بالفيديو.. محمود معروف : مرتضى نازل الرئاسة بتكليف من المخابرات .. وتاريخي أكبر من الزمالك

يؤكد أنه تعرض لمؤامرة أخرجته من سباق انتخابات مجلس ادارة الزمالك، ويحدثنا عن فرص مرتضى منصور فى النهوض بالزمالك، ورأيه فى ترشحه لرئاسة الجمهورية.. صواريخ معروف فى حوار لا تنقصه الجرأة والصراحة تابعوه فى السطور التاليه:
■ بداية .. لماذا اختفيت عن الظهور فى الاعلام مؤخرا ؟
ليس اختفاء، انا أخذت فترة هدنة والحمد لله انا اول من ظهر فى برامج التوك شو فى القناة الثالثة وفى راديو وتليفزيون العرب وmbc منذ عام93 وانا حاليا فى فترة العودة من بعد الهدنة وعودة النشاط ومفيش اختفاء ولا حاجة.
■ هل فترة الهدنة لها علاقة بانتخابات الزمالك ؟
لا ليس لها اى علاقة خالص وانا لم اضع الانتخابات فى حساباتى ولا عملت اى دعاية ولا صورة ولا منشور لدرجة ان الناس اتفاجئت انى مرشح فى الانتخابات وحصلت على 5500 صوت من الاعضاء من غير اى دعاية ولا حاجة انا هقولك مفاجأة انا اصلا المهندس خالد عبد العزيز وزير الرياضة وكل الناس الذين يحبونى والكابتن طاهر ابوزيد واحمد شرين طلبوا منى الا اترشح واسحب اوراقى وكنت رايح فعلا اتراجع، لكن الحمد لله على كل شىء.
■ ما تفسيرك لعدم نجاحك ضمن قائمه مرتضى منصور ؟
بصراحة مش عارف اقول ايه انا اكتشفت فجأة ان الناس بتشخبط على اسمى فى القائمة كان فى خيانة ولعبة قذرة وبالعكس انا الزمالك لم يضف لى انا اللى كنت هاضيف للزمالك والمجلس الجديد لو اجتمع مكنش هيعمل 1% من اللى انا كنت هاعمله هما اللى كانوا هيستفادوا منى مش انا اللى هاستفاد من القائمة والنادى.
■ ما نصائح وزيرى الرياضة طاهر ابوزيد وخالد عبد العزيز لانسحابك من الانتخابات ؟
طاهر ابوزيد قالى ماتدخلش وخلاص اما المهندس خالد فقالى اسحب اوراقك ولما ضحكت معه وقلتله خايف اخسر ال5 آلاف جنيه فلوس الترشح فقالى متقلقش هارجعوهم ليك الموضوع مكنش فلوس بس هى غلطة، انا لغاية دلوقتي بسأل نفسى انا دخلت ليه، ازاى اضيع تاريخ محمود معروف وانزل لهذا المستوى دى المأساة مش مسألة انجح انا اكبر من الزمالك واكبر من اى حاجة رياضية فى مصر وعلى الاقل بداخلى، اللى مزعلنى اهين نفسى ليه انا عضو مجلس شعب بأعلى اصوات ورئيس لجنة الثقافة والاعلام فى مجلس الشعب هو فى احلى من كده منصب وعضو نقابة الافرآوسيوية للاعلام وعضو نقابة الصحفيين ونقابتنا بمائة ناد فى مصر، فعلا هى غلطة.
■ هل تتوقع نجاح مجلس مرتضى واستمراره حتى نهاية فترته بعد اربع سنوات؟
لا يعنينى بأى شىء ينجح او يفشل ولا اشغل بالى به.
■ ما هو تفسيرك للمؤامرة التى تعرضت لها فى الانتخابات ؟
هناك شخص ما حس انى هاخد منه الجو فتآمروا عليا.
■ هل تأسف لخسارتك الأولى فى انتخابات الزمالك بعد ترشح ثلاث مرات ؟
لا لم آسف لذلك، الجو فى النادى أصلا لم يعد كالسابق، الناس اللى بتقدر تاريخ من خدمهم مش موجودين، انا نزلت ثلاث مرات نجحت بفضل الله فى دورتين الاولى مع المستشار جلال ابراهيم والثانية مع الدكتور كمال درويش لما حصل تزوير تم استبعاد اثنين ودخل مرتضى وقتها معانا فى المجلس.
■ ما شعورك بعد الخسارة الاولى فى انتخابات الزمالك ؟
حاسس ان ربنا كرمنى لانى مكنتش هارتح وكنت هاضيع وقتى اللى بستثمروا دلوقتى فى كتابة الكتب لو كنت دخلت الزمالك.
■ لماذ اخترت قائمة المستشار مرتضى منصور ؟
الحقيقة انا لم اختار او كان لدى نية فى الدخول فى الانتخابات انا فوجئت باتصال بعد صلاة الجمعة مرتضى بيتصل بيا وبيكلمنى أدخل، وقال لى نتقابل عندى فى منزلى بالليل ونتكلم روحت له فوجئت بناس زملكاوية بحبهم جدا واثروا عليا ودخلت.
■ بعيدا عن الانتخابات، وبصفتك زملكاوى وناقد كبير .. ما هو تقيمك لتجربة احمد حسام ميدو مع الزمالك؟
ناجحة جدا واوافق عليها تماما، ميدو لعب فى 7 اندية اوروبية كبرى واتعلم وبيتحدث 4 لغات ومتعلم تعليم كامل واتمرن مع 11 مدربا ولو اتعلم من كل واحد جزئية واحدة هيبقى احسن مدرب فى مصر، فقط يتبقى له بعض الحظ، اى مدرب محتاج الحظ وارجع بالذاكرة ان عم الشوى فى الترسانة لا يعرف يقرأ ولا يكتب ونجح انه يكسب الاهلى رايح جاى مرة فى الكأس 4 /صفر وفى الدورى بعدها باسبوع فاز 5/1 وطلعت نكته عاوز تليفون الاهلى 4051 هى مسألة بخت شديد.
