ايه الحلاوة دي ياولاد؟! ..ايه الطعامة دي ياعالم؟!..خمسة وخميسة في عين اللى ما يصلي ع النبي...وشك ولا وش القمر يا باشا!!! ايه الكرافتة الحرير دي؟؟..ايه البدلة الابهة دي ؟؟..ايه الساعة الرولكس اللى ح تاخد من ايد سعادتك حتة؟؟!!..ايه الموبايل الجديد ده بتاع الاقمار الصناعية اللي ما حدش يعرف عنه حاجة!!! صحيح يااخوانا قيمة وسيمة ..عليا النعمة ما انا عارف اقول ايه؟؟..وردة يا ناس !!!..والا فلة يا عالم ؟؟..عليا النعمة سعادتك منور الدنيا كلها ....ولولا جنابك معانا كنا متنا والا انتحرنا والا هجينا من البلد والا جات لنا مصيبة تاخدنا!!!!! -يااد بلاش اسطوانات وهات م الاخر!!..وقل لي عايز ايه ؟؟؟!!! -عليا النعمة يا باشا ما أنا عايز غير رضا سعادتك!!! هوه ده اهم حاجة عندي في الدنيا!!!..ويمكن الحاجة الوحيدة اللي انا عايش عشانها !!!! يا سلام يا ولاد على اللي ينول رضا سعادتك ...دا أكيد راجل مسعد !!! مش البرطوشي بيه الله يجحمه مطرح ماراح!! جوعنا وشردنا وبهدلنا وشحتفنا وخلانا ملطشة للي يسوا واللي ما يسواش من غير ما نعمل له أيتها حاجة!!!الهي وانت جاهي تورينا فيه يوم...المفتري ابن الحرام !! -وايه بس اللي فكرك بسيرة الزفت البرطوشي!!! ما خلاص غار وغارت ايامه السودة !!! والله يرحمه دلوقتي ما تجوزش عليه غير الرحمة!! ده زمانه دلوقتي راقد في حفرة متر في متر وتحت راسه طوبة!! -سعادتك قول الله يجحمه ويلعنه مطرح ما راح!!! الهي وانت جاهي تجعل مستقره نار جهنم!!! ويخليك لينا يا مجيعص بيه ويطول لنا في عمرك كمان وكمان!!! وتقعد معانا متربع على تلها ومدلدل رجليك لغاية ما تشوف ولاد ولادنا قادر يا كريم!!! -ياااااد كفاية صدعت دماغي بكلام الشحاتين ده !!!! ما تتنيل علي عينك وتهمد شوية خلينا نتكلم في المهم !!! -ياباشا سيبني اقول اللي في قلبي!! ما اهو من نعمة ربنا عليا اني باصطبح كل يوم بوش سعادتك!!!! يا سلام على وش سعادتك اللي قالب لنا حياتنا كلها فرح وسرور!!! عليا الطلاق بالتلاتة وش سعادتك ده ولا وش القمر بالصلاة ع النبي !!!! يا سلام يا ولاد على تقاطيع سعادتك والنور اللي بينط من خلقة سعادتك تقولش بدر البدور!!! يا سلام عليك وانت قاعد كده وسط الرجالة ومنور الحتة والا اجدعها كلوب في الضلمة!!! ربنا يحميك لشبابك يا مجيعص بيه ويخليك لمصر ويزيدك من نعيمه كمان وكمان!!! -ياااااد سيبك م الأونطة دي !!..وقل لي نفذت المطلوب ؟؟؟؟ -كله تمام جنابك..الأمانة لسه باعتها للهانم ع الفيللا مع البت بهبوهة الخدامة ...بعد ما حطيتها في قفص بيض ممشش ولا مؤاخذة وحطيت على وش القفص شوية كتاكيت بتصوصو وبتطلع في الروح لزوم التمويه !!!وطبعا بخرنا القفص بعين العفريت والشبه الزفرة وضفر خرتيت أبيض يتيم حسب توجيهات سعادتك!!!!! -يعني كله تمام التمام والشيكولاتة متغندرة وآخر حلاوة ؟؟!! -كله تمام يا باشا وآخر ألسطة ...تلات أرانب خضر!!!..ووركين حمر نصيب سعادتك في العملية الاخيرة!!! -عفارم عليك يالاااا!!!...طيب وموضوع الارض خلص ولا لسه متنيل بنيلة ؟! -الأرض جنابك اتسجلت امبارح باسم الهانم الصغيرة !!! بعد ما خدنا موافقة الآثار بطلوع الروح!!!