ح تعيشى يا مصر

قريب وغريب يابلدى
فى رحابك مأمنه
واللى يخونك يابلدى
ما أسوأ معدنه
ملعون دنيا وآخرة
اللى يمسك بسوء
ولا نقطة دم عنده
ولا فيه أصلاً عروق
اللى باسمك يتاجر
فى السر وفى العلن
وعشان لحسابه ثائر
أمنك يبقى التمن
ح يخيب مسعاه وظنه
اللى بيتمنى موتك
ح تعيشى غصب عنه
وح يملا الدنيا صوتك
وحياة نخلك وبلحك
والنيل والأهرامات
ما نخون عيشك وملحك
ولا أجمل ذكريات
حضنك يا مصر سايع
كل الأطياف فى قلبك
ومقابل كل بايع
مليون عاشق يحبك
الله حافظك وصاينك
من إيد ناويه الخراب
فى حماه سلمك وأمنك
زى ما قال فى الكتاب