أحمد كامل يطرح أغنية "على عيني" عبر "يوتيوب" | فيديو

طرح الفنان الشاب أحمد كامل منذ قليل أغنيته الجديدة التي تحمل عنوان "على عيني"، عبر موقع الفيديوهات الشهير "يوتيوب".

وتقول كلمات أغنية "على عيني": "أنا كداب.. أنا ما نستش فضلت أستنى واتاري حكايتنا اللي ما استنتش ومهما بغني لغيابك وللنسيان رجوعك غنوة لسه في قلبي ما تغنتش أشوفك فين.. وحشتيني غيابك مش وجع هيروح.. ده شوك ماشي في شراييني بقيت ما أكرهش سيرة الموت عشان أنا مت فعلًا

لما نسيتيني على عيني اشوفك جاية قدامي وابص بعيد على عيني تفوت بينا الليالي وتنتهي المواعيد على عيني اقول للناس.. حكاية وانتهت وخلاص وانا ف سري بحبك تاني كل ما اقول هحب جديد تعبت خلاص من التمثيل أنا لا بخير ولا قلبي بقى عايش ومش بيميل بتوّه نفسي ف الدنيا والاقيني بقول الصبح انا كويس.. واموت بالليل طلعتي لسة ويايا وما نستكيش ولا هنسى.. ولا وجعي ده ليه نهاية فرحت إني بقيت مابكيش قصاد الناس واتاري دموعي نزلت مني جوايا".
حالة نفسية سيئة
وفي وقت سابق، أعلن المطرب أحمد كامل أنه يمر بحالة نفسية سيئة، خاصة في ظل ظروف كورونا، حتى إنه وصل لمرحلة الاكتئاب.

وكتب أحمد كامل، عبر خاصية "الإستوري" بحسابه على "إنستجرام": "بقالي فترة طويلة جدًّا مليش نفس أغني، وبعمل أغاني بسمعها لوحدي، حالة عمري ما وصلت لها، ومفيش بني آدم واخد باله من اللي أنا فيه، شبه مكتئب، بس من ناحية كام حاجة، وبقيت بحس إن الأغاني شغل وبس، وبدأت أفقد الشغف تجاه الشيء الوحيد اللي حبيته من كل قلبي، ومستنتش منه يحبني، بس هو حبني وبعتكم ليا".

أحمد كامل يستعد لطرح أحدث أغانيه "على عيني".. اليوم
ابنة المطرب أحمد كامل تتعرض لوعكة صحية وتدخل المستشفى

وتابع: "كل اللي عايز أقوله من الكلمتين دول، إن الفترة دي خلصت، ورجعت زي ما أنا وأحسن، أحمد كامل رجع أقوى 100 مرة، مختلف تماما، والفترة دي مع قعدتي في البيت علشان الكورونا؛ علمتني اللي الدنيا كانت هتعلمهولي في 10 سنين قدام، جوايا غضب والله العظيم عمره ما كان جوايا، غضب إيجابي تجاه كل حاجة، مخليني عايز أكسر الدنيا بحالها، وأقول للكون كله، ده أنا، اللهم لك الحمد والشكر على أي نعمة رزقتني بيها، ويارب يا كريم في اللي جاي، اجهزوا".

حفل زفاف أحمد كامل
يشار إلى أن المطرب أحمد كامل احتفل بزواجه من نسمة الحرايري مؤخرًا، بحفل زفاف كبير في نادي الشرطة بحضور مجموعة من نجوم الفن والرياضة.

وحرص العديد من نجوم الساحة الفنية على مشاركة كامل فرحته، منهم الفنان محمود العسيلي ونجم الأغنية الشعبية محمود الليثي والمطرب تامر عاشور، بجانب الفنان شيكو والمنتج محمد محسن جابر والمخرج حسام الحسيني والمنتج مصطفى السويفي مع نجوم الكرة المصرية أمير مرتضى منصور ومحمد أبو جبل ومحمد صبحي ومصطفى محمد ومحمد عبد السلام.

كما شارك في الحفل كل من زاب ثروت وأدهم سليمان وأسامة الهادي وصلاح بيجاتو وعبد الرحمن رشدي ومعتز ماضي وأحمد نهاد، والملحن إيهاب عبد الواحد والموزع أحمد طارق يحيى والموزع نابلسي إضافة إلى رموز السوشيال ميديا مثل خالد مختار وعمرو راضي وعلي غزلان وحسام أنتيكا.