قصيدة "توهتونا" للشاعر محمد المنشاوى

( تَوِّهْتونا..)
العيب فينا ولاّ ف مين
إحنا حمير يعني وأغبيَّة
ليه فى بلدنا ياناس تايهين
مهما نخلّي عيونا تفنْجِل
برضو نحِسْ اننا نايمين
تَوِّهْتونا..
يعني الجيش بطَّال يا خوانا
ولاّ كويّسْ
يعني الثورة دي حاجة عظيمة
ولاّ غلَطنا ف حق الريّسْ؟!
تَوِّهْتونا..
والَّلي بيُصرخ في التحرير
روحه علي كفّه وبيتظاهر
مصري أصيل بيحب بلاده
ولاّ وقوفه رياء ومظاهِر؟!
تَوِّهْتونا..
يعني وقوفنا ف وشّ حاكِمنا
مُشْ هايفيدنا ولاّ مُفيد
والّلي يموت برصاص الشُرطة
بلطَجِي غار ولاّ اسمه شهيد؟!
تَوِّهْتونا..
لمَّا القاضي استدعي مُشيرنا
علشان يدلِي بكل شهادة
قال الصدق ف كل كلامه
ولاّ ماقالش الحق ياسادة؟!
تَوِّهْتونا..
تَلاْتين عام بيلمّ الغلَّه
شِلّة حراميّة وجواسيس
يعني فلوس الشعب هاترْجَع
ولاّ هايبقىَ عَشَمْ إبليس؟!
تَوِّهْتونا..
طَبْ أهرامنا والتماثيل
أوثان تافهه ولاّ حضارة
مصر تاريخ بصحيح يا خوانا
ولاّ شويّة طوْب وحجارة؟!
تَوِّهْتونا..
طَبْ مَجْمَعْنا العلمي بحالُه
الّلى معبِّى كُنوز وَرَقيَّة
الثّوَّار حَرَقُوه يا خوانا
ولاّ أصابع تانية خفيَّة؟!
تَوِّهْتونا..
يعني اتفحَّم كل المَجْمَعْ
وِمَا عاد فيه أوراق محطوطة
ولاّ دا هُوَّ كتاب وخريطة
وكامَ مخْطُوطة؟!
تَوِّهْتونا..
حتّي الكابتِن نِجْم الكُورة
بطَّل يتمرَّن عَ الكُورة
عاوز يلعب ماتش سياسة
إمّا ف شعب أو حتّي فِ شوري
تَوِّهْتونا..
لمَّا نشُوف ميدانين في بلدنا
واحد طالع نازل يهتِف
يِحيا الجيش ويَّا الدّاخْليّة
أمَّا التّاني بيهتِف أكتر
يَسقُط يَسقُط حُكم العَسْكَرْ
جيشنا يا ناس كدَّاب بيمَاطِل
حَد يقولّى ياريت بصراحة
مين عَلَي حق ومين عَلَي باطل؟!
تَوِّهْتونا..
قال الشنَّاوي فْ أقوَالُه
أيّ رُصَاص يِفرشْ خَرْطُوش
صَعْب تنَشِّنْ بِيه عَلَي حاجة
مُش مُتخَصِّصْ عين ووشوش
يَعْنِي قضيّتْكُم خَسْرَانه
ڤيديو الصّوت والصّورة فاشوش
بَقيَ بالذمَّه دا اسمه كلام
عاوز حَدْ يُرد عليَّا
بَسْ يكون لمَّاح وجرِئ
الّلي يصفِّي عيون أولادنا
يبقيَ دا مُذنِب ولاّ بَرِئ؟!
تَوِّهْتونا..
الإعلام صدّعْ أهالينا
طالع نازل يدْوش فينا
أنور رجَّع أرضِنَا لينا
كان ناوي يحقّق أمانينا
إنّما يعني الاتفاقيّة
كانت صعبة علينا شويَّة
إنّما ناصر دمَّر شعْبُه
في القوميَّة وفي الحُروبات
لَكِن بَرْضَكْ كتَّر خيره
أمّمهالكُم قبل ما مات
عبد الناصر أحسن يعنى
ولاّ حَبيب الكُل سَادات؟!
تَوِّهْتونا..
إحْنا بنُحْكم يعني بلدنا
ولاّ ما زال هُمَّا الحَاكمين
تَوِّهوا فينا كمان وكمان
تَوِّهْتونا فْ فهْم الدين
لو فتّشْنا فْ قلْب الماضي
نِلقيَ بقالنا زمان تايهين
تَوِّهْتونا..
ليه حكوماتنا كلام ووعود
لما بننزل أرض الواقع
نلقى ضميرهم مش موجود
هوِّ العدل ماجاش فى قاموسهم
ولاّ الظلم مالوهش حدود؟!
تَوِّهْتونا..
مصر دي شَجرة فروعها طَويلة
لَكِن فيها الفرع الواطي
يرموا بلاهُم عَ الثوَّار
يضربوا فيهم بالمطَّاطي
الهَروات وقنابِل الغاز
مُشْ هَاتخلّى الشعب يطاطي
تَوِّهْتونا..
مين بيحاول هَدْم تاريخنا
حَدْ غَريب مِسْتَحْلِف لينا
ولاّ دا مصري ومِنّنا فينا؟!
يلعن ابوكم ويَّاه ابونا
تاه الحق فْ قلب بلدنا
وتَوِّهْتونا..