف وافق على اعادة تخطيط المدينة من جديد ووافق على تسيير اتوبيس مكيف بدورين على الكورنيش وستكون تذكرته بحوالي 10 جنيهات وهناك خطة لانشاء جراجات متعددة الطوابق في جميع الاراضي الفضاء بالاسكندرية وسيتم اسنادها الى شركات اجنبية على ان تدار الجراجات بطريقة الرفع الالكتروني" .. "اسكندرية لا تتحمل أي عشوائية تزيد من حجم التكدس بشوارعها وسيتم تنفيذ العديد من المشروعات الاستثمارية بالمناطق الهامة من الاسكندرية مما سيضعها على مصاف المدن العالمية" ازاي نعيد للاسكندرية وجهها المشرق ونرجع بحرها لاهلها وزوارها ازاي نروح لها في الصيف فنحب شتاها وفي الشتا نحلم بصيفها ازاي نعيشها مدينة تسامح مدينة نموذج لبر مصر كله محافظ الاسكندرية اللواء عادل لبيب هيكون لينا معاه النهاردة كلام ......... مسئول
فاصل
محمد صلاح: ارحب بمحافظ الاسكندرية اللواء عادل لبيب منورنا سيادة المحافظ منور القاهرة ..سيادة الحافظ وانت المحافظ رقم 14 منذ بدء العمل بنظام الحكم المحلي وداخل على 3 سنين يمكن تقريبا محافظ اسكندرية عادة ليه الناس بتعتبر ان المحافظ هو محافظ الكورنيش اللواء عبد السلام محجوب اهتم بالكورنيش جدا وانت مهتم بالكورنيش الانطباع دا سليم ؟
اللواء/عادل لبيب – محافظ الإسكندرية: لا هو طبعا الكورنيش نعتبره الاساس في الاسكندرية الكل بيتجه للاسكندرية عشان خاطر الكورنيش ودا حقيقة حاليا بصفة عامة تطوير شامل خدنا المدينة كلها تطوير بصفة عامة ودا يمكن ازعج البعض شوية في البداية ازعجهم لان احنا فتحنا مرة واحدة وكان لابد نفتح مرة واحدة
محمد صلاح: ليه نتعب كل الناس في نفس التوقيت يعني ليه مابدأناش مناطق مناطق يعني ؟
اللواء/عادل لبيب: متقدرش تفتح مناطق احنا اخدنا كل الأحياء وقسمنا اسكندرية كلها بالطول لانك انت عاوز تطور مدينة كاملة كلها نطورها ازاي نطورها ان احنا نركب فيها الغاز ان اسكندرية يمكن مكانش راكب فيها غير 240 الف شقة غاز وخطة الدولة ان لابد كل البيوت كلها وصل لها غاز فلابد نركب لها غاز عشان نركب شارع شارع عاوزة 48 سنة
محمد صلاح: ممكن حي حي؟
اللواء/عادل لبيب: ماتنفعش لانك انت عاوز تطور مناطق شعبية مناطق عشوائية مع بعض متقدرش تاخد واحدة بس لوحدها وماتقدرش تاخد المناطق العشوائية منطقة منطقة لابد تطور كلها مع بعضها كان لابد نعمل الفتحة دي كلها مطلوب مننا اننا نوصل حوالي 890 ألف شقة غاز هما زعلوا قالوا قطع شوارع
محمد صلاح: البازلت اه .
اللواء/عادل لبيب: اه كنت بقطعها فعلا كنت بقطعها ليه لانه كنت هوصل غاز ازاي للبيوت ما انت بتاخد الخط الرئيسي وبتقطع الشارع قصاد كل عمارتين عشان توصل الغاز وفي نفس الوقت بنشوف تحت البنية التحتية سواء تليفونات سواء مية سواء صرف كل البنية التحتية كلها حتى بما فيها شبكة الكهربا بنجددها لان دي عملية تطويرمش تجميل انت بتطور تطوير شامل كمصر مدننا مش اقل من اي مدينة عالمية
محمد صلاح: يمكن الناس سيادة المحافظ شايفة ان متاعبها كتير يعني هموم المواطن المصري في مختلف المحافظات متعددة هموم حياتية ومعيشية وتدبير النفقات وغير وبالتالي لما بيلاقي ان فيه صحيح تطوير بنية اساسية انما هتاخد وقت هيعانوا وهو اصلا معاني من الاول يعني هو معاني اصلا معاني من الفوضى ومعاني من زحمة المرور وبيعاني من سوء الخدمات ولما بيلاقي الخدمات دي بتتحسن سنة ولا سنتين يقولك لسه هاستنى تاني يمكن دا كان رد فعل الناس ؟
اللواء/عادل لبيب: دا في الاول هينبسطوا وانا لو منهم في الاول هازعل .
محمد صلاح: يعني كنت مقدر زعلهم ؟
اللواء/عادل لبيب: اه طبعا لكن لابد اعمل كده عشان اخلص واريح الناس لكن لو انت هتربط هيتعبوا اكتر
محمد صلاح: طب خلصنا .
