ههههههه شوز إيه بس يامه الله يحفظ مقامك، شوز يعني لامؤاخذة جزمة لكن اللي انتي تقصديها اسمها برامج التوك شو مكالمة من امي في البلد - هاه ياولدي طمني حد كلمك ولا لسه؟ - حد مين يامه وهايكلمني بمناسبة إيه؟ - وهي دي عايزة كلام؟ الوزارة طبعا!! - ههههههه الله يحظك يامه وزارة إيه بس خليني ماشي جنب الحيط. - ايوااااا اقعد إعمل زي أبوك ماعمل ! - عمل إيه أبويا ربنا يديله الصحة؟ - قعد ماشي جوه الحيط مش جنب الحيط لغاية لما الحيطة إتهدت عليه وعلينا ! - يامه ماحنا حلوين كده وعال العال يعني يرضيكي إن المربي الفاضل إللي أفني حياته في التربية والتعليم يختم حياته بأنه يبقي وزير؟ - ده قصر ديل يا اذعر إنت وأبوك، مالهم الوزرا ماهم بهوات أهم وزي الفل؟ - بهوات إيه بس يا شيخة دي قلة قيمة وبهدلة والوزير من دول يا دوب بس يبقي وزير وتلاقي سيرته علي كل لسان ولو كان محظوظ ومطلعش من الوزارة علي السجن هيطلع بمليون مرض.. لا .. الله الغني. - هتفضل طول عمرك فقري كده؟ إعمل أي حاجة تبني مستقبلك السياسي. - الصحافة أبقي من أي وزارة، شوفي كام وزير بيروح وييجي لكن الصحفي يفضل في مكانه محدش يقدر يزحزحه، وياما صحفيين كبار اتعرضت عليهم الوزارة ورفضوها. - يابني نفسي كده قبل ماموت اشوف كاتبين في الجرايد هشام مبارك وزيرا للإعدام! - إعدام إيه بس يامه، إعلام قصدك أكيد إعلام مش إعدام بعيد الشر عليكي! - وهو يعني فيه فرق كبير ياولدي بينهم؟ - طبعا يامه الإعلام ده بيوعي الناس ويعرفهم الحقيقة لكن الإعدام ده بيموت الناس! - طب مانا باشوف زمايل ليك في الجرايد وفي التوك شوز بيقولوا للداخلية تموت الناس؟ - ههههههه شوز إيه بس يامه الله يحفظ مقامك، شوز يعني لامؤاخذة جزمة لكن اللي انتي تقصديها اسمها برامج التوك شو. - أيوه هو المنيل الشو ده، ايش قولك بقي أنا شوفت واحد مذيع بيحرض علي قتل المتظاهرين وبيقول للشرطة إضرب في سويدان القلب، عايز اشوف دم كتير، هي سويدان القلب دي ياولدي تقرب للقاء سويدان الممثلة؟ - لا يامه سويداء القلب مش سويدان، سويداء القلب يعني قلب القلب يامه! - طيب يعني الإعلام أهو بقي زي الاعدام مفيش فرق بينهم! - طب وعايزة إبنك حبيبك يكون وزيرحاجة وحشة زي الإعلام ده اللي بيموت الناس؟ - تاهت ولقيناها، بلاش يا سيدي الوزارة وخش علي مجلس الشعب، أظن مش هتقدر تتكلم فيها دي؟ - انتخابات يامه ووجع قلب ومصاريف وانا يادوب أربي العيال وإللي جاي علي قد الرايح وانتي عارفة البير وغطاه. - يابني خش البرلمان عايزين نشوفك أنا أبوك في التليفزيون قاعد ملعلع كده. - وانتي يامه هتعرفيني ازاي، البرلمان ده زحمة قوي قوي ومليان ناس وصعب يعني متأخذنيش تقدري إنتي وأبويا في السن ده تشوفوني كويس! - استني الظاهر ابوك بيقول حاجة. - حاضر يامه مستنيكي، وسلميلي عليه. - أبوك بيقولك اتوكل علي الله وخش البرلمان وإحنا هنقدر نشوفك في التليفزيون. - هتشوفوني ازاي بس؟ - أبوك بيقولك دي حاجة سهلة خالص، إبقي اقعد جنب زميلتك في البرلمان سما المصري وهتلاقي مصر كلها بتشوفك!
