حنان شوقي: "الزواج فيه كل أسماء الله الحسنى والسوشيال ميديا بتتاجر بالفن" (فيديو)

كشفت تصريحات الفنانة حنان شوقي، بعد غياب سنوات، عن العديد من جوانب حياتها، كان أبرزها أنها في رمضان ختمت القرآن، وقالت: "وأنا قاعدة على السرير، في ليلة القدر، شفت سيدنا النبي، يقظة مش منام، ودي غيرتني 360 درجة، اتهديت زي ما ربنا عاوز في كل شيء، أنا رميت الدنيا ودوست عليها وبما فيها، وقررت أشتري نفسي وقلبي وروحي".
تصريحات حنان شوقي عن الزواج
وتابعت حنان شوقي، خلال استضافتها على أحد الفضائيات: "أنا بقدس الزواج، لأنه فيه كل أسماء الله الحسنى، لأنه عملية جامدة جدا، وأنا بحبها وحساها جوايا، ولو محستهاش في الحياة، بجد يبقى قلتها أحسن، وأنا لازم أبوس إيد جوزي وأبوسه وأقوله عايز حاجة مني؟".
حنان شوقي: أنا كتلة حب متحركة
وأردفت حنان شوقي: "أنا كتلة حب متحركة على الأرض، وحياتي كلها حب، وقلبي مش بينبض غير بالحب، بس الحب الحقيقي، وبحب الحب المتبادل، واللي اتقدمولي كان حبهم كاذب وربنا كان بيبن لي، والبني آدم بيبان من موقف أو كلمة أو حركة، وأنا حساسة جدا وقلبي رباني، بحس باللي بيقولي بحبك بجد، وأنا عايزة أتحب حب حقيقي لا يتجزأ، علشان لما نعجز نفضل نحب بعض، وبتمنى يكون فيه ود ورحمة وحنية، ولو مفيش كده يبقى قلته أحسن".

حنان شوقي والسوشيال ميديا
استكملت حنان شوقي: "لما دخلت عالم السوشيال ميديا، لقيت كل الناس بتقول رجلين حنان، بعد مشهد الكوتشينة والشورت الأصفر، فى فيلم الإرهابي، مع الفنان عادل إمام، حسيت إن الناس دي بتتاجر ومفيش فن، وعلشان الناس المريضة نفسياً يقولوا رجلين حنان شوقي، وشهوتهم هي اللي بتخليهم يشوفوا المشهد ده، لكن لو اتفرج على المشهد من أوله، ولا هيفكر يبص على رجلين حنان شوقي".
وتابعت حنان شوقى: "بعد مشهد الكوتشينة والشورت الأصفر، كنت بأخد صورة فوتوغرافيا، ومرة واحدة لقيت رجلي اتلوت وجالي تمزق في الأربطة، وساعتها أستاذ عادل إمام قال إني خدت عين".
هجوم حنان شوقي على محمد رمضان
ومن قبل هاجمت حنان شوقي، الفنان محمد رمضان قائلة: "لا أحب أتابع أي حاجة لمحمد رمضان، عشان مش بعرف اتفرج على حد مش صادق، مع إنه عنده كاريزما وبيمثل زى أحمد زكي، حتى بلعان الريق، وأنا مش بحب البني آدم اللي يجور على بني آدم، ويأخذ بنط على السوشيال ميديا، ويضيع حياة بني آدم، ويضيع كيان واحد طول الوقت عايش فيه، ده ميبقاش فنان، الفن دا أرقى شئ في الوجود، مش هشتغل معاه حتى لو إداني ملايين الملايين، وهو اللي عمل كدا في نفسه".
بداية حنان شوقي
حنان شوقي كانت بدايتها الفنية وهي لا تزال في الثامنة، حين اشتركت في البرنامج الإذاعي الشهير (غنوة وحدوتة) من تقديم (أبلة فضيلة)، بعدها شاركت بالغناء في عدد من البرامج التلفزيونية.
وتخرجت حنان شوقى، في المعهد العالي للفنون المسرحية عام 1990، وكانت شاركت في مسرحية (فارس وبني خيبان)، والجزء الثاني من مسلسل (ليالي الحلمية) وهي لا تزال طالبة في المعهد.
بعدها شاركت حنان شوقي مع المخرج صلاح أبو سيف في فيلم (المواطن مصري)، ثم مع المخرج عاطف الطيب في فيلم (دماء على الاسفلت)، و(يا تحب يا تحب) والذي يمكن اعتباره بداية الموجة الكوميدية في السينما، كما شاركت في فيلم (الإرهابي) والذي أضاف لها شعبية طاغية، لكن يظل وجودها التلفزيوني أكبر بأعمال مثل (البخيل وأنا، الناس في كفر عسكر) بالإضافة إلى (ليالي الحلمية) والذي شاركت بأجزائه منذ الجزء الثاني.