الرئيس السيسي يطلق رسائل مهمة من قلب سوهاج: الصعيد لم يكن مهمشا ولا منسيا لكن البلد ما كانتش قادرة.. الحكومة مطحونة ولسه بدرى على تطوير سوهاج

افتتح الرئيس عبدالفتاح السيسي، عددًا من مشروعات حياة كريمة بمحافظة سوهاج، وتناول الرئيس الإفطار مع أهالي قرية أبو دومة.

وفى لفتة إنسانية، حرص الرئيس عبد الفتاح السيسي، على تقبيل رأس سيدة مسنة خلال زيارته لقرية أم دومة، إحدى قرى مبادرة حياة كريمة بمركز طما بمحافظة سوهاج.

وأعرب الرئيس عبدالفتاح السيسي، عن سعادته الكبيرة بلقاء أهالى سوهاج.

قال الرئيس خلال لقائه بأهالي قرية أم دومة: "سعيد إن أنا أشوفكم ..كل سنة وأنتم طيبين .. الصعايدة جدعان بجد أهل عزة وأهل كرم وأهل شهامة ومروءة وزيادة شوية".

وجه الرئيس عبدالفتاح السيسي الشكر للمتطوعين في مشروع حياة كريمة بمحافظة سوهاج.

وقال الرئيس السيسى: "لسه المشوار.. أول مرحلة.. لسه فيه تانية وتالتة.. وعهدنا مع الناس في ريف مصر كله إن إحنا هنعمل ال3 مراحل.. كل اللى بيتطوع وكل اللى بيعمل معاكم بوجهلوا الشكر والتحية وبقوله انتوا بتعلموا حاجة جميلة قوي لبلدنا وأهلنا اللى مكنش عندهم أمل قبل كده، وإن شاء الله بيكم وبفضل الله نخلص المراحل دى".

أضاف الرئيس عبد الفتاح السيسي، أن الدولة المصرية نظمت نفسها بشكل مختلف، متابعا: "احنا نظمنا نفسنا بشكل مختلف".

وأضاف الرئيس السيسي، خلال تناول الإفطار مع أهالي قرية "أم دومة": "الأمر كله مش لينا.. الأمر لله.. نقوله يا رب تاني وزيادة واحنا نعمل كل حاجة للناس".

وتابع الرئيس السيسي: "سعداء باللقاء معكم.. وأنا الف الدنيا واجي للناس واقعد معهم كده.. واحب القعدة كده.. وأنا واحد بسيط يعني".

وتفقد الرئيس عبد الفتاح السيسي، قرية أم دومة مركز طما "إحدى قرى حياة كريمة" بمحافظة سوهاج.

أكد الرئيس عبد الفتاح السيسي، على جاهزية دعم المشروعات الشبابية المختلفة، قائلا: "احنا جاهزين.. الأرقام اللى مش تحلموا بيها ومش من جيب الحكومة.. طب ليه.. لأنى مرتب ترتيبات تانية.. الحكومة يعني الدكتور مصطفي مش يزعل مني الحكومة مطحونة جدا".

أضاف الرئيس السيسي، خلال كلمته في افتتاح مشروعات قومية جديدة في محافظة سوهاج: "الدكتور مصطفي النهاردة اتكلم عن محافظة واحدة "سوهاج".. نصف اللى اتعمل بحياة كريمة ونص من غير حياة كريمة.. بنتكلم عن 7 تريليونات جنيه.. طب ال 7 تريليون رقم متواضع قدام الحلم.. انا جاي بالطريق والطيارة وشايف .. لسه بدري اوي اوي اوي.. أنا بتكلم بجد.. لسه بدري".

وأكد الرئيس عبدالفتاح السيسي، إن محافظات الصعيد لم تكن مهمشة ولا منسية لكن الدولة لم تكن قادرة، مضيفا: "لسه بدرى .. في قرية أبو دومة قالوا إن الصعيد كان مهمشا وبيتنسى.. وانا بقولكم لا.. الصعيد ماكنش مهمشا ولا منسى.. البلد ما كانتش قادرة بس".

أضاف الرئيس السيسي: "لازم نحترم عقول بعض ..ونبقا موضوعيين وصادقين في التقدير والتقييم لواقعنا ونعرف ليه واقعنا كده؟ علشان البلد مش قادرة .. ومكنتش قادرة .. طيب اللى بيتعمل ده؟ قبل كل شيء توفيق ربنا سبحانه وتعالى ..وثانيا محاولة لتطوير الفكر علشان كده متحمس قوى ليكم ومتحمس دايما للفكرة لانها ممكن تحل مسالة بالمسارة التقليدية متتحلش والفكرة تنجح بالمسار التقليدي متنجحش ..وبالفكرة توفر المسار التقليدي متمولش..الفكرة كده ..البلد اللى ظروفها والنايس اللى ظروفها مش متيسرة قوى معندهاش غير الفكرة والحلم والعمل".