اللواء/عادل لبيب: الحمد لله احنا دلوقت طورنا حوالي 1600 شارع تطوير شامل كله جميع اغلب الشوارع الرئيسية والفرعية اتطورت مع نهاية السنة الجديدة ان شاء الله هنكون خلصنا
محمد صلاح: خليني الاول اخوض في التفاصيل انت خدت خطوة شجاعة بالغاء تاجير الشاطئ للناس اشادت بيها الصحافة وساندتك فيها الكاتبة الكبيرة حسن شاه وصفتك بانك واجهت الحيتان واعدت شط اسكندرية الى اهل اسكندرية مرة اخرى كانت دوافع القرار دا ايه
اللواء/عادل لبيب: فيه طبقات معينة انها لابد تخش الشواطئ فلابد ان احنا نخصص لها جزء من الشواطئ بجانب الجزء الاخر اللي متأجر فاحنا كل الشواطئ اللي خلصت مدة الايجار بتاعتها تحولت الى شواطئ عامة حوالي 20 شاطئ حوالي 21 شاطئ انا بيجيلي ناس من محافظات مجاورة ناس من اسكندرية عشان انك انت تخش شاطئ من الشواطئ دي هتكلف المواطن حاجات كتير جدا الدولة بتحاول بقدر الامكان زي مابتدعم العيش ده جزء برضه هيبقى من تدعيم الدولة للمواطن انه لابد ان احنا نوفر له وقت معين في السنة ان هو يبقى فيه نوع من الترفيه عنه وعن اولاده ومايكونش مكلف بالنسبة له فاحنا اللي بنديرها كمحافظة
محمد صلاح: الشركات اللي كانت بتدير الشواطئ بيشتغل فيها عمال وبالتالي هيمشوهم الشركات دي كانت بتدفع ايجار بتدخل دخل للمحافظة وفي نفس الوقت بتدفع ضرايب مستوى الخدمة اللي يقدم من الشركات هل المحافظة هتقدر تقدم نفس مستوى الخدمة
اللواء/عادل لبيب: واحسن منها ..دا نمرة واحد ..نمرة 2 العمال امّال هو مين اللي بيشغل الشواطئ دي مش العمالة الموجودة اصلا ودي مهمة جدا لو الدخل بتاع المحافظة انا بقول لو هيدخل لي دخل على حساب مصلحة المواطن .. لا .. مصلحة المواطن نمرة واحد
محمد صلاح: يعني حضرتك بتضمن ان الشواطئ اللي تم الغاء تأجيرها للشركات وبالتالي إلى الناس المصطافين او اهالي اسكندرية الخدمة هتكون فيها لا تقل عن ما كان بتقدم ايام الشركات ما كانت بتديرها
اللواء/عادل لبيب: لا إحنا من السنة اللي فاتت وكان في تجربة في شم النسيم الحمد لله نجحت جدا
محمد صلاح: سيادة المحافظ أيه علاقتك برجال الاعمال في اسكندرية فيه ناس بتقول انك واقف امام مصالحهم او العلاقة مش كويسة قوي وان هما كانوا بيساهموا في بعض الاحيان في تنمية المحافظة بشكل او باخر بعض الخدمات على الشواطئ او تبرعات لبعض المشروعات العلاقة شكلها ايه دلوقت ؟
اللواء/عادل لبيب: العلاقة بقت اقوى من الاول دول اصدقائي من قبل ما ابقى محافظ يعني وبالنسبة للتبرعات محدش ببيقولهم ماتدفعوش تبرعات اطلاقا لكن فيه نقطة معينة طبعا انا بشوف ان رجل الاعمال اصلا ماحاولش اني اثقل على كاهله لانه طبعا راجل بيدفع ضرايب للدولة اذا والله تقدم بنفسه مفيش مشكلة لكن الحمد لله الدولة موفرة كل الامكانيات بالنسبة للمبالغ المطلوبة كلها
محمد صلاح: انا بستغرب ان محافظ ما بيشتكيش من ضيق النفقات او ضيق الموارد يعني معلش الدولة مواردها محدودة والدكتور يوسف بطرس غالي ..
اللواء/عادل لبيب: لا الحمد لله النفقات الحمد لله كويسة جدا ودكتور يوسف بطرس غالي مش بالنسبة لنا ..
محمد صلاح: عقبال الشعب بقى .
اللواء/عادل لبيب: الحق يقال يعني لكن هي عملية تنظيم
محمد صلاح: تنظيم ادارة الموارد
اللواء/عادل لبيب: ايوة
محمد صلاح: سيادة المحافظ إدارة الكورنيش بتتم أزاي هل كل حي بيدير جزء من الكورنيش اللي قدامه ولا انت عامل ادارة عامة للكورنيش عشان يفضل المستوى من الشمال الى الجنوب بنفس المستوى ؟
اللواء/عادل لبيب: لا الكورنيش له ادارة مستقلة
محمد صلاح: ايه الفكرة ؟
اللواء/عادل لبيب: الفكرة ان الكورنيش اولا الضغط كله على الكورنيش اصلا ، زائد ان كل الضغط بتاع اسكندرية اصلا كله على منطقة الكورنيش ومنطقة شارع ابو قير ومناطق معينة في اسكندرية فليها إدارة مستقلة بتديرها
محمد صلاح: أيه حكاية الأحجار الضخمة اللي أتحطت يعني سمعنا كتير عن التغيرات المناخية وأنه يفترض إن الكتل الخرسانيه الضخمة دي لوقف المد مفيش حل بديل مفيش أساتذة هندسة قالوا إن الأحجار دي تتحط جوه شويه أو جزيرة صناعية تقلل شويه من هجوم البحر على الشط ؟
