بصراحة كانت مفاجاة حين قرر المعلم العترة أن يتزوج مرة اخرى بعد رحيل زوجته السابعة الست عطيات .. -عليا النعمة المعلم ده وتد!! وماجابتوش ولادة!!! -وإش فهمك انت يااااااااد في شغل المعلمين؟! ده المعلم من دول يفضل يتجوز ويخلف!!! ويتجوز ويخلف لغاية ما ربنا يكرمه!! وكان المفاجأة الأكبر حين تقدم المعلم للزواج من نوسة بنت الحاج عبد الراضي أبو لبدة .. -معقولة الكلام ده؟!! دي البنت في اولى ثانوي!! -وماله يا عمنا أهي تتربي في عزه !! جاتك ستين نصيبة تاخدك وانت مش فاهم حاجة!! لكن البنت بكت وصرخت وصوتها جاب آخر الشارع.. -مستحيل اتجوزه يا آااابا!! ده أد جدو !! حرام عليكم انتو عايزين تدفنوني بالحياة !!! -اخرسي يا مقصوفة الرقبة!! هوه احنا عندنا بنات تقول لأأأه؟! انتي ح تتجوزي المعلم ورجلك فوق رقبتك!! وكان من الطبيعي ان تصل الى المعلم طراطيش كلام... -يعني ايه البنت مزرجنة ورافضة تتجوزني؟! هوه انا ناقص ايد والا رجل والا دماغ لا سمح الله؟!! -ماتاخدش عليها يا سيد المعلمين!! دي عيلة صغيرة وهبلة ومهفوفة في مخها!!! وبكرة تعقل!!! وفي ليلة الدخلة حدث مالم يتوقعه احد... -معلهش يا سيد الناس العروسة مخها ضرب وبتكلم روحها !! انا باقول نأجل الدُخلة جمعتين تلاتة لغاية ما نفسيتها تهدا!! -لاااااااااا دا انتو كده ح تخلوني اقلب ع الوش التاني !! عليا الطلاق بالتلاتة لو ما دخلت عليها الليلة لاضربكم بالنار واخللي اللي ما يشتري يتفرج!! وهنا تدخلت ام العروسة ..... -يا ضنايا استهدي بالله وامسحي دموعك والبسي فستان الفرح!!! انت عايزة المعلم يحرق لنا الدار ويولع في ابوكي واخواتك!!! -مستحيل اتجوزه ياامه!! ولو غصبتوني على الجوازة دي ح اولع في روحي!! -ياعبيطة اعقلي وشوفي مصلحتك!! دا راجل غني وكسيب وبكرة ح تاخدي اللي وراه واللي قدامه!! وبعد ساعات من المناهدة ارتدت العروسة فستانها ففقد المعلم صوابه... -ايه الحلاوة والطعامة دي يا عالم!!! خمسة وخميسة في عين اللي يشوفك وما يصليش ع النبي!!!ياحلاوة يا ولاد دي فعلا قمر اربعتاشر!!! -ما تمسك نفسك شوية اُمال يامعلم!!! دا انت متجوز قبلها سبعة!! يا اخويا ما يحسد المال الا اصحابه!!! وبعد الزفة والذي منه.... -ادخلي يا ست البنات برجلك اليمين!!! ايوه كده براوه عليكي شاطرة!!! ما هو انتي لو دخلتي برجلك الشمال يبقا فال وحش ومنيل بستين نيلة!!! -حاضر يا عمو!!! -انا مش عمو يا حياتي!! انا جوزك اللي ح يدلعك ويشخلعك ويهشكك ويستتك يا حتة من كبدي !!!! لكن العروسة تعثرت في فستانها ولم تنطق بحرف .... -يظهر انك لسه مكسوفة!! ادخلي يا حلوة اوضتك وغيري فستانك وتعالي ناكل لنا لقمة سوا!! انا الليلة ح اعشيكي حمام محشي وكباب وكفتة وطرب وجمبري واستاكوزا وبطارخ يستاهلوا بقك!!! وبعد العشا والحلو وكان صينية بقلاوة بالسمن البلدي أحس المعلم بنغزة في صدره.. -انا مش عارف قلبي واجعني كده ليه؟! يظهر اني اكلت جامد وخرفت !! ثواني يا عروسة أما آخد دوا القلب والضغط وتصلب الشرايين!! يا خبر اسود ده انا كنت ح انسى حقنة السكر !!! وفور ادراكها لحقيقة الوضع... -الف بعد الشر عليك يا عمو ..قصدي يا معلم!!! سلامتك يا سبعي الف مليون سلامة!!!! -تسلمي لي يا ست البنات!! ياريتك بس تستنيني شوية على ما آخد دش سخن يفوقني ويصهللني !!! -ده انا استناك عمرى كله يا سيد الناس !! بس على مهلك وانت بتستحما وخد بالك أحسن تتزحلق !! الهي يجعل لك في كل خطوة سلامة!! وبعد الحمام السخن .... -انا مش فاهم مالي كده مش متظبط وحالتي بالبلا!! يا ريت يا نوسة تعمل لي فنجان قهوة من ايديكي الحلوين دول!! والا اقول لك اعملي لي جردل قهوة !! وبالمرة هات لي دوا المرارة والطحال والكبد و..الظغطة أحسن نسيت آخدهم !! وبعد اربع ساعات... -يا دي المصيبة السودة ده انا لسه نايم على روحي وبأشخر ومش في الفورمة !! طيب ممكن يا حلوة اروح الاوضة التانية آخد دوا الاعصاب والمفاصل والبلهارسيا والاستبحس وارجع لك!!! وفي الصباحية... -كده برضه يا عروسة تنامي وتشخرى في ليلة فرحك؟؟!! دا انا باقول لك ثواني على ما آخد دش ساقع يمكن أفوق!! وأبلبع لي شريطين فياجرا !!!