كلاكيت

للمرة الأولى فى التاريخ.. يصبح من يدافع عن أرضه.. خائن وعميل.. وقابض!! يا ريت بس يقولولنا قابض من مين؟

السادة الذين صوتوا على سعودة تيران وصنافير، لماذا غضبوا كل هذا الغضب، عندما قام أحد النواب بتصويرهم، وهم يرفعون إيديهم بالموافقة؟ مجرد سؤال؟

يا ثورة فى خيالى.. جنت عليها الليالى.. وحكومة مشعلى الحرائق!

يبدو أن الداخلية تطبق قانون التظاهر على طريقة.. من حبنا حبناه.. وصار متاعنا متاعه.. ومن كرهنا كرهناه يحرم علينا اجتماعه!

يوسف الشريف الفنان الموسمى كل رمضان.. يقلوظ عمة الدعوة، ويعلمنا الأدب، ويطلب منا عدم ترك أى فرض بسبب أى مسلسل!! يا ريت حد يقوله إن مسلسله حرام أصلا!

تشابه أحداث وشخصيات مسلسلات رمضان يؤكد أن المؤلفين بياخدوا من مصدر واحد!

كتر ألف خيره.. الراجل الجدع الذى منع برومو خالد عليش وإيمان السيد من قناة «أون دراما»، وأراحنا من صوت المذيع الذى يشبه الشكمان المخروم!

كان يوم اسود يوم ما الخواجة كوبر ضرب الفتة، هو ضربها من هنا البعيد.. والمنتخب انضرب على قلبه من هنا.. ياريت المرة الجاية.. يضرب لحمة راس!

مفيش واحد جدع، يخطف رجله لحد البرتغال، يشوفلنا الراجل إيناسيو ده كان بيشتغل إيه قبل ما يدرب الزمالك، وينوبه فينا ثواب؟!

عفاريت عدلى علام كتروا قوى.. يتربوا فى عزه إن شاء الله.. بس يا ريت لو ممكن يعنى يكلمهم يدخلوا عمرو الشوبكى البرلمان!

الفنانة هالة صدقى.. كفاية والنبى يا ست الحاجة إحنا فى شهر مفترج، وسكوتك صدقة!!
كلاكيت تانى مرة.. يا ترى انت فين يا فتحى يا سرور؟