اللواء/عادل لبيب: النحر يمكن من حوالي عشرين يوم كان توجد لجنة كبيرة ومشارك فيها مكتبة الأسكندرية وأغلبية اللجنة بتضم علمائنا في علم البحار وحماية الشواطئ وكل من هو متخصص بالبحار والبحيرات واتكلموا على موضوع غرق الدلتا طبعا انا سمعت كلام مختلف تماما عن ما ينشر في الصحف إن نسبة ارتفاع منسوب المياه طفيفة جدا وإن تآكل الشواطئ مش بالصورة اللي الكل متخوف منها لأن البحر بياخد وبيدي لكن بالنسبة للحواجز الخرسانية الموجودة في إسكندرية يمكن أقول خبر كويس جدا بالنسبة لها سيتم عمل حواجز غاطسة ويمكن تم إقامة نص الشاطئ نتيجة الحواجز دي بتتكسر الموجة قبل متخش على الشاطئ بحوالي 300 ، 400 متر وفيه مناطق بتبقى 220 متر أو 250 متر دا بدأ يرسب رمل تاني على الشاطئ وبدأ الشاطئ يتسع فدلوقتي حتتشال الكتل الخرسانية اللي بره وتدخل جوه
محمد صلاح: يعني مكنتش دائمة ؟
اللواء/عادل لبيب: لا ترجع تاني حواجز غاطسة ودا هيترتب علية إن شواطئ إسكندرية هترجع شواطئ عادية وكنت أتمنى إن أنا أجيب صور للشواطئ بعد إقامة الحواجز الغاطسة كنت سيادتك هتشوف منظر مختلف تماما
محمد صلاح: يعني نقدر نطمن أهالي إسكندرية وزوار المدينة إن بعد تلات أربع سنين هتعود مساحة الشط إلى ما كانت عليه فيما قبل
اللواء/عادل لبيب: لا قبل كده لأنه مخطط سنتين نكون انتهينا منهم
محمد صلاح: وفي المستقبل ، فيه ناس بتقول إن الدلتا هتغرق بعد ستين سنه
اللواء/عادل لبيب: لا لا أبدا
محمد صلاح: يعني نطمن الناس إن دا مش هيحصل وإن عندنا خبراء وعندنا محافظ بيعد إن الأسكندرية ستبقى كما هي
اللواء/عادل لبيب: لا إسكندرية ولا الساحل كله
محمد صلاح: ربنا يطمنك يا سيادة المحافظ طمنا من ناحية تانية الكورنيش high way طريق رئيسي لما تبقى فيه مناطق العربيات بتمشي بهذه السرعة هل عندك معدل بالحوادث يا سيادة المحافظ ؟
اللواء/عادل لبيب: عالي جدا
محمد صلاح: عالي جدا الأنفاق والكورنيش بلا إشارات في أوروبا والدول المتقدمة عادة الكورنيش بيكون فيه السير بطئ شويه مفيش حل ؟
اللواء/عادل لبيب: كورنيش الإسكندرية غير في القاهرة ، في القاهرة محاور كتيرة جدا إسكندرية مفيش فيها غير محورين الكورنيش وشارع أبو قير وبالتالي لو أتقفل واحد تتقفل إسكندرية ، بعد التوسعة بتاعة الكورنيش الأخيرة بدأت الحوادث تزيد فكان لابد نشوف نظام جديد بدأنا من حوالي سنة ونص نجيب بعض الخبرا المتخصصين في فرنسا وقعدوا معانا حوالي عشرة أيام عشان يعملوا إشارات مرور اللي هي بيسموها الموجه الخضرا وفشلوا
محمد صلاح: مفيش عندنا أنظمة مرورية تنفع؟
اللواء/عادل لبيب: الناس بتعدي من كل حته بعد ما حصروا عدد العربيات والشوارع والمداخل والمخارج
محمد صلاح: النظام اللي في العالم كله ما يمشيش عندنا ؟
اللواء/عادل لبيب: بدأنا نفكر إن إحنا نعمل أنفاق الناس تعدي منها لأن الأنفاق موجودة والناس ما بتعديش فقلنا الأنفاق موجودة وفيها محلات تحت
محمد صلاح: عنصر جذب ؟
اللواء/عادل لبيب: عملنا النفق عرض أربعين متر وفيه عشرين محل هيتفتحوا بسلالم كهربا واسانسيرات عشان المعاقين تكلفة الواحد حالي 16 مليون
محمد صلاح: كام نفق ؟
اللواء/عادل لبيب: إحنا هنبدأ السنة دي بأربعة وكل سنة أربعة بشرط نغطي الكورنيش كله وما يبقاش فيه أي مشكلة
محمد صلاح: سيادة المحافظ موضوع الأنفاق هيفتح المجال لكلام جديد خليك معانا لسه الكلام مخلصش
فاصل
محمد صلاح: سيادة المحافظ اتكلمنا على الكورنيش وعلى موضوع الأنفاق عندنا وجهة نظر أخرى من واحد من الخبرا نسمعها
اللواء/عادل لبيب: نسمعها
محمد صلاح: نسمع
فاصل
د/ مصطفى العربي – أستاذ تخطيط الطرق كلية الهندسة جامعة الإسكندرية: الحقيقة بعد ما تم المشروع وبعد السنوات اللي مضت كان يمكن أكبر مشكلة هو جعل الكورنيش طريق مروري حر مما ادى إلى العديد من الحوادث الخاصة بالطرق وكان فيها إصابات بشرية ويمكن عشان كده بنقول إنه قد يكون أول إهتمام بحل مشاكل كورنيش إسكندرية هو الاهتمام بالحلول المرورية على هذا المحور ودا بينبع من اكتر من اهمية قد تكون اولهم ان الكورنيش اصلا مقسم إلى قطاعات ، القطاعات في منها فيه كثافة مرور مشاة عالية وبالتالي يجب الأخذ في الإعتبار إن إحنا نفكر جديا في عمل طريق سريع بديل قد يكون موازي لكورنيش اسكندرية بس في العمق وقد يكون متصل به عن طريق محاور اخرى عرضية تربط هذا الطريق بالطريق البديل الذي قد يكون مخطط من ضمن مخطط استراتيجي في خلفية المدينة وبالتالي يمكن أن نقوم بتطوير الكورنيش بفتح حدائق فيه أكتر ، جعله أكثر أمانا للمشاة ، زيادة أماكن الأنتظار لجعلة متنفس لأهالي الإسكندرية وزورها خاصةً في المنطقة ما بين سيدي جابر إلى المنتزة
فاصل
