بناء على حالة نفسية سيئة.. لقاء سويدان تكشف عن إصابتها بالعصب السابع

ظهرت الفنانة لقاء سويدان في برنامجها لأول مرة لتكشف عن حالتها الصحية وإصابتها بالعصب السابع، وأسباب ابتعادها الفترة الأخيرة، وقالت في ظهورها الأول عبر برنامجها: بشكر كل الناس اللى وقفت معايا وشكرا لكل دعواتكم، أول مرة اطلع بعد التعب، أنا جالي العصب السابع، واسمحوا ليا إنى أتكلم معاكم على مرضى، لأن أنتم بتشاركوني كل لحظات حياتي، في نجاحي ومسلسلاتي ومسرحياتي والبرنامج، وبتفرحوا معايا بكل حاجة حلوة، حبيت أظهر الجانب الإنساني فيا ليكم، وبدون خجل.

وأضافت لقاء سويدان في حديثها: احنا بني آدمين وعندنا مشاكلنا الصحية والإنسانية ومحدش يتخيل إنها عندنا، الصورة اللى الناس واخدينها عن الفنانين هي صورة لامعه أوي، والناس بتقول إن لازم الفنانين طول الوقت يكونوا متشافين كدا، بس أنا حبيت أقولكم إن في لحظات ضعف كتير ومرض ويأس بتعدي علينا.

وتابعت في حديثها: المرض اللى جالى بناء على حالة نفسية سيئة مريت بيها، وأنا بكتم وبظهر قوتي ودايما كل اللى حواليا شايفني قوية، وظهرت حملات تشويه ليا وفي ناس كنت بعتبرهم صحابي وقريبين مني ومطلعوش على هذه المكانة، الفترة الزمنية اللى عايشنها الآن هي غريبة جدا، وكلنا بنمر بضغوط، بس الفكرة إننا نتحمل إزاى، وندى الآخرين فرصة يأثروا علينا إزاى.

لقاء سويدان في ظهوها الأول

وشاركت مؤخرًا لقاء سويدان في بطولة مسلسل الوصفة السحرية الذى عرض على قناة dmc ومنصة watch it، حيث يعد أول أعمال الأوف سيزون على قنوات المتحدة. لقاء سويدان تجسد خلال أحداث المسلسل شخصية سيدة متحررة في التفكير والشكل والملابس، لاسيما أنها عاشت معظم حياتها خارج مصر، وهى أم لطفلة وفى نفس الوقت أخت الفنان إسلام جمال، وتعيش في المجمع السكنى الذى تدور فيه أحداث العمل ويتواجد فيه معظم الشخصيات، وتحدث العديد من المواقف بيهم في إطار اجتماعى لايت.