بالفيديو.. شاهد ماذا فعل الدولار فى أسعار السلع بالسوق المصرى

أعرب الكثير من التجار بالأسواق المصرية عن استيائهم بسبب ارتفاع أسعار الخضروات والفاكهة والسلع الاستهلاكية لتضم السلع الأساسية الهامة مثل الأرز والزيوت والدواجن.
وقال عم رشدى داود صاحب محل بحى إمبابة :"بعد ارتفاع سعر الدولار والحياة توقفت تماما فى الأسواق حركة البيع كانت ماشية شويه لكن بقالها كام يوم مفيش خالص نعمل إيه نقفل يعنى ولا نعمل إيه وزير التموين بيصدر الأرز ودى أهم السلع الأساسية لكل بيت فى مصر .. أسعار السلع المهمة زادت بنسبه جنيه و2 جنيه فى الكيلو الواحد
وفى نفس السياق أعرب ضوحه عربى صاحب محل دواجن بحى إمبابة عن استيائه لارتفاع الأسعار بالأسواق قائلا:" أنا طول النهار فاتح كده ومش ببيع .. سعر الدواجن فى ارتفاع .. ولسه هيزيد أكثر من كده .. الأسعار ارتفعت بعد ارتفاع سعر الدولار .. سعر كيلو الدواجن البيضة وصلت ل 20 جنيه والبلدى ب24 جنيه .
وأضاف محمد فوزى صاحب محل دواجن:" ارتفاع قيمة الدولار أثر على الدواجن بشكل قوى .. إحنا مش عارفين نبيع سعر كيلو الهياكل أكلة الغلابة وصلت إلى 8 جنيه مين هيشترى بالسعر ده الغلابة.. هتاكل أزاى."
وقال المعلم ممدوح شوقى صاحب محل علافه بمنطقه إمبابة:" سعر كيلو الزيت زاد جنيه من 9 ل 10 جنيه .. والأرز زاد جنيه و2 على الكيلو من 3جنيه ل 5جنيه ، والشاى زاد ، وحركه البيع قلت النصف تقريبا بسبب ارتفاع سعر الدولار".
وقال جرجس سمير صاحب محل علافه بإمبابة :" فى سلع مهمة كتير زاد سعرها زى الزيوت زادت 2جنيه على كل علبة كانت ب 8 و9 بقت ب 10 وفى أنواع 12 وبعد كده نزل جنيه زيادة على كل علبة .. والشاى زاد بمعدل جنيه على العلبة الربع كيلو وفى أنواع أخرى من الشاى زادت 2 جنيه على الربع كيلو ، والأرز زاد بمعدل 2 جنيه فى الكيلو ، فى بعض أصناف من التونة زاد سعرها نصف جنيه على العلبة .
وقال عبد الله صاحب محل فاكهة:"تقريبا كل أنواع الفاكهة زاد سعرها ، التفاح كان ب8 جنيه جملة دلوقتى ب 10جينه وسعر الرومان زاد من 5 جنيه ل 7 ونصف ".
وقال سيد عبد الله صاحب محل خضروات وفاكهة بحى الدقى :"ارتفاع سعر الدولار أثر ألى حد ما فى بعض أسعار الخضروات والفاكهة " ، وتابع : "التجار خائفين بسبب ارتفاع الأسعار المستمر واللى مش عارفين امتى هينتهى ".