بالصور.. توقف "الواتس آب" يشعل السخرية على مواقع التواصل الاجتماعى.. نشطاء يتهمون "مارك زوكربيرج" بالفشل فى إدارة التطبيق.. ويمزحون: "دى آخرة اللى يشترى مستعمل.. وجزات اللى يشترى حاجة مقلبش فيها"

شن نشطاء موقع التواصل الاجتماعى "فيسبوك وتويتر" حملة من اللوم على مارك زوكربيرج، مؤسس شركة فيسبوك، بسبب ما أصاب تطبيق "الواتس آب" من أعطال عقب شراء زوكربيرج له بيومين أدت إلى توقفه لعدة ساعات، معربين عن غضبهم الشديد لتوقف الخدمة بالتطبيق الذى يعد الأشهر عالميا، مطالبين من مارك المالك الجديد عودة الخدمة فى أسرع وقت.
وتبادل النشطاء عددا من الصور المضحكة ساخرين من أنباء توقف "الواتس آب"، كما أكدوا ساخرين أن مارك لم يستطع إدارة التطبيق، الأمر الذى أدى إلى توقف الخدمة فى عدد من الدول حول العالم، كما علقوا قائلين: "دفعت مليارات علشان توقع الواتس اب يا فاشل؟"، "اللى معاه قرش محيره يشترى الواتس آب ويبوظه شاطر يا مارك"، "مارك الفالح بوظ الواتس آب فى يومين بس فعلا رقم قياسى المفروض يتسجل فى موسوعة جينيس".
واستخدم النشطاء بعض الإفيهات المتداولة بالأسواق على الطريقة المصرية للسخرية من زوكربيرج، متبادلين العبارات المضحكة، قائلين: "بتوع الواتس آب نصبوا عليك يا مارك"، "دى أخرت اللى يشترى مستعمل يا معلم"، "بتلعب فى الواتس آب ليه وأنت مبتفهمش فيه"، "أدى جزات اللى يشترى حاجة مقلبش فيها يا باشا تعيش وتشرب يا مارك".
بينما وجه آخرون رسائل تهديد ساخرة لإجبار مارك على إعادة الخدمة من جديد، قائلين: "إحنا بنهددك يا مارك لو مرجعتش الواتس آب هيكون فى تفجيرات وتطبيقات مفخخة"، "رجع الواتس آب وبلاش تلعب فيه تانى يا مارك لحسن مش هيحصل كويس أدينى قولت".
فيما أعرب النشطاء عن حزنهم لتوقف الخدمة بالتطبيق، قائلين "ما تعرف قيمة الشىء الا لما تفقده واتس آب يارب يشتغل بقى"، "الليل طويل أوى من غير الواتس اب كان بيوفر عليا دقايق الموبايل".
وعقب عودة الخدمة سادت حالة من السعادة بين النشطاء، قائلين: "بعد ما تطمنت عليكم وأن الواتس آب اشتغل أقدر أنام وأنا مرتاح"، "خلاص حليت مشكلة الواتس آب ورجعته لكم مع تحياتى مارك"، "مبرووك يا رجالة الواتس آب اشتغل تانى والله وعملوها الرجالة"، "رجعت الحياة من جديد لبرنامج واتس آب".
يذكر أن شركة "فيس بوك" استحوذت على تطبيق "واتس آب" للتراسل الفورى، بصفقة بلغت 16 مليار دولار أمريكى، مقسمة بين مبلغ يدفع نقدًا، وبين أسهم فى شركة "فيس بوك"، بحيث تدفع الشبكة الاجتماعية 12 مليار دولار أمريكى كأسهم نظير الاستحواذ، فيما ستدفع 4 مليارات دولار نقدًا.