نهال عنبر خلال حوارها مع "واحد من الناس": زوّجت ابنى الوحيد مبكرًا وقلت له عايزة أحفاد كتير.. كنت شقية جدا خلال صغرى.. وأحفادى بيغيروا عليا وأنا قريبة منهم.. وهذا مقلب محمد صلاح معى

قالت الفنانة نهال عنبر إنها كانت حريصة على زواج ابنها المخرج حسام الحسينى وهو فى سن صغيرة حتى تفرح بزواجه وأولاده وتريد أولاد كثيرين لأن حسام هو ابنها وحيد.
وأضافت خلال لقائها مع الإعلامى دكتور عمرو الليثى ببرنامجه واحد من الناس على قناة الحياة: أنا هتجنن على العزوة وأنا جوزت حسام 22 سنة، وأهلى اعترضوا عليا كيف تزوجيه وهو لسه صغير، ولكنى أصريت على زواجه.
وتابعت نهال عنبر: أنا ايضا تزوجت فى سن صغير 18 سنة وهذا جعل هناك علاقة أمومة وصداقة بينى وبين حسام، لأن الفرق بينى وبينه مش كبير، وانا كنت الأب والأم لحسام لأن والده كان على طول الوقت مسافر فى شغله، وانا كنت حنينه جدا وشديدة فى نفس الوقت لكن مش قاسية.
و كشفت عن سر لأول مرة قائلة إنها خاصمت ابنها حسام 60 يوما علشان رد عليها فى الكلام، متابعة: كان عاوز يروح ديسكو وهو فى سن شباب، وأنا كنت بخاف من الحاجات دى فقلت له مش هتروح ولو عاوز تروح هروح معاك، فقال لى ازاى انا كبرت فقولت له مش هتروح فقال لى حرام عليكى بقى، فشاهدنى وانا بوطى امسك سبت الزبالة علشان احدفه بيه فجرى منى، فقلت له امامك شهرين لا انا امك ولا تعرفنى، واحفادى طالعين شخصيتهم قوية مثلى، وانا اخدت ده من ماما لانها كانت من أصول شركسية.
و قالت الفنانة نهال عنبر إنها كان شقية جدا وهى صغيرة وكانت مسافرة مع والدتها لبنان على مركب وماسكة يد والدتها، متابعة: وأحنا طالعين وهى ركزت فى الشنط اللى الونش بيرفعها فتركت يدها واختفت عن الأنظار.
وأضافت خلال لقائها مع الإعلامى دكتور عمرو الليثى ببرنامجه واحد من الناس على شاشة الحياة، أن والدتها عندما سمعت صوت محرك المركب اعتقدت أن ابنتها وقعت فى الماء والمحرك نزلنى تحت، متابعة: ظلوا يبحثوا عنى فى المركب كلها فوجدونى قاعدة فى غرفة القبطان وقطعت له كل الورق اللى فيها.
وتابعت نهال: من كتر شقاوتى أيضاً كان لى واحدة صاحبتى نصف ألمانية ونصف مصرية وكانت شقية جدا، وكانت تعبانة وسخنة وماما رفضت تاخدنى معاها عند جدتى، فاتت لى دينا صحبتى وقالت لى تعالى معايا نجيب عيش، وروحت معاها ورجعت وجدت ماما فى البيت، وضربتنى بالشماعة، وأحفادى أيضا أشقياء جداً ويأتوا بأصحابهم ويعملوا دوشه فى البيت.
وقال يوسف وياسين احفاد الفنانة نهال عنبر إنهما فى مرة جابوا أصدقائهم وولعوا شماريخ فى البلكونة والجيران أعتقدوا انها حريقة وأبلغوا المطافى.
وقالت الفنانة نهال عنبر أن أحفادها يوسف وياسين يغيران عليها للغاية، متابعة: كان فى أحد المعجبين يقول عنى كلام حلو للغاية، فاتعصب أحفادى وكانوا سيتشاجرون معه، فقولت لهم لا داعى للمشكلات وأهدأوا دول معجبين.

وأضافت ، أنها دائما تفتح حوارا مع أحفادها كى يعرفون الخطأ والصح وأقول لهم أحكوا لى بصراحة وأنا لن يكون لى رد فعل علشان أقدر اقف بجانبكم، وبتكلم معاهم دايما عن الحرام والحلال، وأشجعهم على الصلاة ياسين يكون الإمام ويوسف يقيم الصلاة ونصلى جماعة احنا الثلاثة.
وقال يوسف حفيد نهال عنبر: عندما يكون عندى اى مشكلة بحكى لها على طول وأسمع رأيها.
وقالت الفنانة نهال عنبر إنها سعيدة للغاية بنجاح حسام ابنها فى حياته المهنية وأنها دائما تدعمه حتى ينجح ويتفوق فى مجال الإخراج.
وأضافت: أنها سعيدة للغاية بنجاح ابنها فى حملته الإعلانية مع النجم محمد صلاح، متابعة: حسام غاوى مقالب، وهو بيصور الإعلان مع محمد صلاح فى لندن، قال له ادينى مامتك اكلمها أنا بحبها جدا، وسيبنى أنا اكلمها من تليفونك، فلاقيته بيقولى مساء الخير وأنا لا أعرف صوت محمد صلاح بشكل كبير، فلاقيته بيقول لى مساء الخير، أنا صاحب حسام تفتكرى مين، فقولت له ميدو فقال لى لا، مين تانى مع حسام فى لندن، فأنا استغبيت أوى فى هذا اليوم، وجبت كل الأسماء ما عدا محمد صلاح، فلما زهق منى قال لى أنا محمد صلاح، فقلت لا بتهزر وقعدت اتكلمت معاه شوية كان إنسان لطيف أوى ربنا يخليه لينا وهو فخر لينا كلنا.
وعلى جانب آخر أوضحت نهال عنبر انها سوف تقدم هذا العام فى رمضان مسلسل "عودة البارون " مع الفنان حسين فهمى.