ولولا الدكتور هراس الله يعمر بيته كانت الارض راحت في شربة مية وجنابك لا كنت عرفت تبيع ولا تشتري ولا تزرع ولا تقلع ولا تنبش ع البلاوي اللي تحتيها ولا حتى تعرف تهربها بلاد برة !!! -طيب والشاليه الجديد بتاع الساحل الشمالي ؟؟!! -خلاص نقلنا ملكيته بعقد بيع صوري من الشيخ زعبوط قبل ما يغور ف داهية ويركب الطيارة ....وسجلنا العقد في الشهر العقاري باسم الهانم الكبيرة ربنا يديها طولة العمر ويخليها لسعادتك!!!!!!يارب تطول لنا في عمرها لغاية ما تشوف بنات بناتك قادر يا كريم!!!أي والله ما هي دي البركة الكبيرة!!! يا رب خد من عمر رجالة مجيعص بيه وطول في عمرها قادر يا كريم!!!!! -عفارم عليك يا عوكل!...انت فعلا طلعت بهلوان وجن مصور صحيح!!! زي ما قالوا عليك بالظبط ما يجيبها إلا اللطخ!!!! مع انك جربان وشكلك يا دوبك شكل واد جربان والا شحات كحيان واقف قدام جامع السيدة عايز ربع جنية!!!أنا مش عارف من غيرك كنت ح اعمل ايه يا لطخ!!؟؟ -يا باشا أنا خدام مداس جنابك!!! وتلميذك الصغير اللي لسه بيحبي في حضانة سعادتك !! وثقتك الكبيرة دي ح تخليني ارمي نفسي في النار عشان افديك بروحي!! ولو ما فدتكش روحي افديك بعيالي واحرقهم بجاز عشان احميك م الهوا الطاير!!! بس بصراحة فيه سؤال محيرني ومطير النوم من عينيا..هوه ليه جنابك مستعجل قوي النوبة دي ومتسربع زي ما يكون حد بيجري وراك ولا مؤاخذة وعايز يخطف منك حاجة!!!!!!! -يااااد انا خلاص ايامي معاكم بقت معدودة ...وجه الوقت اللي لازم أسيبكم فيه واتكل!! ما هو كل واحد وله يوم يا لطخ !!!!وانا خلاص يومي جه وبأجهز الشنط عشان اخلع !!!!! -ألف بعد الشر علي جنابك!!!هوه سعادتك بعافية وحتاخد لك يومين اجازة والا رايح البلد تزور الست الوالدة زي عوايدك!!! ايوه ما انا عارفك بتعز الست الوالدة جامد وبتعتبرها اهم حاجة في الدنيا بعد الفلوس طبعا!!!!! -لا ياعوكل ...انا المرة دي ح اسيبكم نهائي !!...ما هو انا يااااااد خلاص كملت مدة خدمتي بالتمام والكمال!!! والبهوات الكبار رشحوا فراويلة بيه ييجي يقعد مطرحي !!!! -يا ادي المصيبة السودا !!!..سعادتك بتتكلم بجد؟؟؟ جنابك ح تمشي وتسيبنا !!.معقولة الكلام ده ؟؟!! يا خبر اسود ومنيل بنيلة يا ولاد!!! يعني سعادتك ح تسيبنا للديابة اللي مستنيين اليوم ده على نار عشان يمزعوا في جتتنا نسايل نسايل !؟؟؟ -ياااد جمد قلبك!! وما تخافش!! فراويلة دا زي اخويا...واحنا متربيين مع بعض في حوش واحد...قصدي في حتة واحدة وشاربين من نفس البكابورت !!!! ورحمة ابويا اللي ما احلف بيه كدب ما حد ح يلمسك طول ما أنا عايش !!!! فاخذ عوكل يبكي كالولايا وسيادته يضحك بعنف حتى استلقى على قفاه ثم قال مداعبا: -والله ح توحشني اسطواناتك ياعوكل!! ما تحاول يااااد تسجلها لي على سي دي!!!! عشان اسمعها وانا قاعد مرحرح في العزبة بآكل فطير مشلتت بالعسل قبل ما أخش ع الديوك الرومي والحمام المحشي بالفريك وطواجن العكاوي !!! -سعادتك تؤمرني أمر !!! بس سايق عليك النبي بلاش حكاية التسجيلات دي!!! اي والله انا باخاف موت من التسجيلات بكل انواعها وخصوصا الصوت والصورة!!! وجنابك عارف التسجيلات دي ممكن تعمل ايه في البني آدم وتوديه على فين؟؟؟!! بس لو سعادتك عايزني ولامؤاخذة آجي اقعد تحت رجليك أخدمك واراعيك بعينيا في العزبة انا رهن الاشارة ...