سوسن بدر تكشف موقفا غريبا مع عادل إمام في "أحلام الفتى الطائر" (فيديو)

قالت الفنانة سوسن بدر:"قبل التحاقي بالمعهد العالي للفنون المسرحية حضرت يوما واحدا في كلية العلوم بعد حصولي علي الثانوية العامة".

رغبة سوسن بدر بعد الثانوية
وتابعت خلال الجزء الثاني من لقائها ببرنامج "معكم" الذي تقدمه الإعلامية منى الشاذلي بقناة "سي بي سي":"ابويا قال لي خدي ثانوية عامة وهاتي مجموع محترم وبعدين نبقى نشوف هنعمل إيه في الكلية، وبعدين قال لي يلا نخش كلية علوم فقلت له يا أبويا مبحبش علوم ومش أنت قلت لي هاتي مجموع وادخلي اللى انتي عايزاه، فقاللي خلصى كلية العلوم وبعدين ادخلي معهد فنون مسرحية فقلت له ماشي لإني مكنتش عايزة ازعله، فروحت الكلية مقدرتش وحسيت إني غريبة في المكان ده، في حين لما دخلت المعهد حسيت إني انتمي للمكان ده وجزء منه ومحستش بغربة فيه".

عادل امام وسوسن بدر من مسلسل احلام الفتى الطائر
أول دور تمثيلي لسوسن بدر
ولفتت:"أول دور مثلته بعد دخول معهد فنون مسرحية، كان أحلام الفتى الطائر مع الزعيم عادل إمام، وأول دور سينمائي ليا كان في فيلم "حبيبي نائما".
كواليس مسلسل أحلام الفتى الطائر
وتابعت:"المخرج محمد فاضل كان طالب بنات في أحلام الفتي الطائر، فترشحت لتمثيل بنت بطلة ل3 حلقات، وده كان أول دور ليا في الدراما، وكنت لسه في سنة أولى معهد فنون مسرحية، ولما عملت اختبار وافقوا علي شكلي، وكانت أول مرة وحيد حامد يكتب للتليفزيون، ومحمد فاضل سألني قال لي بتعرفي تسوقي عربيات فقلت لو عرفته الحقيقة هيشيلني من الدور
فقلت له بعرف أسوق وأنا عمري في حياتي ما ركبت عربية وكان كبيري أتوبيس، ومضيت واخدت عربون ويوم التصوير 6 صباحا في الطريق الصحراوي المفروض إني سايقة العربية وبيركب معايا عادل إمام وعمر الحريري وهما هربانين

العجلة بتفرقع وبيصلحوا العربية وبعدين بنكمل وقالولي يلا يا اَنسة اطلعي اركبي العربية فطلعت وعادل إمام قاعد جنبي وعمر الحريري راكب وراء، فانفجرت في موجة بكاء هستيريا بكاء، لأني مش بعرف اسوق عربيات وبقيت في ورطة، يقولوا لي يلا يا أستاذة سوقي وأنا أعيط وقتها".
سوسن بدر تروي قصة مشاركتها في عروض الأزياء، ودور رجاء الجداوي (فيديو)
سوسن بدر تكشف سبب اعتذارها عن مسرحية الواد سيد الشغال (فيديو)
موقف طريف لعادل إمام مع سوسن بدر
وأشارت:" عادل إمام وقتها فهم اني مبعرفش أسوق عربيات فقال لي يا نهار أسود انتى مبتعرفيش تسوقي فقلت مبعرفش أسوق والنبي متقولش لهم علشان هيمشوني،
فقاللي أقولهم إيه انتى لازم تسوقي بينا، فنزل من العربية وقالهم الاَنسة مبتعرفش تسوق،

مدير التصوير محسن نصر صعبت عليه جدا قال هاتولي كاب وجاكيت وراحوا ملبسينه جاكيت وكاب ومن بعيد خدوا العربية وهو راح مفرمل وخدوا المشهد وبعد كده أنا كملت الدور والتصوير، وعادل إمام قد ما كان قلقان بس صعبت عليه وقال لي انتي كويسة يا آنسة ".