قال الرئيس عبدالفتاح السيسي، إنه يتابع "السوشيال ميديا" جيدا وتعليقات كل الناس، واحد مثلا يقول يعني يا كامل يا وزير مش كفاية أسفلت بقى!! ده أول حاجة تتعمل هو الأسفلت .. شبكة الطرق علشان نوصلكم وتوصلونا.. يا عيني الناس اللى بتقول كده عايشة في مناطق ماشافتش أهالينا في كل حتة في مصر عايشين ازاى وبيمشوا ازاى ؟ والبنية الأساسية اللى عندهم أخبارها إيه".

أضاف الرئيس السيسي: "كنا بنقول عندنا صرف صحي لكن نسبته قد إيه 10 أو 13 % .. أول ما بدأت سألت .. طيب اللى قبل مننا ما كانش عندهم حلم يعملوا 100 % .. لأ عندهم .. بقول كده علشان أبدا أبدا تفكروا كويس جدا قبل ما تطلعوا الكلمة من لسانكم .. لأن الكلمة هنتاسحب عليها قدام الناس والتاريخ وقبل كده ربنا..كل كلمة محسوبة بدقة .. خلى بالك متقبلش الكلمة لأنني انا شاطر قوى وانا اللى بعمل ..اللى قبل مننا كانوا عاوزين يعلموا بس مقدروش يعملوا..كنت بتحلموا كان نفسكم اه طيب منفذتوش ليه؟ مفيش".

وتحدث الرئيس عبد الفتاح السيسي مع 6 نماذج شبابية استعرضت المشروعات الخاصة بهم، قائلا: "كل الدعم موجود.. أمامي 6 نماذج .. طب 6 نماذج دول ممكن 50 % يجبوا نتيجة.. وممكن ال 100 %.. ومش أقصد حاجة ولكن علينا نحلم ونجري على حلمنا ونصدق أنه ممكن يحصل نجاح".

أضاف الرئيس السيسي: "عاوزين نحقق النجاح.. تلوين صورة لا.. قبل ما تمشوا.. الدعم موجود والأرقام اللى مش تتخيلوها موجودة.. كل واحد هيحتاج ايه.. مليون ولا اتنين ولا تلاتة.. من أجل نجاح الفكرة والمشروع.. ينجح كمشروع.. كل النماذج اللى شوفتها لازم ندعم".

وافتتح الرئيس عبدالفتاح السيسى عبر تقنية الفيديو كونفرانس محور طما على النيل فى محافظة سوهاج، كأحد أهم محاور التنمية، حيث نفذته وزارة النقل".

قال الرئيس عبد الفتاح السيسى، أثناء افتتاحه عددا من المشروعات القومية والتنموية بمحافظة سوهاج، فى إطار استراتيجية تنمية الصعيد: يجب أن نسعى نحو أحلامنا وأن نصدق أننا نستطيع تحقيقها

وجه الرئيس عبد الفتاح السيسي، بتوفير الدعم اللازم للمشروعات الشبابية من صندوق تحيا مصر.

وقال الرئيس السيسي: "لما الاقي حلم عند شباب مصرى.. الحلم ده ممكن يتعمل منه حاجة.. مش أقول ربنا يوفقهم.. لا ده يمكن يجبلي حاجة.. أي مشروع يجبلي حاجة.. وحاجة جنب حاجة.. البلد دي موقفها يتغير.. بقولكم كده بسبب موضوع النمو السكاني".

وتابع الرئيس السيسي: "النهاردة يوم جميل وعام جديد وكل سنة وأنتم طيبين.. بنفكر دايما بعض بحجم التحدي والمشكلة.. الموضوع مش فساد حكومة ولا فساد إداري ولا تهميش.. أقول حاجة بسيطة.. أنا اعرف كويس يعني أيه قرش؟.. واعرف ايه يعني دولة بفضل الله.. ودولة تبقي قد الدنيا بيكم وافكاركم وجهدكم.. مستمرين بالطريقة دي.. والدعم من صندوق تحيا مصر.. طب الرقم كام؟.. مش عاوز أقول.. حطوا أفكاركم في ميزانيات ولجنة تشرف على ده ولكم ولغيركم من مشروعات شبابية.. واحنا ان شاء الله نوفر الدعم.. كل اللى قولتوه ده نشوفوا.. كل المشروعات والأفكار".

قال الرئيس عبد الفتاح السيسي، إن الدولة المصرية تحتاج إلى 70 تريليون جنيه وليس 7 تريليونات جنيه استثمارات لتنفيذ مشروعات لخدمة الناس، معقبا: "يا رب يعلمنا ويفهمنا وإننا نشوف.. واللي نشوفه نفهمه".

أضاف الرئيس السيسي: "اللي إحنا بنعمله في سوهاج أكثر من 100 مليار جنيه، ولكن اللي اتعمل تشغيله بكام؟ يعني عملت مكتب بريد.. الناس اللي هتشتغل فيه هتاخد كام؟ وهيتعمله صيانة بكام؟ ولو عملت مدرسة علشان تحافظ عليها هتصرف كام؟ وكذلك لو عملت مستشفى هتشتغل كل يوم بكام؟ وكل شهر وكل سنة؟ انت داخل في سباق.. مثلا عدد الفصول الموجود دلوقتي أقل من المطلوب بمنتهى البساطة، يبقى انت الأول عايز تسد الفجوة فجوة الموجود مع المفروض يكون موجود".