محمد صلاح: وجهة نظر أيه رأيك سيادة المحافظ في الكلام ده ممكن يتعمل طريق محور أخر في اسكندرية؟
اللواء/عادل لبيب: هو الطريق موجود وهيطور في صيف السنة دي
محمد صلاح: اللي هو شارع أبو قير؟
اللواء/عادل لبيب: لا طريق ترعة المحمودية وهو موازي أصلا لطريق أبو قير وطول طريق أبو قير ودا المحور التالت للأسكندرية وإحنا أخترنا الفترة بتاعة الصيف لأن الشركات كلها بتتوقف عندنا حوالي 12 شركة بتقم بعملية الرصف في اسكندرية ودول بيتوقفوا اعتبارا من شهر 6 لشهر 9 اللي هي فترة الصيف للمصطافين حنستغل الفترة دي حناخد الطريق دا بطولة 15 كيلو من الجنبين حيتم توسعته وتطويرة ودا هيخلق محور تاني جديد هياخد من المنتزه حتى رأس التين الناحيه التانيه بس مش هي دي المشكلة
محمد صلاح: أيه المشكلة؟
اللواء/عادل لبيب: المشكلة هي إعادة تخطيط إسكندرية القديمة تاني كلها لأن نظام أسكندرية حاليا لابد أن يعاد تخطيطها طبعا البعض كان بيستغرب لما نقول هذا الكلام لكن بالفعل تم استدعاء أكبر بيت خبير تخطيط على مستوى العالم اللي هو البرت شيبر وتقابل مع السيد رئيس الوزراء وتقرربالفعل إنه هيقوم بإعادة تخطيط مدينة أسكندرية تاني من جديد عشان نفتح محاور جديدة للإسكندرية لأن مداخل اسكندرية بدأت أيضا يبقى فيها نوع من الأختناق سواء مدخل الطريق الزراعي أو مدخل الطريق الصحراوي لابد أشوف عندي كام عربية ، عندي جراجات تستوعب العربيات الموجودة جوه ، حركة العربيات تجاه الشوارع ، لابد يبقى فيه أنفاق جديدة كل ده عشان يخلق سيولة داخل أسكندرية وهنبدأ في كل دا قبل نهاية العام إن شاء الله
محمد صلاح: بالاضافة إلى السرعة في بعض الأحيان اللي بتسبب حوادث طرق فيه مناطق تانيه فيها اختناقات زي نهاية شارع خالد أبن الوليد أو تقاطعه مع الكورنيش
اللواء/عادل لبيب: ده هيتعمل فيه نفقين
محمد صلاح: نفقين سيارات ؟
اللواء/عادل لبيب: لا نفقين مشاة
محمد صلاح: بس المشكلة في السيارات كمان
اللواء/عادل لبيب: لا مش السيارات بس دول متخططين ومن ضمن الأربع أنفاق اللي هيتعملوا ، مشكلة خالد أبن الوليد إن رواد المنطقة من كل المحافظات بيقيموا في المنطقة دي في الصيف الناس دي كلها تعدي للشاطئ الناحية التانية فبيقفلوا الطريق فعملنا نفقين جنب بعض عشان نتغلب على المشكلة يبقى عرضهم 80 متر بسلالم كهربا يبقى الناس تعدي من تحت والسيارات ماشية من فوق دي هتفك سيولة المرور ، عندنا مشكلة تانية شارع 45 دا بيقطع الشارع فبيخنق برضه فيه برضة نفق بيتعمل السيد رئيس الوزرا وافق عليه على أساس إنه بياخد من ال 45 يطلع على الكورنيش على طول من غيرما يخنق الطريق وفيه مجموعة أنفاق مطروحة هتخش في خطة السنة الجاية
محمد صلاح: موضوع الأنفاق في الفترة اللي فاتت أفرز مشكلة تانية أنت عارف حضرتك الأسر المصرية عددها كبير شوية تحب تنزل تصيف كده في مجاميع معاها الكراسي والشماسي والعوامات السوده الكبيرة أنت عارف في عوامات بتاعة ترلات بيشيلوها فالأسر عددها كبير نازل طالع مش دا أرهاق على المواطن مفيش تسهيلات أنت شايف إن السلالم الكهربائية بتاعة الأنفاق الجديدة هتسهل الحكاية ولاّ السلالم نفسها هتبقى لعبة؟
اللواء/عادل لبيب: لا أنا عملت في سيدي جابر كوبري علوي على سبيل التجربة لقينا الناس ملتزمين جدا وثبت نجاحه 100% وهنطبقة على كل أسكندرية
محمد صلاح: طالما جبت سيرة الناس بقى خليك معانا عشان لسه الكلام مخلصش
فاصل
محمد صلاح: سيادة المحافظ كنا بنتكلم عن الناس تحب تسمع كلام الناس ؟
اللواء/عادل لبيب: نسمع
محمد صلاح: نسمع كلام الناس
فاصل
مواطن1: عايزين نفق هنا في منطقة سيدي جابر عشان الناس اللي بتموت دي والارواح
مواطن2: تطوير الكورنيش ممتاز جدا بس ناقص انفاق من اول البنزينة دي لحد سبورتنج يوميا على الله حوادث وناس بتموت بتعدي من الشارع
مواطن3: الكورنيش مثلا لو الحاجات دي تزيد لتحت بلاش الحاجات دي مثلا الصخر دا يتطور اكتر من كده مايبقاش بنفس الشكل مثلا يعني دي اكتر حاجة مسوأة المنظر
فاصل
محمد صلاح: تعليقك ايه ؟
اللواء/عادل لبيب: اولا في انفاق بتتعمل بتتكلم طبعا عالمنظر طبعا حواجز الغطس اللي احنا اتتكلمنا عليها بتتعمل دلوقت حاليا والدولة معتمدة 240 مليون ودي قايمة بها شركة من الشركات الكبيرة سنة ونص كل المشاكل اللي موجودة بالفعل ماشية كلها لكن النفق في محطة سيدي جابر اولا محطة سيدي جابر اللي هو بيتكلم عليها حضرتك الدولة بتنشئ محطة جديدة في المكان دا هتتكلف حوالي 120 مليون جنيه وزارة النقل قايمة بها حاليا ودي هتنتهي خلال سنة هيتعمل مش نفق بقى هيتعمل نفق بطول الشارع يعني هو هيتكلم عليه بشرط ان الشارع مش هيبقى بالعرض لا دا هيبقى بالطول بشرط ان الحتة دي اللي بيطلع منها المحطة هتخش على الشارع البحر دي هتبقى كلها من فوق مفيش فيها عربيات تبقى مشاة والشارع ماشي من تحت فكل دي هتتعمل فعلا الناس بس مستعجلة شوية
