هلال لطلاب جامعة بنها: "انتوا مفتريين ومفيش درجات رأفة"

اعتبر الكتاب الجامعى بدعة..

وصف الدكتور هانى هلال وزير التعليم العالى طلاب جامعة بنها فى لقائه معهم اليوم ب"المفتريين"، وذلك فى ممازحة لهم، بعد أن سألهم : هل توافقون على أن يكشف عليهم طبيب حاصل على درجات رأفة؟ فأجابوا: نعم.
وأكد هلال فى اللقاء الذى عقد فى جامعة بنها اليوم الثلاثاء أنه سيتم إلغاء درجات الرأفة نهائيا وقال "اللى اخترع الرأفة غير دستورى ولا قانونى والطالب الخيبان خيبان واللى عايز يتخرج بالرأفة مش عايزينه والمجتمع مش عايزه، لأن الرأفة فى العلم ومستقبل البلد غلط، ومن ستكون نسبته 49.9 % يسقط".
واعتبر الوزير الكتاب الجامعى مصلحة بين الطالب والأستاذ، مشيرا إلى بعض الأساتذة الذين يضعون صفحة ملونة لإجبار الطالب على شراء الكتاب، وقال للطلاب "انتوا مش فى مدرسة والكتاب الجامعى بدعة وهيتلغى لكن مش فى يوم وليلة".
واستنكر أحد الطلاب المنتمين إلى تيار الإخوان المسلمين فتح باب الترشح لانتخابات اتحاد الطلاب لمدة ساعة يوم خميس لمنعهم من الترشح، مع ضرورة سداد المصاريف، فرد الوزير "انتوا معاكم اللايحة وعارفين إن الانتخابات تتم فى أول 8 أسابيع من الدراسة، ومحدش حاشكم عن سداد المصاريف عشان تدخلوا الانتخابات".
وعندما سأله نفس الطالب عن زيادة مصاريف الجامعات إلى 200 جنيه لطلاب الانتظام قال الوزير "انتوا مش بتدفعوا حتى النظافة بتاعتكم، وهنلغى دعم الكتاب نهائى، وبتتكلم مع زمايلكم وبتآخد أوامر فى تليفونك المحمول ب 100 جنيه فى الشهر، مش عايزينك تدفع فلوس بس لازم تشارك فى الخدمات، واللى مبيقدرش يدفع فلوس مبندفعوش، لكن مش هنعفيك من المصروفات عشان تتكلم مع صحابك فى التليفون".