وأكمل الرئيس السيسي: "نحن في حاجة ل60 ألف فصل بالمدارس سنويا، ولو النهارده عايز أعمل 60 ألف فصل يعني عايز 60 مليار جنيه، ثم أضع معهم مصاريف المدرسة والطقم الإداري والإشراف في المدرسة يعني بكام؟ أنا كنت براجع أمس مع الإسكان علشان أعمل 200 ألف وحدة تانيين.. لقيت الوحدة معدية عليا ال700 ألف جنيه.. يعني ال200 ألف ب140 مليار جنيه".

تحدث الرئيس عبد الفتاح السيسي، مع محمد صاحب مصنع بلاستيك في مجمع غرب جرجا الصناعي، قائلا: "يا محمد.. طمني هل المشروع ماشي كويس؟.. ليرد عليه ملك المصنع: "كان نفسي أكون في حضنك"، وتفاعل مع الرئيس السيسي: "أنا بسأل على المشروع ليه يا محمد بقولك كده.. كل فرصة أو مناسبة زي كده يهمنا ان الناس تفهم حاجة.. لما بقولهم أنه المجمع ده على 60 فدان عملنا المجمع ده.. ال 60 فدان عاملنا بيهم حوالي 180 منشأة صناعية".

أضاف الرئيس السيسي: "المجمع ده فيه 180 مصنع لو فيهم 20 يبقي 3600 فرصة عمل.. انا بقولك كده النهاردة لما نتكلم على توفير فرص العمل.. ونقدر نعمله 10 و20 مرات.. وفى الأراضي مش الزراعية.. لترك الأراضي الزراعية للأهالي واعمل الصناعة.. الفدان بيشغل فرد ولا اتنين.. والمكان ده يشغل 20 وأكثر من كده".

واصل الرئيس السيسي متحدثا مع مالك المصنع: "متوسط المرتبات كام؟.. أعلى حاجة وأقل حاجة؟.. ليرد عليه مالك المصنع: "من ألفين حتى 4 آلاف وفق القدرة والخبرة"، ليرد عليه الرئيس السيسي: "كل ما تنجح هتحسن أكثر والألفين جنيه في الصعيد مش زي القاهرة.. وإن شاء نعمل قد المجمع 20 مجمع.. شوفت المنطقة المستوية لازم نستفيد منها.. وبقولها لكل محافظ ولينا احنا كمان تتعمل مساكن ومجمعات صناعية.. لعدم استهلاك الأراضي الزراعية.. ومحتاجين كتير اوي اوي لتلبية حاجات الناس في مصر".

وداعب الرئيس السيسي مالك المصنع: "مش عاوز أقولك بتكسب كام؟.. وزير المالية ملوش دعوة بيك خالص.. لازم تطمئن ومش تخاف وبتكسب كام؟؟ .. ومتشكر يا محمد.. متشكر جدا وكل سنة وانت طيب.. وخالي بالك من مصنعك.. اشتغلوا علشان تكسبوا".

واستعرض مينا وليم المدير التنفيذي لمبادرة "ابدأ" مجموعة من المشروعات في محافظة سوهاج لدعم المصانع والاستثمار الصناعي، متابعا: "عملنا على دعم مجمع غرب جرجا الصناعي لتوفير الدعم اللازم بالتعاون مع وزارة التجارة والصناعة وهيئة التنمية الصناعية.. وسوف يتم افتتاح 3 مصانع جديدة في مجمع غرب جرجا.. وأول مصنع "البلاستيك".. والمصنع الثاني "الأعلاف".. والمصنع الثالث "الحذاء الرياضي".

مازح الرئيس عبدالفتاح السيسي، أحمد عنتر صاحب مصنع أعلاف بالمنطقة الصناعية غرب جرجا بمحافظة سوهاج قائلا: " غليتوا العلف ليه يا أحمد؟ وكرتونة البيض غليت"، ليرد "عنتر بقوله:" العلف عندي رخيص ..وأنا شغال علاف مواشى وتسمين".

واصل الرئيس عبدالفتاح السيسي حديثه لصاحب مصنع الأعلاف: " الدنيا ماشية معاك كويس؟.. أنا شايف عصافير كتير جوه المصنع" ليرد احمد قائلا: " أنا مصدر الطيور".

وقال الرئيس لصاحب المصنع: ربنا يوفقك ..كلمنى أنا وملكش دعوة باللى بيكلمك..واستسفر الرئيس عن عدد العمال ومرتباتهم قائلا: " كام واحد شغال معاك؟ وبتدي مرتبات قد إيه؟..ليجاوب أحمد: 25 عامل يا ريس .. والمرتبات من 3500 آلى 7 آلاف، كاشفا عن إنتاج نحو 5 أطنان من العلف في الساعة الواحدة".