محمد صلاح: هو الكلام وردي قوي كده ليه يعني الكلام اللي حضرتك بتقوله معناه ان اسكندرية بعد سنتين تلاتة هتتحول الى مدينة اخرى مش هيبقى فيها المعاناة اللي الناس حساها لوقت دا صحيح ؟
اللواء/عادل لبيب: صحيح
محمد صلاح: يعني نتقابل بعد سنتين تلاتة نشوف ايه اللي هيحصل ؟
اللواء/عادل لبيب: لا سنتين ليه .. سنة واحدة بس
محمد صلاح: كمان سنة !!الصيف الجاي نتقابل
اللواء/عادل لبيب: الصيف الجاي نتقابل ونشوف اسكندرية
محمد صلاح: سيادة المحافظ في فوضى للاعلانات في مناطق تراثية في الاسكندرية على الكورنيش وفي اماكن اخرى الخبراء كتير بيقولوا ان اللي حاصل طبعا زي القاهرة ويمكن اكتر شوية لان اسكندرية شوية مدينة محدودة زي مابخطط للانفاق والشوارع والبنية الاساسية شايف المظهر الحضاري عامل فيه اسكندرية في ظل غابة الاعلانات دي
اللواء/عادل لبيب: شلنا كله معدش موجود..الاعلانات العادية خالص هي اللي موجودة
محمد صلاح: المترخصة ؟
اللواء/عادل لبيب: مش مترخصة ما هو التاني كان مترخص هو اللي حاصل اني لقيت فعلا زي ماسيادتك بتقول كده موجة أي حتة حاشرين فيها اعلانات أي مش اعلان بقى صغير لا دا اعلان 4 مترفي 4 متر والحامل العريض دا ولقيت في الحامل العريض دا موجود محطة ميني محمول يعني بدل مايحطوا محطة فوق السطح يحطوها في العمود فكل دا اتشال معدش ولا اعلان داخل مدينة اسكندرية كلها
محمد صلاح: العجمي بعد ما سيادتك رحت أتفتحت بطنه مكانش فيه صرف صحي اتعملت صرف صحي مكانش فيه ارصفة لكن العجمي بقى عجبي خلال ال 10 سنين اللي فاتت منطقة للهدوء منطقة مختلفة عن باقي الساحل الشمالي لها استايل معين طلعت العمارات وخربت الدنيا مستقبل العجمي بقى شكله ازاي منطقة عشوائية لا اللي خدها كمنتجع مستفيد ولا الساكن فيها مستريح ؟
اللواء/عادل لبيب: لا الحمد لله ماعدتش منطقة عشوائية
محمد صلاح: ايه اللي حصل في العجمي؟
اللواء/عادل لبيب: العجمي تم الحمد لله انتهت كل مشاكلها اهم مشكلة فيه هي الصرف الصحي انها منطقة عشوائية طول عمرها ، الصرف الصحي الحمد لله انتهى في سنة ونص هي دي فعلا اسكندرية اللي كانوا متضايقين لا العجمي لانها كانت عبارة عن اطلال لما اتفتحت كلها مرة واحدة كانت عبارة عن اطلال كل حفر عميق مجاري عميقة 8متر و10 متر و7 متر فدي كلها طبعا قفلت الشوارع وقفلت البيوت زائد ان المية دي وخصوصا كل البيوت دي والفلل على طرنشات مع المية الجوفية بدات تغرق الدنيا وهي اصلا مغرقة الدنيا كل دا عمل مشكلة كبيرة جدا لكن الحقيقة الحمد لله مبلغ كبير جدا 800 مليون كان الأول 600 مليون بدأ الشغل أقول أيه 48 ساعة في ال 24 ساعة
محمد صلاح: الشغل بشكل مستمر يعني ؟
اللواء/عادل لبيب: مكثف جدا جدا جدا لدرجة انه مشروع كان لابد انه ينتهي في خلال 5 سنين انتهى في سنة ونص
محمد صلاح: هتعمل الكورنيش في العجمي ازاي بقى؟
اللواء/عادل لبيب: ممشى
محمد صلاح: زي شرم الشيخ .
اللواء/عادل لبيب: ممشى شرط انه ياخد الكورنيش كله
محمد صلاح: ياخد 8 كيلو ؟
اللواء/عادل لبيب: حوالي 12 كيلو
محمد صلاح: فين بقى في العجمي العجمي اتزرع عمارات على الشاطئ
اللواء/عادل لبيب: لا امسك من اول الدخيلة هناخد العجمي وابو تلات وابو يوسف هناخد المنطقة كلها بشرط ان هو يبقى الممشى بطريقة معينة ومايمشيش فيه العربيات
محمد صلاح: منطقة الزحمة الرهيبة اللي بين البيطاش والهانوفيل لحد متطلع على اول الطريق الصحراوي وطريق مرسى مطروح او الساحل الشمالي مالهاش حل دي السنة اللي فاتت احكيلك عن تجربة لاحنا بنمشي اولا الشارع واسع مافيهوش أي مشكلة بس كله اشغالات قبل ما تطلع على اول الطريق على طول فيه سوق بتوع التين بقى والعنب سوق العبور برة هناك يعني الكلام دا الصيف اللي فات
اللواء/عادل لبيب: لا بدانة ندرس دلوقت بعد مااتطور البيطاش والهانوفيل والحديد ولا صلب شلنا كل دا بقى
محمد صلاح: يافندم عشان نوصل للعجمي عارف بعد الملاحات بنطلع عالطريق الدائري عشان نعرف بعمل 20 كيلو زيادة مع ان الحكاية كلها ...
