أصدقاء عمرو دياب يساندونه فى معركته مع روتانا.. أيمن بهجت قمر: المصريون هيقاطعوا الشركة بسبب بيانها الرخيص ضد الهضبة..عمرو مصطفى: ستظل رقم1 رغم أنف الحاقدين.. تامر حسين يعلن "دياب خط أحمر لأن وراه شعب

حرص أكثر من فنان على دعم النجم الكبير عمرو دياب فى معركته مع شركة "روتانا"، وذلك عقب الأزمة التى نشبت بينهما وقيام "دياب" بفسخ تعاقده مع الشركة لعدم التزامها بالتعاقد، وهو ما جعلها ترد ببيان صحفى وأنها هى من بدأت بفسخ التعاقد وطالبته بدفع مليون دولار قيمة الشرط الجزائى.
**تعليق أيمن بهجت قمر
وكان الشاعر أيمن بهجت أول من دافع عن الهضبة عمرو دياب من خلال صفحته على موقع التواصل الاجتماعى "فيس بوك" قائلا: "أنت قيمة كبيرة يا عمرو ووجودك عندهم هو اللى خلاهم يستمروا لحد دلوقتى، وكونك أكبر مطرب مصرى، مصر كلها هتقاطع إنتاج روتانا وهتسمع سميرة على النت وسميرة وبس عشان كانت وحشانا".
وتابع "بهجت قمر" حديثه: "والله المفروض كل المطربين والمبدعين شعراء ملحنين موزعين مصريين يخدوا موقف بعد البيان الرخيص ده".
**عمرو مصطفى يوجه رسالة للهضبة..
عمرو مصطفى كتب عبر صفحته على "فيس بوك" قائلا: "حذرت أخى وصديقى عمرو دياب من شركات النكرة قبل سنين، واتخذت قرارا كان فى وقتها لا يجرؤ شخص يعمل فى مجال الموسيقى على اتخاذه وهو عدم التعامل مع أى شركة غير مصرية لسبب بسيط أنها تبيع جميع ألحان المصريين إلى دول أخرى بدون موافقة لا شاعر ولا ملحن".
وتابع مصطفى حديث: "الآن يكتشف صديقى ما حذرت منه أنها تدفن كل ما هو مصرى..ورسالتى إلى عمرو دياب ستظل رقم واحد رغم أنف الحاقدين والهواه".
تامر حسين يؤكد: عمرو دياب خط أحمر
الشاعر تامر حسين علق على الأزمة فى عدة نقاط كان أهمها: "عمرو دياب بقى رمز مصرى مٌشرف باجتهاده 25 سنة وكمية أغانى هيتس لا حصر لها ابتداء من "شوقنا" و"ميال" إلى "الليلة" و"جماله" تروح فرح أو حفله تسمع كمية أغانى جامدة ورا بعض ع التوالى تبقى بتضرب كف على كف أن الراجل ده عنده كمية الأغانى الجامدة دى اللى ما بيلحقش يغنيها كلها أساساً وده بمشاركه أجيال مختلفة من أكبر الشعراء والملحنين وموزعين فى الوطن العربى ومصريين بالمناسبة يعنى الراجل ده إضافة لأى مكان أو كيان يروحه بيعليه ويعمل قيمة فنية باسم وتاريخ عمرو دياب وأعتقد ده فاد الشركة المنتجة كتير جداً فى خلال ال 10 سنوات اللى فاتوا مع احترامى لكل مطربينها فوق راسى".
وتابع حسين عبر صفحته على مواقع التواصل الاجتماعى "فيس بوك قائلا: "عمرو دياب اللى أنا أعرفه وكلنا نعرفه بيسيب مش بيتساب بالعقل والمنطق مين حاسيب مين ممكن طفل صغير يجاوب ع السؤال ده".
وأضاف: "فكرة أنه راجل فنان (مصرى) ورمز دى (خط أحمر ) طالما الراجل ملتزم ولا يٌخل بالتزاماته الشركات المحترمه هى اللى بتقدر النوع ده من النجوم وتواكب أحلامهم وطموحاتهم وتنقلهم فى مكانه أعلى لأنهم مع فنان عالمى ولغة الحوار والخطاب لازم تبقى على قدر وعيهم باسم مصر وان مصر دى الريادة اللى كانوا ومازالوا كل النجوم الوطن العربى بيتشهروا فيها إلى جانب أسم وتاريخ عمرو دياب".
وأختتم حديثه قائلا: "عمرو دياب وراه شعب مش جمهور..والموضوع يحكم فيه القضاء".