شريف مدكور: قيادات ماسبيرو تخلوا عني عشان ماليش ضهر مع إني باجيب إعلانات

· لم أصرف مستحقاتي المالية منذ ديسمبر الماضي.. وفضلت «مرمي» في قناة الأسرة والطفل 12 سنة ومحدش كان حاسس بيا
ترك شريف مدكور التليفزيون المصري واتجه لتقديم برنامجه في قناة «المحور» وهي الخطوة التي أثارت استياء قيادات ماسبيرو الذين وصفوها بأنها «غير لائقة» وتعتبر «نكران للجميل».. يتحدث «مدكور» في الحوار التالي عن التفاصيل:
بداية هناك اتهام ضدك من قيادات ماسبيرو بأنك تركتهم بأسلوب غير لائق رغم أنهم وفروا لك كل الامكانيات.. فما تعليقك؟
- غير صحيح بالمرة وعن أي إمكانيات يتحدثون، فأنا لم أصرف مستحقاتي المالية منذ شهر ديسمبر الماضي وأعتقد أنني لن أصرفها الفترة القادمة، فضلا عن أنني منذ شهور أطالب بتفاصيل معينة في صالح العمل لم يتحقق منها أي شيء.
وماهي التفاصيل التي طالبت بها ولم تتحقق؟
- أولا تغيير ميعاد البرنامج لأن توقيت عرضه الساعة الرابعة عصرا موعد «ميت».. كما كنت أطلع علي الهواء في استديو محترم وبه كل الإمكانيات شالوني منه مجاملة لإبراهيم حجازي وجابوه مكاني ورحت استديو مفيهوش أي امكانيات والمسألة بقت صعبة جدا.
كيف؟
- تقدمت بطلب اجازة بدون راتب وقوبلت بالرفض مع ان دينا رامز حصلت علي إجازة وعملت في قنوات أوربت وروتانا ثم عادت والمهندس أسامة الشيخ نفسه حصل علي اجازة 18 عاما من التليفزيون فهل هو حلال لهما وحرام علي.. ولا أنا عشان معنديش «ضهر» في ماسبيرو ولا واسطة بيتعمل معايا كده؟
وهل حدثت أي محاولة بعد ذلك لاستيعاب الأمور والوصول لحل وسط؟
- بالعكس.. اتصل أسامة الشيخ برئيس قناة المحور وقاله «متاخدش شريف عندك» بس الراجل لما سأل علي وعرف إني مذيع ناجح بجيب إعلانات حلوة علي شغلي قرر يبدأمعايا، فالموضوع في النهاية يحكمه البيزنس.
ولكن قيادات ماسبيرو يؤكدون أفضالهم الكثيرة عليك وأنك ظهرت علي أيديهم؟
- أرد عليهم وأقول إني فضلت «مرمي» في قناة الأسرة والطفل 12 سنة ومحدش حس بيا وبمجهودي، خليت الناس من المحيط للخليج تشوف القناة دي بعد ما كان مفيش حدي يعرفها.. ده غير نجاحي المتميز في بيت شريف، أنا محدش ليه أفضال علي وأنا اللي عملت نفسي بنفسي.