اللواء/عادل لبيب: لا طول عمرها الشارع دا شارع مطروح دا فيه سوق من اوله لاخره
محمد صلاح: اتشال اعتبر دا وعد ؟
اللواء/عادل لبيب: اتشال دا كله مش وعد دا حقيقة دا انت تبعت حد يصوره لا دا بقى دلوقت في منتهى الشياكة وكله انتهى معدش فيه بائعين نهائي
محمد صلاح: خلاص طالما فيها شياكة بقى خليك معانا لسه الكلام مخلصش
فاصل
محمد صلاح: نتكلم من العجمي بقى سيادة المحافظ فيه ناس في العجمي عايزة تتكلم نسمعهم
اللواء/عادل لبيب: أوي
محمد صلاح: نسمع ناس العجمي
فاصل
مواطن1: المنطقة دي انشئت عشوائية من الاصل وكان فيه برضه اهمال من الدولة انها تركت الناس تبني زي ما هي عايزة لدرجة الشوارع في نهايتها اتسدت انا بقالي 20 سنة في المنطقة يعني فمابقاش فيه تخطيط من الاصل لا للناس ولا فيه شوارع ولا أي شئ فطبعا كون ان التعمير يتم بعد العشوائية ما اتبنت دي مشكلة لوحديها
مواطن2: دلوقت ان امكن دا قاعدين فيه بقالنا 25 سنة يعني انا واحد من الناس باني في 81 ماشفناش المشكلة اللي هما اصطنعوها في الايام الاخرانية دي وبعد كده يقولك الجبل فيه خطورة لان كده احنا محكوم علينا بالاعدام وكده احنا محكوم علينا بالاعدام فاولى لينا ان احنا نموت جوه بيوتنا جوه يعني محدش يعرف ازاي الطوب دا اتحط واترص فوق بعضه ماجيش احنا بعد العمر دا كله ونسيبه ونمشي بسهولة كده
مواطن3: احنا دلوقت ناس قاعدين في بيوتنا كافيين خيرنا شرنا قاعدين في شقة تمليك مساحة المتر هنا بيعدي الالف جنيه المتر والالف ونص كل ما يقرب من الشارع السعر بيزيد هيعوضني ازاي اني قاعد في شقة تمليك تعدي ال120 الف جنيه يديني شقة في المساكن ايجار لو يديني التعويض المناسب بسعر الارض وبسعر الشقة الحاضر انا ممكن اوافق
مواطن4: مفيش أي حاجة حصلت دا بتوع الحي جابولنا ناس هدوا حتة من هناك في الجبل وقالك دا احنا هننضف عشان المحافظ جاي وجايبين واحدة ست وقالت الجبل كان هيقع عليا وهما هافينه هما بنفسهم باللودر والعربية بتاعة الحي كانت تعبي التراب اللي وقعوه
مواطنة 5: ليه بيخلينا نبني ودلوقت جاي يقول ازالة .. ازالة بناء على أيه على ان هو يهد بيوتنا احنا دلوقت اللي طالبينه حاجة واحدة ان هو هيبطن لنا الجبل زي المدرسة وزي السنترال
فاصل
اللواء/عادل لبيب: هنزيل وانا قعدت معاهم يعنى انا جبت السكان كلهم عندي في المحافظة حوالي 100 ساكن وقعدت معاهم قلت لهم انتوا ليكوا عندي شقق لو بيت فيه 6 شقق هاديله 6 شقق لكن مش هسيبكوا لما تموتوا لان ممكن قوي يعني زي ما سمعت دلوقت يقولك تدبش..تدبش ازاي مانقدرش تدبش انا جالي تقرير من وزارة الاسكان من متخصصين ان التفتيش الفني في وزارة الاسكان ان لابد من الازالة السريعة لهذه المساكن لتقع كارثة دا من حوالي 4 ايام انا من حوالي شهرين انا جبت السكان لأني استشعرت الخطر فبعت جبت السكان وكان معانا رئاسة الحي وقعدت معاهم وقلتلهم انا حتى مارضيتش اخلي فيه وسيط بيني وبينهم لانه كان فيه مسالة في شوتس وحد استغلها استغلال سئ
محمد صلاح: هكلمك عن شوتس كمان
اللواء/عادل لبيب: قلت لا انا هقعد معاهم انا شخصيا وقعدتهم قلت لهم انتوا هترضوا انكوا تموتوا فقالوا لا قلت خلاص احنا دلوقت هيحصل الاتي هاديكو شقق بديلة وجنبيكوا يعني مش هتبقى بعيدة والشقق موجودة والبعض سال طب انا عندي 3 اولاد كل واحد ساكن في شقة قلت لهم كل واحد هياخد شقة هعوضكوا عن الشقق بتاعتكوا وهنزيل البيوت دي كلها ومحدش هيبني عليها ولانقدر لاتتدبش ولا نبني عليها اطلاقا دي حاجات فنية وبعدين كلية الهندسة راحت عاينت وكلية العلوم قسم الجيولوجيا وشافوا الارض لقوا ان الارض هشة يعني المنطقة دي وكوم الدكة ممكن يعملوا كارثة فبالتالي المنطقتين لابد ان احنا نتدخل فيهم تدخل سريع ودول احنا بالفعل يجب ان هما يرضخوا للامر الواقع لسبب لانه هيموتوا طيب لما هتقوم كارثة دلوقت هتبص يقولك دا كذا وكان لمفروض وتدخل الشرطة
محمد صلاح: ما هي يافندم مشكلة لعشوائيات مشكلة كبيرة .
