دا حوار بينها وبين نفسها نتج عنه تهزيق وكدمات ورضوض فى منحنيات الجسم، والأمر مسلمش من كام شلوت ولسوعة على القفا كانت من كام يوم بعد ما خلاص جوزها راح على الشركة وابنها راح على الحضانة يقلب رزقه، كانت قاعدة لوحدها واتكلمت بصوت مسموع هي: لاااا بقى أنا زهقت خلاص عايزة شقة ببلكونة عايزة أشم هوا يا ناس، عايزة شقة واسعة شوية مش الشقة اللي أد الحوأ دي وتقريبا نفسها سمعتها وهى بتبحبح في الكلام إلا ولقيت حد ماسكها من قفاها وبيجرجرها، أتاريها نفسها ودار الحوار ده بينها وبين نفسها. النفس: وهى بتردح ومسكاها من قفاها: إييييه قلتى إيه يا بت؟. هي بصوت مرعوش: مقلتش حاجة النفس: لأ والنبى عيدي كدة اللي انتي قلتيه لحسن أنا ماسمعتش كويس هي: لا مالهوش لزوم ان أعيد الكلام النفس وهي بتلسع على قفاها: قولي يا بت كنتي بتقولي إيه؟ إيه عايزة شقة واسعة ببلكونة دي؟ هي: طب ودي فيها إيه انتي مش شايفة يا نفسي أد إيه الشقة صغنونة دي خمسة وستين متر ومافيهاش بلكونة، البلكونة اللي كانت موجودة فتحناها على أوضة النوم علشان توسع شوية، وبعدين أنا نفسى أوي يبقى عندي بلكونة وأشتري الكرسي الهزاز الثابت "محدش يسأل يعنى إيه كرسي هزاز ثابت لأني مش هأعرف أشرح" بس والله فيه كرسي هزاز ثابت وأقعد أتهزهز بالكرسي وأنا في البلكونة وبقرا كتاب وماسكة مج شاي بلبن. النفس وهي بتردح تاني: ومالها ياختي الشقة دي، ما هي سايعاكي انت وجوزك وابنك هو حد لاقي شقق اليومين دول؟ هي: أيوة بس أنا نفسي ابني يبقى ليه أوضة مستقلة وكمان.. النفس مقاطعة: إيه إيه إيه إييييييييييه، أوضة مستقلة للمفعوص ده علشان إيه واللي عندهم تلت وأربع عيال وبيناموا في أوضة واحدة دول يعملوا ايه؟ ما إنتي جايبة الأنتريه أبو كنبة تتفتح سرير والواد بينام عليه لازم أوضة مستقلة؟. هي: وفيها إيه يعني لما أوسع على نفسى؟ النفس بتجرجرها من قفاها: إمشي يا بت انجري قدامي هي: على فين بس؟ النفس: بقولك امشي انجري قدامي وراحت ساحلاها على الأرض خلتها تتكعبل في فردة شبشب بتاعت ابنها وراحت رزعاها قدام بوفيه السفرة النفس: شايفة إيه قدامك؟ هي:البوفيه النفس وهي بتزغدها فجنبها: ما أنا عارفة إنه الزفت محطوط إيه على البوفيه يا فالحة؟ هي: أااااه قصدك دي النفس بصوت يحاول أن يقلدها: أاااااااااااه قصدي دي هي: ده برواز لخمس فراشات متحنطين النفس: وده يا حبة العين والقلب بيفيد في إيه؟ هي في غباء: مبيفدش بحاجة طبعا ده بيتعلق على الحيطة بس أنا مستنية أبقى أنزل أشتري مسامير النفس وهي تجز على سنانها: ولما هو مش هيفيد بحاجة جبتيه ليه يا حلوة؟ هي: علشان شكله عاجبني وعلشان أبقى أزوق بيه الشقة النفس: يعني جايباه تفاريح مش كدة؟ هي مؤكدة على كلامها: أيون هو كدة بالظبط بس نزلي إيدك شوية علشان رقبتي هتتلوي إنتي كل ده ماسكاني من قفايا النفس: وجبتيه بكام يا روح الروح؟ هي مشمئزة من ألفاظ النفس السوقية البلدى مووووت: جبته بستين جنيه وهوب واترزعت حتة دين شلوت وهوب وقلم نزل على قفاها وهوب وأكلت قلمين على صداغها وفي وسط كل الضرب ده وهي عمالة تزعق النفس: دفعتي ستين جنيه على برواز يتحط على الحيطة وجاية تقولى عايزة شقة ما أدرك إيه وبلكونة ما بصر إيه؟ وإيه يا بت الكرسى الهزاز الثابت ده؟ انتى يا بت مش عايشة فى الدنيا ولا إيه وعمالة بس تقرفينا على بلوجك واتبرعوا للغلابة وأحسنوا للمساكين وشوية وشوية هتشحتى عليهم ومحسسة الناس إن إنتى اللى مافيش بعدك اللي في جيبك مش ليكي وإن انتي الوحيدة اللي اللقمة قبل ما تخش بقك بتخش بقهم.. ييجوا يشوفوا الخيبة الكبيرة اللى انا فيها. لما إنتى عاملة فيها حساسة أوي كدة متبرعتيش ليه يا بت بالستين جنيه دول ماهي الشقة اللي جانبك والحيط في الحيط أد شقتك بالظبط والست عندها تلت عيال وجوزها عاطل، محطتيش ليه يا بت الستين جنيه في ظرف واديتهملها. وبعدين تعالى هنا، وراحت ماسكاها من شعرها وجت قدام الدرج اللي في ترابيزة أوضة السفرة وقالت: افتحي الدرج ده هي في توسل: لا والنبي خلاص النفس وهي بتديها على قفاها: بقولك افتحي الدرج بدل ما أفتح نافوخك هي في توسل أشد من اللي قبله: لا خلاص والنبي والنبي خلاص بلاش الدرج ده النفس: يعني انتي عارفة فيه إيه جوة الدرج هي: أه عارفة عارفة النفس: طب افتحيه لحسن يمين تلاتة متباتي إلا في سرير القصر العيني النهاردة هي: أبوس إيدك يا نفسي خلاص النفس وهي بتشخط شخط قوية: افتحي يا بت هي مستسلمة للأمر الواقع وراحت فاتحة الدرج وبسرعة رحت حاطة ايدها على وشها دفاعا من الاقلام اللى هى متاكدة انها هتنزل ترف عليها النفس وهى بتشرشح: يالهوي يا بت انتي ايه معندكيش دم انتي جبتي تاني برضه هي: أصل ده مش ليا لوحدي ده ليا أنا وابني النفس قالت لفظ أبيح وكملت: انتي وابنك إيه قولي انتي والمنطقة انتي وعيال العمارة كلهم، ده انتي تفتحي محل يا بت بالشكولاتات دي كلها هي: مش للدرجة دي والله النفس: اخرسي ماسمعش حسك يا سافلة يا كلبة، قال وعايزة شقة واسعة ببلكونة ده بتمن الشكولاتات دي كنتي أكلتي أسرة مكونة من عشر أفراد فطار وعشا وغدا يا حيوانة، وهوب راحت رزعاها قلم على قفا على شلوت وتفت عليها ومشيت وسابتها بعد ما مشيت قعدت هي تفكر في كلام نفسها ولقيت إن عندها حق شقة إيه وبلكونة إيه؟ هي لنفسها: الحمد الله برضه أنا أحسن من غيري وبلاش التطلعات المادية دي، بس لازم هأجيب الكرسي الهزاز الثابت وهوب ولقيت قلم نزل على قفاها.. طلعت تجري من نفسها
