نشطاء يدشنون "قواعد تويتر الأربعون".."الشتيمة بأصول مش فرد عضلات".. و"متكونش مزدوج الشخصية".. و"الفولو مش عقد جواز".. و"الكلام اللى مايعجبش عديه أنت مش هتربى الناس".. و"لا تسرق تويتة فقد يكشفك صاحبها"

حاول مستخدمو موقع التواصل الاجتماعى "تويتر" استحداث حالة جديدة من المرح عبر حساباتهم الشخصية ومع بعضهم البعض لكسر حالة الملل والخروج عن المألوف من خلال تدشين ما يسمى "قواعد تويتر الأربعون"، ليكون هاشتاجًا جديدًا يضعون من خلاله القواعد التى يرونها من وجهة نظرهم المناسبة لاستخدام موقع التدوين الصغير.
وحمل "الهاشتاج" عددًا كبيرًا من التغريدات الساخرة التى شارك فيها النشطاء ومن أبرزها:" الكلام اللى مايعجبش عديه، أنت مش داخل هنا تربى الناس، ولا أنت ملكت الحقيقة والصح والغلط عشان تحاكم حد".
وأضاف آخر "شوف الناس كلها على توتير بتتكلم عن إيه، أو متعاطفة مع إيه أو بتتفرج على إيه وبعدين اتريق واشتم واهرى فى عكس الحاجات ديه".
كانت القاعدة الأخرى هى" لما يكونوا ناس بيتناقشوا وأنت متعرفهمش مترشقش فى المنشن عشان عيب.. ولو صحابك حتى.. إذا كان كلامك مش هيضيف جديد بلاش أحسن".
وتابعت أخرى قائلة: "الفولو مش عقد جواز والإنفولو مش آخر العالم.. إحنا فى عالم افتراضى ماتخدهاش على صدرك".
كانت من أهم القواعد التى دشنها النشطاء هى التحذير من السرقة فقال أحدهم: "لا تسرق تويتة، فربما صاحبها الأصلى يكشفك، ويبقى شكلك...".
وقال آخر: "تويتر لازم يعكس شخصيتك الحقيقة.. متكونش مزدوج الشخصية.. والشتيمة بأصول مش فرد عضلات".
وأضافت أخرى: "خليك تلقائى وطبيعى عشان الناس تحبك وتتفاعل معاك.. التكلف والتصنع وادعاء المثالية والطيبة بيتكشفوا على طول فى تويتر".
وعلق آخر: "جدد فى تغريداتك وبلاش تكون نمطى وممل.. أنت إنسان عنده مشاعر مش ماكينة تويتات.. نوع فى موضوعاتك واهتماماتك ومشاركاتك.. محدش هنا يعرف عن التانى حاجة.. والقاعدة الأهم ماتعملش فولو لقرايبك".
وجاءت قاعدة أخرى تؤكد: "تويتر ليس موقعًا للتعارف الشخصى بل هو للتعارف الفكرى.. فإذا رأيت فتاة تتابعك فهى تتابع أفكارك وليس شخصك فأحسن الظن".
أخبار متعلقة:
نشطاء مسيحيون يدشنون أول تطبيق "قبطى" على تويتر لنشر التغريدات