اللواء/عادل لبيب: ما هو الدولة بتحلها
محمد صلاح: بتحلها لانه غاب القانون لسنوات طويلة وترك كل واحد يحل مشكلته بنفسه ومع ذلك دخلت المرافق لمناطق عشوائية كهربا ومية ربما يعني في موسم انتخابات عشان حد معدي ولا حاجة محدش يشتكي لكن خلقت مشكلة كبيرة موجودة في اسكندرية موجودة في اماكن اخرى هنرجع للعشوائيات بس خليني اكلمك عن قطر ابو قير الناس بتشتكي من مستوى قطر ابو قير وهو طبعا قاسم اسكندرية تقريبا يعني فيه اسكندرية الاولى على الكورنيش وفيه اسكندرية اللي ورا اتكلمنا شوية في التطوير اللي حاصل في الداخل وهنتكلم على بعض العشوائيات خليني معاك في موضوع مترو الانفاق عمالين نسمع كتيرعن مترو الانفاق هل القطر دا ممكن يتحول الى مترو الانفاق زي خط حلوان المرج اللي حصل في القاهرة وكان باكورة وبعدها اتبنى خطوط موازية ليه تم الاستفادة من المسار السطحي ليه ولاّ حيطور بشكا آدمي شوية يخلي القطر ادمي ويبقى بالفعل مستغل من الناس بشكل متحضر يعني
اللواء/عادل لبيب: هو القطر حاليا آدمي معلش القطر يمكن وزارة النقل طورته دلوقت حاليا دلوقت بقى ادمي لكن نيجي بقى للحاجة التانية المترو ، المترو بالفعل من حوالي 3 شهور جت شركة فرنسية وهي الشركة اصلا اللي بتشتغل في القاهرة وجه معاها بنك فرنسي هيمول مشروع مترو الأنفاق في اسكندرية وهذا مشروع يمكن لغاية دلوقت أمام السيد رئيس الوزارة ان احنا نبدا عمل خط مترو اسكندرية الجديد واتفق ان هو هيتعمل بنظام ال BOT وناخد خط الرمل اللي هو قاسم البلد من الوسط طولة 18 كيلو الاول وبعد كده يتمد لابو قير ويتمد لبرج العرب كانت المشكلة عندنا الاثار السيد وزر الثقافة مشكورا وافق على ان المترو يتمد وحاليا الموضوع في وزارة التعاون الدولي يدرس حاليا من اجل تنفيذه
محمد صلاح: خلينا نرجع تاني لموضوع العشوائيات مناطق زي الهلالية حوض 18 عزبة العرب الكبرى عزبة العرب الصغرى شوتس طبعا اشبه بحالة طوسون بشكل أو بأخر اللي اتكلمت عليها وسائل الاعلام كتير وهي تمسُك الناس بالاقامة في المكان ورفض الخروج منها ربما لغياب الثقة في الأجهزة الحكومية ربما للارتباط بالمكان ربما إن الناس بتشوف انه ممكن حلول اخرى زي ما أهل طوسون بيقولوا إن عندهم مرافق وعندهم كهربا وعندهم مية وقاعدين وعايزين يطلعونا وهيستغلوا الارض دي في ارض اصلا اصلاح زراعي بتتعامل مع ملف العشوائيات دا ازاي 4548
اللواء/عادل لبيب: نبدأ بمشكلة طوسون مفيش فيها مباني إطلاقا مشكلة طوسون أرض فاضيه موجودة أولا الكل دائب على التعدي على أرض الإصلاح الزراعي ولو جينا فحصنا الملفات شفنا مين اللي بيتعدى تجد مجموعة معينة ومسجلين في هذه العملية بيروحوا على حتة أرض الإصلاح الزراعي أو أرض الأوقاف ويروح واخدها يإما باني عليها كذا بيت ويجيبوا ناس يسكنوهم فيهم وبعد كده يقول لك الأرض مشغولة وحنطلع السكان أزاي
محمد صلاح: أمر واقع يعني ؟
اللواء/عادل لبيب: أه مبدأ في منتهى الخطورة
محمد صلاح: لا الكلام دا مينفعش خليك معانا لسه الكلام مخلصش
فاصل
محمد صلاح: سيادة المحافظ أتكلمت على موضوع طوسون وموضوع الملكية ما تيجي نسمع أهالي طوسون بيقولوا أيه؟
اللواء/عادل لبيب: أوي
محمد صلاح: نشوف اهالي طوسون
فاصل
مواطنه1: إحنا مش عارفين إحنا عملنا أيه إحنا أشترينا الأرض دي وبنطلب نشتريها تاني حتى هم متعندين معانا جدا
مواطن2: وزير الزراعة وفق لنا بالبيع وقال أنتوا أولى ناس ببيع الأرض وفيه إجراءات هناك عند وزيرالزراعة ومخلصها وهي متعطلة هنا عند محافظ أسكندرية لعدم دخول الأرض كردون المباني
مواطنة3: أنا واحدة جوزها مات ومعايا تلات أولاد أبني في تالتة سنوي عام والتانية في إعدادية والتالتة في ابتدائي أنا بعت كل اللي ورايا واللي قدامي عشان أخد بيت أعمل فيه دكان أراعي بيه أولادي ويكلوا عيش واكل جنبهم عيش وأراعي أولادي في نفس الوقت دلوقتي عايز ياخدها إحنا مش من البلد دي ؟
مواطنة4: لوهما هدوا بيوتنا دي نروحوا فين عايزين نعرف انا معايا عيال يتمى وأنا قاعدة في قلب البيت بيهم أروح بيهم فين؟
مواطن5: محافظ أسكندرية يأمر بهدم المباني وبعد هدم المباني عايز ياخد الأرض كمان حيعمل بيها أيه حبه عايز يديها لنادي الإتحاد حبه عايز يبني فيها مساكن للشباب طب بص حضرتك بالكاميرا هناك 16 عمارة لحد دلوقتي ما سكنوش كل عمارة فيها 28 شقة قدامك 16 عمارة مفيش حاجه فيهم أتسكنت وفضيين لحد دلوقتي وبعدين اشمعنى الأربعين فدان دول اللي جم عليهم كل المباني دي كانت مبنية ، في يوم عيد العمال الرئيس حسني مبارك بيعيد علينا وبيقول لنا كل سنه أنتم طيبين وبيدينا مكافآت سيادة المحافظ أدانا مكافأتنا وهد علينا البيوت خلاها أسوء عيد عمال في حياتنا
مواطن6: أهالي طوسون ليس لهم أي علاقة من قريب أو من بعيد بتجار الأراضي هما أشتروا منهم آه ولكن تجار الأراضي أخدوا فلوسهم ومشيوا بره البلاد وإحنا الضحايا
فاصل
محمد صلاح: سيادة المحافظ كنت شايفك متحمس وإحنا بنشوف التقرير انا ما عنديش اسئلة رد .
