خناقة فى الوسط الشعبى.. سعد الصغير يهاجم شعبان عبد الرحيم: مؤدى وليس مطربا.. وشعبولا يرد: "أنت مين عشان تقيّم صوتى يا أراجوز".. ويعّلق: "صغير ومالوش أى لازمة وميعرفش يغنى أغنية واحدة فيها طرب"

دائمًا ما تعج الساحة الغنائية فى مصر بكثير من الأزمات والمشاكل وتبادل الاتهامات.. نجوم كبار يختلفون فيما بينهم ويتخذون من "السوشيال ميديا" منبرا لفضح كل منهم الآخر، ملحن يهاجم مطربا، مطربة تشن هجوما على ملحن، وأزمات لا تنتهى فى نقابة المهن الموسيقية، حتى تحول هذا الصرح إلى وصلات ردح وبلطجة من قبل الأعضاء، وتبادل اتهامات بين النقباء الذين تولوا رئاستها فى السنوات الأخيرة (منير الوسيمى، إيمان البحر درويش، مصطفى كامل، هانى شاكر)، ولازالت الخلافات مستمرة فى أروقة النقابة التى تعتبر مصدرًا لحل مشاكل الأعضاء وليس العكس.
شعبولا

ويبدو أنه كُتب على الوسط الغنائى، ألا يعرف الهدوء يومًا، إذ نتجت أزمة كبيرة بين المطرب الشعبى سعد الصغير، والمطرب شعبان عبد الرحيم، على خلفية ظهور الصغير، مؤخرا، فى أحد برامج "التوك شو" محاولًا تقييم صوت المطربين الشعبيين من وجهة نظره وكيفما يراها، وذكر خلال اللقاء أن شعبولا "مؤدى" وليس "مغنيا"، ومدح فى عدد من الأصوات الشعبية (حكيم، عبد الباسط حمودة، طارق الشيخ، محمود الليثى، أمينة، بوسى، هدى)، وقال عنهم :"هؤلاء هم أحسن أصوات تغنى الشعبى فى مصر، ولا يوجد لهم مثيل، وأيضًا توجد أصوات أخرى غير مشهورة لا يعرفها أحد لكنها من أفضل الأصوات التى تحترف الغناء الشعبى بعيدا عن الأضواء"، وعلقّ :"اللى أصواتهم حلوة قاعدين فى البيت"، أيضا تجاهل الصغير اسم نجم الأغنية الشعبية أحمد عدوية فى حديثه عنها، وذكر أن شعبان عبد الرحيم اعترف بنفسه ذات مرة أنه مؤديا وليس مطربا.

تصريحات سعد الصغير ورأيه فى زملائه من المطربين أشعلت غضب شعبان عبد الرحيم، الذى هاجمه قائلا: "الصغير ده أراجوز، وهو مين عشان يحكم على أصوات المطربين، يتكلم عن نفسه بس، ومش هو اللى يقول أنا مؤدى ولا مطرب، ولا يحكم علىّ، هو بيشتغل إيه عشان يقول ويحكم علينا"، ثم علّق بقوله :"مين ده".
سعد الصغير

ولفت شعبولا فى تصريحات ل"اليوم السابع"، إلى أن المغنيين الشعبيين فى حالة غضب من الصغير بسبب عدم ذكره إسم النجم أحمد عدوية فى حديثه عن الطرب الشعبى، قائلا :"هو ليه ماذكرش اسم عم الكل أحمد عدوية، وكل واحد من اللى قال اسمهم بيغنى أغانى عدوية".. ويضيف المطرب الشعبى :"زعلان من الأحكام اللى بيصدرها الأراجوز سعد الصغير علينا"، واستكمل حديثه :"الكلام ده لو بينا وبين بعض ماشى، ممكن نعديها، لكن يقوله علنى وقدام الناس كلها فى التلفزيون، ميصحش ومينفعش".
أحمد عدوية

وواصل شعبولا هجومه على سعد الصغير قائلا: "أنا عايز أعرف مين ده، عشان يقيّم الناس، هو سعد الصغير يعرف يغنى أغنية واحدة من أغانى الإذاعة القديمة اللى فيها طرب، أو أغنية لأم كلثوم، أو لحد من المطربين الكبار"، وعاب شعبولا على من منحه حق الكلام عن المطربين، وقال :"العيب برضو على اللى خلاه يتكلم عننا بالشكل ده واعتبره حكم أو نجم"، واستكمل المطرب :"شغال يغلط فينا واحد واحد ويقولك أنا بتكلم بصراحة ومش بخاف من حد، ومفيش حاجة اسمها كده يعنى ايه اتكلم بصراحة وأغلط فى الناس، يعنى انا اتكلم بصراحة وأشتمك، فى حاجة اسمها احترام وتقدير ده حتى ما احترمش أحمد عدوية والمثل بيقول اللى مالوش كبير يشترى له كبير، وطول عمرنا بنعتبر أحمد عدوية كبيرنا، وهو لا احترم كبير ولا صغير، عشان هو فعلا صغير وهيفضل كده مدى حياته لأنه مكنش المفروض يطلع ويتكلم عننا بالأسلوب ده قدام الناس كلها".

وعن رأيه فى سعد الصغير وفنه وطربه يقول شعبان عبد الرحيم: "فى نظرى سعد أراجوز ومونولوجست ملوش أى لازمة، ولا عنده فن ولا طرب، ولو فنان حقيقى يطلع يغنى لينا حاجة من أغانى زمان للست أم كلثوم ونكشف طبقات صوته ويتعرى قدام الجميع".
الصغير وشعبولا

وتوعد شعبان عبد الرحيم سعد الصغير قائلاً: "لما أشوفه مش هسيبه، لأنى ماتعودتش أغلط فى حد، وطول عمرى بقول كلام كويس فى حق زمايلى الكبار والصغيرين، وده اللى اتربينا عليه من الكبار اللى سمعنا أغانيهم واتعلمنا منها الاحترام والفن ويعنى إيه عيش وملح".