وجيت يا عيد وقلبي حزين وشايل م الهموم أحمال وباكتب غنوة شوق وحنين وناي يبكي مع الموال وجواي باعيش الخوف علي بلدي وليّ في عشقها حكايات وياما رفعت أنا وولدي رايتها في صمود وثبات ما تعرف فينا مين قبطي ومين مسلم علي الجبهات لأن الدم لما يسيل بيبقي دم مصري أصيل بيفدي الأرض جيل ورا جيل تاريخ يشهد علي الأبطال ده ايه ده اللي جري لينا؟ نهد تاريخنا بايدينا ونشعل بيننا نار ودمار يصبحنا يمسينا ومصر اللي ما عرفت يوم في آلاف السنين فتنة وكان الحب دايماً يرخي ظليلة علي بيتنا يجينا يوم نرمي الكره في قلوبنا يمزعنا ويكوينا ويخلق م الغيلان أجيال وحق يسوع وميلاده اللي غطي الكون محبة ونور دي فتنة زرعها أعداءنا ورويناها فساد وشرور مشينا مع اللي أفكاره حشاها بالدجل والزور ومصر الغالية محتاجة النهاردة للرضا والخير تعالوا معاي نخدم مصر ونحقق لها الآمال تعالوا في حب مصر نعيش سوا في كنيسة أو جامع نرجع مجدها ونعيد شموخها وفنها الرائع وتعلي بالادان أناشيد وقداس بالجرس ساطع نهني بعضنا بالعيد بحب وقلبنا خاشع وده بصحيح جهاد ونضال شعر : ريم توفيق