فؤاد حداد أصحى يا نايم وحّد الدايم وقول نويت بكره إن حييت الشهر صايم والفجر قايم أصحى يا نايم وحّد الرزاق رمضان كريم مسحراتي منقراتي وأنا بنادي بعلو حسي يا دنيا حسّي الحق بيّن ومصر أَوْلى حققنا ثورة وقمنا صخره وعرقنا زيّن أرض البطولة إحنا اللي إيدنا خلّت حديدنا حديد حنيّن على الطفولة وصباح مندّى على الولاد دي طريقها هيِّن ما فيهش غولة وأنا السنه دي شقت سنابلي في كل وادي والليل خطب لي قمر زبادي بسحر بابْلي وضي هادي فردت حبلي بطول بلادي
المشي طاب لي والدق على طبلي ناس كانوا قبلي قالوا في الأمثال: "الرجل تدب مطرح ما تحبّ"
* * * وانا صنعتى مسحراتى فى البلد جوال حبّيت ودبّيت كما العاشق ليالى طوال وكل شبر وحتّه من بلدى حتّه من كبدى حتّه من موّال: أنا بلدى حره بنيت على غصنها عشّى ولقمة الحُب بتفطرنى وتعشّى أنا عاوز ابنى يعيش والظلم ما يعيشّى يا رب يا اللى خلقت لنا البصر واللمس ولا ترسم الشمس إلا النور على وشى اصحى يا نايم وحّد الدايم