الرئيس السيسي :هنعمل قانون للمحاجر والبعض يستحل المال العام ويحج ويعتمر من الحرام

وجه الرئيس عبد الفتاح السيسى، رسالة للمالية والمحليات، قائلا :"لما نعمل عقود مع ناس مدنيين من أهلنا مش هينفع نبقى ناسيين ناخد الفلوس، ولا يتم تحصيلها بالسنين الطويلة وندخل فى نزاع.. دا كلام غريب ومحدش واخد باله منه، وخاصة فى الحديقة الدولية.. يا تعمل عقد حكومى والعقد أوله فى إسكندرية وآخره فى أسوان.. وثيقة مؤمنة تخرج لكل الناس وتقول لكل واحد حقنا إيه.. انت تاخد وإحنا ناخد.. لكن انت تاخد لوحدك لا.. إحنا كلنا كمسئولين مش بناخد بالنا من حق الدولة وهذا أمر لن أسمح به، وكل مسئول ينتبه لكل قرش.. ندى للناس حقها وناخد حقنا".

وأضاف الرئيس خلال افتتاحه مشروع "بشائر الخير 2"، : "معقول نعمل عقد ب 20 أو 25 يتم دفع ستة والباقى لا.. الحديقة الدولية والشلالات مسئولية المنطقة الشمالية العسكرية، حتى تنتظم الأمور والدولة تاخد حقها مظبوط فى هذا الأمر القديم قبل الجديد.. الناس تاخد الحاجة بتلاتة قروش وميدفعوش كمان!.. المسئولين بالدولة من أول وزير المالية والمحافظ عينه على كل جنيه وكل عقد فى محافظته، يشوفه ويعرف دخله عشان الغلابة، أقول ذلك كى ننتبه فى إسكندرية وكل حته.. أنا بلاقى محلات مؤجرة بقالها 20 سنة بأرقام هزيلة.. وماله نحترم العقد بس الناس تسدد.. لكن إذا لم تسدد وتدخل فى قضايا.. لا دا حتى مايرضيش ربنا.. إنك تاخد وتكبر والغلابة تضيع كدًا.. الثلاث مناطق مسئولية المنطقة الشمالية العسكرية وكل جنيه ميجيش الناس تمشى".

واصل:" ناخد حقنا مظبوط يا إما الناس تمشى إحنا مش بنخاف إلا من ربنا..دا كلام ميرضيش ربنا إننا ندى الناس الحاجة من غير فلوس، والناس تكسب مئات الالوف والملايين ومش عاوزة تدفع حق الدولة، والكلام دا مش هيمشى معايا فى أى حته فى مصر.. دا كلام ميرضيش ربنا ولا الوطن.. أنا مش زعلان من الناس بل زعلان علينا وعلى حالنا عن الناس بتستبيح وفاكرة إن المال دا مش حرام.. لا دا مال حرام.. وتروح تحج وتعمل عمرة.. انت بتاكل المال اليتيم بتاع الدولة.. والكلام دا ينطبق على المحاجر وكل حاجة.. ونعمل قانون للمحاجر".