■ كيف ترى حصول الزمالك على بطولة افريقيا بعد خروج الاهلى ؟
دايما الاتحاد الافريقى يوقع الزمالك مع الاهلى والترجى مع الصفاقسى علشان يخلصوا على بعض ودايما الاهلى بياخد من الزمالك 4 نقاط سواء فوز او تعادل، خروج الاهلى افسح المجال امام الزمالك واذا لم يحصل عليها هذا الموسم ان شاء الله عمره ما ياخدها ابدا فى بداية الالفية الزمالك كان بطل افريقيا ب5 بطولات والاهلى بطولتين من ساعتها وقف الزمالك والاهلى فضل يزيد لحد ما وصل الى 8 بطولات، فى ماتشات الاهلى كسبها بالحظ خصوصا فى افريقيا، وبشوية حظ الزمالك سيفوز بالبطولة.
■ ما هو رأيك فى تجربة محمد يوسف مع الاهلى ؟
مدرب محظوظ جدا بدليل لما نجح مجلس المهندس محمود طاهر وقبل مباراة اهلى بنغازى، قدم استقالته، لكنهم جددوا فيه الثقة ورفضوا رحيله حتى بعد الخسارة، نتائج الاهلى فى الدورى خداعه والفوز على المقاصة والرجاء ليس مقياساً.
■ كيف تقيم اداء يوسف مع الاهلى ؟
عادى، لانه هو المدرب اللى خسر من الداخلية رايح جاي، هل الداخلية احسن من الصفاقسى التونسى هل احسن من اى ناد فى افريقيا هو مدرب محظوظ ونيته كويسه وربنا كرمه.
■ هل كنت تتوقع نجاح قائمة محمود طاهر فى انتخابات الاهلى ؟
نعم كنت اتوقع نجاحها باكتساح كما حدث، لان اعضاء الجمعية العمومية للاهلى كانت ساخطة على مجلس حسن حمدى وبعدين الشكوك اللى كانت حوله وخروجه بكفالة 2 مليون جنيه فى فى قضيه فساد الاهرام لكنه رئيس الاهلى ودخوله سجن طرة قبل الانتخابات بأسبوع وخروجه بكفالة وهو مازال فى منصب رئيس النادى أساءت للنادى، والناس ضجت وفاض بها الكيل، ثانيا الاعضاء كرهت فى ابراهيم المعلم التوريث بداية من صالح سليم ورث حسن حمدى وكان حسن يرغب فى توريث المعلم ومن بعده الخطيب، ثالثا اولاد الراحل صالح سليم وزوجته اصدروا بيان لمساندة طاهر، رابعا ابراهيم المعلم كان متعالياً وهو صاحب الجريدة اليومية الداعمة للاخوان وكان شريكاً لاحدى القنوات التى كانت تهاجم الدولة بخلاف انه الناشر لبعض قيادات الاخوان واصدار كتاب القرضاوى.
■ البعض يرى انك تتعمد مهاجمة الاهلى والدخول فى عداوة مع الجماهير؟
نفس الكلام بيقولوا عليا جماهير الزمالك انى بهاجم النادى رغم انى زملكاوى انا بحب محمود معروف اكثر من الاهلى والزمالك ولو اى ناد كسب بطلعه سابع سما ولو انهزم بنزله سابع ارض طول ما انت نظيف ومحدش ماسك عليك حاجة اكتب ما يحلو بك.
■ لماذا هاجمت البرتغالى جوزيه طوال فترة تدريبه للاهلى ؟
جوزيه مدرب محظوظ جدا بدليل انه عاطل حاليا بلا عمل راح اتحاد جدة ولعب 8 مباريات اتعادل فيهم وده محصلش فى التاريخ وراح انجولا مع فلافيو وجلبرتو وفشل، وفى الدورى الايرانى تولى فريق بينافس على الدورى تسبب فى هبوطه للدرجة الثانية، من يوم ما ترك الاهلى لم يطلبه احد، الحكام كانوا بيجاملوا الاهلى والجمهور الاهلاوى كان متصور انه ربنا بتاع الكرة، لكن لما البرتغال تكرم احسن 20 شخصية فى الرياضة ولا يكون موجوداً فيهم يبقى لازم نعرف حجمه الطبيعي، انا مش بهاجمه لامور شخصية وانا معرفوش ومفيش بينا اى رواسب.
■ كيف ترى تولى شوقى غريب القيادة الفنية للمنتخب؟
لو مشيت معه يبقى مدرب كويس لو لم تمشى معه يبقى مدرب فاشل هو لم ينجح فى سموحة خالص والاسماعيلى لم ياخد فرصته لكنه مع حسن شحاتة كان ناجحاً لانه كان بينفذ اللى المعلم كان بيقول له يعمله.
■ من ترشحه فى انتخابات الرئاسة القادمة؟
انا صوتى مع المشير عبد الفتاح السيسى لانه راجل المرحلة ومصر تحتاج له للخروج من النفق المظلم.
■ أخيرا .. كيف ترى المنافسة بين المرشحين الثلاثة المحتملين المشير وحمدين ومرتضى منصور وهل ستحسم من اول جولة ؟
انا أرى أن مرتضى نازل بتكليف من المخابرات لتفتيت اصوات حمدين صباحى لصالح المشير عبدالفتاح السيسى لكن مع ذلك أتوقع اعادة فى الانتخابات