اللواء/عادل لبيب: اول واحد ابو دقن أي حتة ارض حتلاقية ماشي فيها في اسكندرية
محمد صلاح: دا موجود في الاراضي على طول
اللواء/عادل لبيب: أشرف عبيد
محمد صلاح: عارفه بالاسم
اللواء/عادل لبيب: يعني دا هنجده في أي حته هات بقى اللي كانوا بيتكلموا دول كلهم مش حتلاقي واحد فيهم صاحب ارض دول مستاجرين من المحامي اللي بيتكلم بيلف بيهم
محمد صلاح: يعني كومبارس ولاّ أيه ؟
اللواء/عادل لبيب: الناس اللي كانت بتتكلم دي كلها يجيبوا سندات الملكية وأنا تحت امرهم
محمد صلاح: يعني الاثبات سند الملكية؟
اللواء/عادل لبيب: اه اللي معاه سند الملكية على عيني وراسي
محمد صلاح: هم معترفين يا سيادة المحافظ عن معاهمش سند ملكية ووزارة الزراعة وافقت على تمليكها لهم بشكل أو باخر
اللواء/عادل لبيب: أزاي تملكهم أزاي
محمد صلاح: قعدت معاهم واتكلمت معاهم؟
اللواء/عادل لبيب: انا عارف القصة اقعد مع واحد بيحط ايدة على ارض الدولة
محمد صلاح: بس الناس خلقت مشكلة فيه اسر وفي اطفال يعني يطلعوا يروحوا فين ؟
اللواء/عادل لبيب: انا هسأل سيادتك سؤال انا عندي مناطق كلها يسكنها كواحيل زي دول كده عارف يعني ايه كاحول يجيب واحد يقعده في حته معينه بقوا انا مش معارض اطلاقا لكن حاجه واحده ان املاك الدولة يجب نحترمها لو الدولة بتبيع انا ما عنديش مشكلة الاصلاح الزراعي باع بعقود مسجلة زي ما بيبيع للناس كلها انا ما عنديش مشكلة ، وبعدين قالك الارض دي كان عليها مباني ، فيه تصوير جوي للمنطقة دي وبيقولك المحافظ هد المباني خلاص نرجع للتصوير الجوي الموجود في ال Google هل فيها مباني
محمد صلاح: سيادة المحافظ عشان عندنا نقاط كتيرة ، موقف اتوبيس ال super jet اتنقل ليه لخارج المدينه في منطقة فيها ناموس وبعيدة الواحد عشان يروح للقاهرة يسافر عشان يوصل للموقف
اللواء/عادل لبيب: لا ازاي بقى دي انضف حته في اسكندرية واقرب حته في اسكندرية لان في مدخل محرم بيه وواخده مدخل الطريق الصحراوي وواخده مدخل المحور بتبعد عن الاولانيه اللي كانت في سيدي جابر نص كيلو وبعدين النقطة الي كنا بنتكلم فيها من شويه زحمة اسكندرية أي مدينه عايز تفضيها من الزحمة طلع الموقف والورش بره
محمد صلاح: طب اسكندرية الجديدة حتكون فين يا سيادة المحافظ
اللواء/عادل لبيب: فيه جزء في الغرب وفيه جزء على الساحل على المحور
محمد صلاح: هتبدؤوا فيها امتى؟
اللواء/عادل لبيب: ان شاء الله فيه لقاء مع رئيس البنك الاهلي
محمد صلاح: يعني قريبا الاعلان عن مشروع الاسكندرية الجديدة ؟
اللواء/عادل لبيب: ان شاء الله
محمد صلاح: هتنقل جامعة الاسكندرية ومستشفى الشاطبي ؟
اللواء/عادل لبيب: جامعة اسكندرية لو اتنقلت بره كويسة في حته ارض بره 350 فدان لما تنقل الجامعة بره وكمان انا نفسي ننقل المصالح الحكومية كمان بره كل الزحمة اللي داخل اسكندرية لازم تطلع بره
محمد صلاح: يعني عشان نكسب هدوء وفراغات جوه اسكندرية لازم نتعب في المواصلات شوية .
اللواء/عادل لبيب: هيتعمل محاور ومترو انفاق وهيئة نقل عام عندي فوق ال 750 اتوبيس والنقل الجماعي فوق ال 2000 اتوبيس يعني النقل موجود بس المشكلة عندنا ان كل ما هو جديد لابد نتخوف منه ونقف
محمد صلاح: والمستشفى؟
اللواء/عادل لبيب: قصة غريبة جدا من نهارما رحت اسكندرية مستشفى الشاطبي أي حد يقابلني يقولي مستشفى الشاطبي هو يعني مستشفى الشاطبي بقت مسجلة في الشاطبي طب في الصين وفي أي دولة بيشيلوا حي بحالة ، انا بشجع انها تتشال ليه لو فيه مستشفى تانية طاقتها نفس طاقة المستشفى دي انا اشيل دي مفيش مشكلة
محمد صلاح: ما هوالمشكلة ان المستشفى تتشال وبعدين تتعمل مول تزحم الدنيا اكتر .
اللواء/عادل لبيب: لا لا مول لا عمر ما يتعمل في الحته دي مول
محمد صلاح: امّال هتتعمل ايه ؟
اللواء/عادل لبيب: لو اتشالت هتبقى مسطح اخضر
محمد صلاح: ياريت .
اللواء/عادل لبيب: انت تكره يبقى فيه مسطح اخضر على البحر .
محمد صلاح: انا احب المسطحات الخضرا على البحر .
اللواء/عادل لبيب: الحاجات اللي زي دي المواطن مفروض يبقى متعقل لما تبقى في مشكلة افهم ابعادها ايه
محمد صلاح: سيادة المحافظ هنتقابل الصيف الجاي ونشوف ايه اللي حصل انت وعدت انه الصيف اللي احنا فيه هيكون افضل من الصيف اللي فات نتقابل في نهاية الصيف ونشوف ايه اللي حصل .
اللواء/عادل لبيب: أوي أوي
محمد صلاح: إسكندرية الصيف دا هتكون احسن من الصيف اللي فات محافظ المدينة وعدنا ان تعود المدينة إلى الايام الخوالي ما سبناش حاجه تقريبا ما اتكلمناش فيها قال المحافظ اللوا عادل لبيب كلامة كان كلام جميل كلام معقول المهم انه معانا برضة قال كلام مسئول ، خلص الكلام نلتقي في الحلقة المقبلة