مع حبي للأهلي .. الزمالك حيفوز بالدوري

بالبلدى

مع حبي وعشقي وتشجيعي للأهلي إلا أنني حاسس ومتأكد إن الدروي سيكون للزمالك بقيادة التوأم إبراهيم وحسام حسن لأكثر من سبب السبب الأول أن المدير الفني للنادي الأهلي حسام البدري ده راجل أبيض في التدريب لأنه مدير فني مش عارف إمكانيات اللاعبين الموهوبين الموجودين في الأهلي منهم علي سبيل المثال الجزائري الموهوب أمير سعيود ده غير اللاعبين الشباب الموهوبين منهم برضه علي سبيل المثال «عفروتو وأحمد شكري وشهاب الدين أحمد ومحمد طلعت» وهؤلاء اللاعبين الموهوبين لازم يلعبوا أساسيين واللاعبين الكبار يجلسوا احتياطيين علي الدكة للاستعانة بهم وقت اللزوم.
وياريت حسام البدري يتعلم الجرأة من العميد حسام حسن إللي ما بيخافش من اللاعبين زي الأخ البدري.
وشوفوا حسام حسن إزاي بيلعب بفريق نصفه تقريبا من اللاعبين الشباب الناشئين اللي سنهم أقل من عشرين سنة والنص التاني من اللاعبين الخبرة أمثال شيكابالا وفتح الله وهاني سعيد.
كلكم شفتم هزيمة الترجي التونسي خمسة - صفر من مازيمبي وكلنا فرحنا لهزيمة الترجي ولكن برضه كلنا حزنا حزنا شديدا لعدم صعود الأهلي للنهائي ومباراة الترجي ومازيمبي كشفت لجمهور الأهلي أن الترجي لم يفز علي الأهلي لان الترجي أقوي وأحسن من الأهلي وانما الأهلي انهزم لانه معندوش مدير فني يقدر يفهم إيه إمكانيات اللاعبين اللي بيدربهم.
ولو فاز الزمالك بالدوري السنة ديه سيكون السبب الرئيسي لحصول الزمالك علي الدوري أن حسام البدري هو المدير الفني للنادي الأهلي وسيفوز الزمالك بسبب أخطاء حسام البدري إللي لغاية دلوقتي لم يكتشفها مجلس إدارة النادي الأهلي.