خلّي بالك من محفظتك.. تعمل إيه علشان محدش ينشلك فى الأتوبيس؟

لو شفت حرامي ابعد عنه و«صوّت».. وشيل الموبايل في جيب الجاكت الداخلي
«خلّى بالك من محفظتك...النشال عينه عليها...هتلاقيه جنبك وبيتربصلك، هتسمعه يقول للناس فى زحمة المترو والأتوبيسات..على جنب يا بيه ...وسع شوية يا أستاذ..الدنيا زحمة واحنا مخنوقين لوحدنا...مش عايزين نزعل حد »...
«التحرير» تواصل تسليط الضوء، على المشكلات المزمنة، التى ربما يتعرض لها كثير منا فى حياتنا اليومية، نجيب، اليوم، على سؤال عن كيفية تجنب التعرض للسرقة ؟
اللواء محمود قطرى، المحلل الأمنى، بدأ حديثه موضحاً أنه يجب على كل مواطن أن يحافظ على متعلقاته فى الشارع وأثناء استقلاله للمواصلات العامة وأن يحفظ نقوده بعيداً عن متناول "النشال".

خلّى بالك من «المقفلاتى»..ومتحطش فلوس فى جيب القميص
ويقع المواطن فى خطأ فادح يومياً وفقاً ل " قطرى" بوضع نقوده فى جيب قميصه، إلا أنه من الأفضل وضعها فى جيب البنطلون، وشرح اللواء قطرى، أشهر طريق نشل فى المواصلات، يكون منفذيها شخصين اثنين، الأول يقوم ب" التزنيق" و "التقفيل" على الضحية بعد رصدها، ويسمى ب" المقفلاتى"، والثانى يتولى مهام نشل الضخية ويسمى ب" النشال".

اطمئن كل شوية على فلوسك
ونصح الخبير الأمنى المواطنين بتوخى الحذر فى حالة ملاحظته لأحد الأشخاص يقوم ب«التزنيق» عليه، ويعرف جيداً فى هذا التوقيت أنه سيتعرض لجريمة نشل، مشدداً على ضرورة إتباع المواطنين لسلوك يومى فى المواصلات العامة، بالتأكد من فترة لأخرى من وجود محفظته ونقوده معه ويطمأن على وجودها فى المكان الذى وضعها به، وعند ارتداء جاكيت فى فصل الشتاء يفضل غلقه وعدم وضع النقود فى جيبه الخارجى، حفاظاً عليها من النشل.

غير مكان وضع المحفظة ...النشال عارف بتحطها فين
ولفت «قطرى» فى حديثه ل «التحرير» إلى أنه ومن الدارج عند جموع المواطنين أن يمسك بمحفظته بيده اليمنى ويضعها فى جيب الجاكيت الداخلى الأيسر، وهو ما فطن إليه «النشال» وحفظ تلك الطريقة، بالتالى يكون على علم مسبق بمكان تواجد المحفظة، لذا على المواطن أن يغير من وضعية مكان الإحتفاظ بمحفظته، بوضعها فى جيب الجاكت الداخلى من الناحية اليمنى.

شيل موبايلك فى جيب الجاكت الداخلى ..والسيدات: ابعدى فلوسك عن حقيبة اليد
وبالنسبة لموبايلك حافظ عليه..إوعى تحطه فى جيب الجاكت من بره..حطه فى الجيب الداخلى للجاكت حتي لا يسهل نشله، هكذا يبين اللواء "قطرى" مضيفاً أن السيدات يفضل لهن وضع متعلقاتهن فى حقيبة اليد سواء كانت نقود أو غيرها، وهذا غير صحيح، لافتاً إلى ضرورة عمل جيب داخلى فى البنطلون أو فى الجاكت أو «البادى» ووضع النقود فيه، لأنها تكون سهلة السرقة حال وضعها فى حقيبة اليد، والاكتفاء بوضع أدوات المكياج فقط وغيرها فى حقيبة اليد.
لو شفت نشال..ابعد عنه شوية وزعق...ولازم اثنين يشهدوا عليه
وعند مشاهدتك ل «نشال» فى الأتوبيس، أفاد اللواء محمود قطرى :ابعد عنه شوية ..وزعق من بعيد ..ومتحاولش تقرب منه وانت بتزعق..عشان لو معاه سلاح هيطعنك» حتى يتم التغلب عليه واصطياده، وفى حالة الإمساك بالنشال ينبغى على اثنين من المواطنين الحاضرين، أن يتطوعا للشهادة عليه، واصطحابه لقسم الشرطة، حتى لا تفسد القضية.
واختتم قطري: «النشال» مش هيتحبس غير لما يكون فى شهود على جريمته.