أحمد موسى: أيادي خفية تحرك والدة خالد سعيد.. واللعب في «ملف ريجيني» خطر

علّق الإعلامي أحمد موسى، مساء الأحد، على رسالة والدة الشهيد خالد سعيد، لوالدة الشاب الإيطالي القتيل جوليو ريجيني، والتي نشرتها الناشطة السياسية الدكتورة سالي توما، عبر حسابها بموقع «فيسبوك»، أمس السبت، وقالت خلالها: «بعزي أم الشهيد ريجيني، وبقولها حاسة بيكي وبآلامك، زيّ ما أنا لغاية النهاردة بتعذب علشان خالد، وأنا بشكرك جدًا علشان بتهتمي بقضايا التعذيب في مصر، كملي مشوار ابنك، وربنا يقدّرك عليهم يا رب، والله ما عارفة أقولك إيه لأن اللي أنا حاسة به صعب أوصفه، ربنا يصبرك ويصبرنّا ويصبر كل أم شهيد».
فيديو| والدة خالد سعيد ل«أم ريجيني»: «حاسة بآلامك وربنا يقدّرك عليهم»
قال موسى، خلال تقديمه برنامج «على مسئوليتي»، عبر فضائية «صدى البلد»، «أم خالد سعيد خلاص أخدت قرار إن ريجيني مات بسبب التعذيب، سابت النيابة العامة والتحقيقات وقررت إنها تقول كده وتبعت رسالة لأم ريجيني، وأنا بأؤكد أن الموضوع مش جاي من فارغ، وهي مش طالعة من دماغها تقول الكلام ده، هي يعني تعرف أم ريجيني؟ كانوا مع بعض في المدرسة؟ لا، في حد بيحركها».
أضاف: «أرجو يا جماعة إننا نخاف على بلدنا، ولازم نعرف مين اللي بيحرك الناس دي، وأنا معنديش معلومة، لكن في أيادي خفية هي المحركة، هذا الكلام خطر، خطورة مش على البلد وبس دي خطورة علينا كلنا، اللعب في الملف ده بدون دليل خطر، ومحدش عنده معلومات غير الأجهزة الأمنية فقط، وأي حد غير كده يبقى كذاب، ومفيش دليل واحد أن الداخلية قتلت ريجيني، وهي يعني الدولة هتخبي ليه؟».
معتز عبد الفتاح: «والدة خالد سعيد بتقول لأم ريجيني ربنا يقدّرك عليهم.. ربنا يقدّرها على مين؟»