"ثورة الليل والنهار".. قصيدة لأحمد خطاب

يشبه كتير الخير
خير زمان الأنبيا
ولو الشر استباح الخلق
هايبقى فى ومضة طريق
للرجوع للحق
مين كان يكون
لما تنطلق الأنا
بقولة لأ
المعركة
سادت فى أرض المعركة
ومهمناش الخوف
والخوف ضعيف
لما يشعر بالزهق
قادر يحقق معجزة
والمعجزة
"شعبٌ أراد العيشَ من دون احتقار
فتحول الليلُ السقيم فجرُ النهار"
واحنا هنا فى قلب الميدان
لأول مرة يجمعنا هدف
دون اختلاف
رغم كل الائتلاف
اتوحدت كل الأيادى فى الميدان
اللى فى إيديه الصليب
شاله حارب بيه عشان
يحمى اللى فى قلوبهم هلال
لأول مرة نحب بعض بجد
ونسينا شعارات الأخوة
ونسينا فى الأمثال
"قدم سبت تلقى الحد"
لأول مرة نحس
بمعنى كلمة القيمة
ولأول مرة نشعر
إن مصرى مش شتيمة
أنا مصرى فخور
رافع رقبتى لفوق
باحكى الثورة لنجوم
والشمس لسه شروق
لما انتفاض الشعب
حرك دول وشعوب
وف كل فركة كعب
يتعدل المقلوب
مايرضناش يا وطن
ترجعلنا محنى
ارفع رايات همتك
اسمعنى والمحنى
شاربين م الصبر كاس
م الشرب كان الظمأ
شايلين ع الضهر فاس
هو اللى مادحنى
صوت الأدان وطنى
صوت الجرس لحنى
مايرضناش يا وطن
ترجعلنا محنى
لما الشهيد بيموت
تبكى عليه ملايين
واحد بيتنحى
يفرح الملايين
وفرحنا فرحة عيد
أجمل صلاة فى العيد
صلينا فى الميدان
ولبسنا لبس جديد
وهتافنا الله أكبر
حسنا بخير زمان
على كوبرى قصر النيل
النيل بيتحايل
ع الشجرة يمسك إيديها
والشجرة متذوقة
واقفة بتتمايل
ويقولوا احنا أكيد
عايشين فى أسطورة
واقفين فى قلب الميدان
بيغنوا "صورة صورة"
والليل فى جو القاهرة
بيسقى الفجر بالمية
كوباية المية اللى دايماً
يشرب الخير منها
إترشت على جنود الميدان
حسو بحرية
مصر العروسة ف كوشة
والرفة كات فى الميدان
سجادة صلاة مفروشة
والشعب بيصلى الإمام
مصر الحوار والسلم
والضحك ع الارصفة
و ف كل مصرى فينا
80 مليون صفة
من " صورة الليل والنهار"