أذكر في مرة كنت مع بعض الأصدقاء وانضملنا في اليوم ده ظابط، ففتحنا موضوع التعذيب وقسوة الشرطة في التعامل مع المواطنين. وكلمناه كمان عن اللي حصل مع خالد سعيد، وعن اللي الناس كلها شافته في الفيديوهات المنتشرة على الانترنت للشرطة المصرية. الظابط كان رأيه إن مستوى الجريمة ونوعية المجرمين في الوقت اللي إحنا فيه، بتجبر رجال الشرطة إنهم يتعاملوا مع المجرمين بالطريقة دي. بالصدفة كان معانا محامي وقال للظابط: "أنا دلوقتي لو باشرب بانجو وحشيش وقتال قتلة، هو مش في قانون ومحكمة ونيابة؟ لو كلام سيادتك مظبوط يبقى إيه لزمة القانون اللي درسناه؟ كدة بقى أي رجل شرطة يشوف حد بيعمل حاجة غلط، يعاقبة فورا زي ما هو شايف، ونلغي القانون بقى وتبقى غابة!" الظابط أنهى الحوار فورا بطريقة عصبية وبلهجة آمرة، وغير الموضوع تماماً. النهاردة، شرطي من اللي مش مصدقين، أو مش عايزين يصدقوا إن الموقف اتغير، ضرب سواق بالرصاص لسبب تافه جدا. في الحال اتجمع مئات المواطنين حول الظابط وحرقوا عربيته واعتدوا عليه بمنتهى القسوة؛ لغاية دلوقتي مفيش أخبار أكيدة عن مصير الشرطي. في الفيديو اللي ظهر فيه تجمع كبير من الناس بيكسروا وبيحرقوا عربية الظابط وبيضربوه، لفت نظري إن في ناس كانت بتحاول تهدي المواطنين الغاضبين، بس واحد زعقلهم وقال: "محدش يحوش عنه!" "محدش يحوش عنه!" السؤال هو: هل نوعية وتصرفات رجال الشرطة هي اللي بتجبر المواطنين يتعاملوا معاهم بالطريقة دي؟