عبد الباسط حمودة: أنا من جيل السبعينيات.. وأغني من 40 سنة

أعلن المطرب الشعبي عبد الباسط حمودة، تأييده قرار الفنان هاني شاكر نقيب المهن الموسيقية، بمنع مطربي المهرجانات من الغناء داخل مصر.
طارق الشناوي: مش من اختصاص الموسيقيين منع مطربي المهرجانات من الغناء | فيديو
أبرزهم حمو بيكا وشاكوش وكزبرة.. "الموسيقيين" تعلن أسماء الممنوعين من الغناء
منع مطربي المهرجانات من الغناء
وأضاف خلال لقائه ببرنامج "الحكاية" الذي يقدمه الإعلامي عمرو أديب بقناة "إم بي سي مصر": "هاني شاكر عنده حق، ومغلطش لما منع مطربي المهرجانات من الغناء".

دعم هاني شاكر
وتابع: "هاني شاكر بيقول اللي بيغني حلو هينجح واللي مبيغنيش هيعمل له إيه، لازم يبقى فيه كارنيه وترخيص، وأنا من جيل السبعينيات اللي كان فيه تدقيق من المصنفات الفنية وكان بيتشطب لي كلمات، أغني بقالي 40 سنة، ومقدر اللي عمله هاني شاكر لأنه مش عايز لفظ خارج، وهو فنان وله قيمة وقامة ومش هنلومه في حاجة، وهو ممنعش حد ياكل عيش ولكن نقول الحاجة الحلوة".

هاني شاكر يمنح مطربي المهرجانات فرصة جديدة بشرط
ساويرس مهاجما هاني شاكر: مبيعجبنيش صوته.. ويمارس إرهاب ضد مطربي المهرجانات
الممنوعون من الغناء
وكانت نقابة الموسيقيين أعلنت أسماء المطربين الشعبيين الممنوعين من الغناء بسبب عدم وجود تصريح بالعمل لديهم داخل مصر.
وضمت القائمة: "حمو بيكا، وحسن شاكوش، وكزبرة وحنجرة، ومصطفي زكريا الشهير بمسلم، وأبو ليلة، وأحمد قاسم الشهير ب فيلو، وأحمد موزة، وحمو طيخة، وريشا كوستا وسمارة، وشواحة، وولاد سليم، والعصابة، والزعيم، وعلاء فيفتى، وفرقة الكعب العالي، ومجدي شطة، وشكل، وعمرو حاحا".

هجوم ساويرس على هاني شاكر
وهاجم المهندس نجيب ساويرس، رجل الأعمال، الفنان هاني شاكر نقيب المهن الموسيقية، بسبب قرار منع مطربي المهرجانات من الغناء.
الذوق الغنائي
وقال "ساويرس" خلال مداخلة هاتفية ببرنامج "الحكاية" الذي يقدمه الإعلامي عمرو أديب بقناة "mbc مصر": "كل واحد وذوقه محدش هيعمل ولي علينا، وأنا بحب أسمع الغناء الشعبي ولون المهرجانات".

استضافة مطربي المهرجانات بالجونة
وعن تصريحاته حول استضافة المطربين الممنوعين من الغناء في مهرجان الجونة، أكد "ساويرس": "أنا مبقولش حاجة مبعملهاش ولو عايز أجيبهم مهرجان الجونة هجيبهم".

دور نقيب الموسيقيين الحقيقي
وأضاف: "موضوع منع مطربي المهرجانات من الغناء فيه نفسنة وغيرة.. إحنا نسمع اللي إحنا عايزينه، محدش يتدارى في سلطة أنه يكون قائمًا على أذواقنا، نقيب الموسيقيين شغلته يعالج الأعضاء المرضى ويقف معاهم ويدعمهم ويصرف لهم المعاشات وييسر لهم أمورهم، إنما هو مش من سلطاته القيام بالمصنفات الفنية، هناك رقيب على المصنفات الفنية وهو مش رقيب على المصنفات".

دعم ساويرس لمطربي المهرجانات
وتابع: "مش دور نقيب الموسيقيين يقولنا نسمع إيه ومنسمعش إيه، الفن غير العلم، هو نفسه مين اداله القرار أنه يمنع مطربي المهرجانات.. أنا أصلا مبيعجبنيش غناء نقيب الموسيقيين، القانون لو أعطاه الحق يمنع المغنيين يبقى غلط، أنا بحب حسن شاكوش وويجز وحمو بيكا وبسمعهم، اللي متضايق من الغناء ده يقفل الراديو والتليفزيون والتليفون، زي اللي مش بيحب الأكشن ميشوفهاش، عاملهم إرهاب إنهم لو غنوا هيمنعهم وده مينفعش".

قطع الأرزاق
وأكمل: "هو فيه حد يقدر يحمي عياله وميسمّعهمش أغاني المهرجانات، هو مش ربنا عشان يحددلنا نسمع إيه ومنسمعش إيه، واللى خايف على عياله يقفل النت.. قطع الأرزاق ربنا مبيسامحش فيه، وبنقوله استهدى بالله وخلي الناس تأكل عيش وتشتغل.. أنا بتدخل علشان أنا بحب اللون ده وعايزهم يأكلوا عيش، وربنا يبارك لهم في فلوسهم".