هوه انا أطول يا جدعان؟؟؟ يا باشا دا أنا لحم كتافي انا والعيال وأمهم من خير سعادتك!!!والنعمة الشريفة ح توحشنا يا باشا!!!! بس سايق عليك النبي ما تقطعش الجوابات!!!!! وفي اليوم التالي مباشرة غادر مجيعص بيه المصلحة واستلم مكانه فراويلة بيه فتوجه الجميع الى مكتب سيادته وفي مقدمتهم عوكل الذي انتظر حتى خلا المكتب من المهنئين ثم أدار اسطواناته : -ايه الطعامة دي ياولاد!!..ايه الحلاوة دي ياعالم!!!..وشك ولا وش القمر ياباشا!!! حصوة في عين اللي ما يصلي ع النبي!! عمر الشريف ياولاد والا حسين فهمي!؟؟ صحيح زي ماقالوا لنا بالظبط...قيمة وسيمة وباشا كبير مالي مركزه بصحيح!! مش زي الله يجحمه مطرح ما راح مجيعص بيه!!!..اللي كان مبهدلنا ومشردنا ومجوعنا ومشحتفنا ومطلع عينينا!!! نورت مكتبك يا فراويلة بيه ونورت المصلحة !! يا باشا ده احنا عشنا ايام سودة بعيد عنك كانت أسود من قرن الخروب لغاية ما سعادتك جيت وشرفت ونورت لنا كل حياتنا!!! انا يا باشا في الخدمة ورهن الاشارة ومن ايدك دي لإيدك دي!!! فلمعت عينا فراويلة بيه مثل فلاشات كاميرا قديمة من بتوع زمان وقال: -باين عليك واد جدع وابن بلد وبتفهمها وهي طايرة ...قلت لي اسمك ايه يالاااااااا !!!؟؟؟ -محسوبك ياباشا وخدام مداس جنابك واللي منى عينه يتمرمرغ في التراب اللي بتمشي عليه .... عوكل اللطخ !!! -ايوه ايوه اللطخ !!! مش عارف الاسم ده انا سمعته فين قبل كده؟؟؟ صدقني يا عوكل انت دخلت قلبي بسرعة مش عارف ليه ؟!! وحاسس كده زي ما اكون اعرفك من زمان!! وواضح كده انك من الكفاءات النادرة اللي بأدور عليها!!!..وتربة امي انت يااااااااد امك داعية لك عشان أنا خلاص قلبي اتفتح لك ع الضرفتين و ح أطلع لك قرار تكون دراعي اليمين!!! والا اقولك خليك دراعي الشمال أحسن!!!! -ياباشا انا كل اللي يهمني رضاك عني!!! اي والله كفاية عليا قوي رضاك لأنه الحاجة الوحيدة اللي ممكن تسعدني وتغير لي كل حياتي !! يا سلام يا ولاد على اللي ينول رضا سعادتك ده فعلا راجل مسعد وحظه في رجليه وايديه وجيوبه !!! -يااااااااااد بلاش اسطوانات وقل ايه انت ممكن تخدمني بايه!!! واضح انك حكاية كبيرة وانا يلزمني واحد زيك يخلص لي الحاجات المكلكعة وطبعا ح أدلعك وأمنجهك وأديلك اللي عمرك ما كنت تحلم بيه!! وح انططك على كل زمايلك وجايز اخليك خليفتي اللي يمسك كل حاجة من بعدي بعد عمر طويل طبعا!!! -يطول لنا في عمرك يا فراويلة بيه ويقصف عمر عدوينك!! شوف سعادتك انا بعون الله ح اجيبلك التايهة واخلص لك اللي ما يخلصش واظبط لك اللي ما يتظبط!!! واضرب لك بالنار اللي بيكرهك ويتمنالك الغلط وعايز ياخد مطرحك!!! شوف سعادتك لو عايز لبن العصفور والا رمش عين الهدهد اليتيم والا اللهو الخفي انا بعون الله ح اجيبهولك من تحت سابع ارض !!! ولو ما عرفتش اجيبه من سابع ارض ح اطلع له سابع سما!! محسوبك بتاع كله يا باشا !!! -خلاص يا لطخ انت من النهاردة ح تبقا دراعي اليمين والشمال وعينيا اللي باشوف بيها ووداني اللي باسمع بيها ورجليا اللي بامشي بيها وضهري اللي باتسند عليه!!!!!!!!وانا النهاردة عازمك ع العشا عندي في الفيللا واهو بالمرة يبقا عيش وملح ونتكلم في المفيد بعيد عن عيون اللي بالي بالك يا لطخ اللطوخ يا معلم!!!!!