«بنت ونيس»: مش هبطل رقص أبدا

رغم انشغال الأغلبية بمتابعة أحوال الطقس السيئ التى ضربت أغلب محافظات مصر، ورغم انشغال آخرين بمتابعة جولة الإعادة فى انتخابات البرلمان وسقطات الدورى العام، إلا أن الشغل الشاغل لجمهور السوشيال ميديا هذا الأسبوع، كانت رقصة ريم أحمد التى سبق وجسدت شخصية هدى فى مسلسل يوميات ونيس، والتى أثارت الجدل بين من رأى فيها حرية شخصية لترقص على أنغام المهرجانات وبين آخرين انتقدوها ومعها الفنان محمد صبحى الذى وجهوا له رسالة قالوا فيها: شوفت بنتك ياونيس حصلها إيه».
تحدثنا إلى ريم لمعرفة السر وراء الفيديو، وفك حالة اللبث التى وقعت فقالت: فى الأول أنا عايزة أشرح الفيديو ده كان فين، أنا كنت فى إيفنت لدعم مرضى سرطان الثدى تحت رعاية مستشفى بهية والجامعة الأمريكية، وكان الإيفنت فيه مجموعة من الفقرات، كانت فقرة الزومبا دى واحدة منها، فتم اختيارى أنا لهذه الفقرة باعتبارى مدربة زومبا فى أحد الأماكن الرياضية فى أكتوبر، والزومبا لازم تتمارس على تراكات مزيكا، فأنا دايما بحب ألعبها على تراكات «belly dance» أو أى تراك شعبى لذلك فضلت أن أبدأ اللعب فى الإيفنت على تراك شعبى الأول باعتبار التراكات الشعبية معروفة فى المجتمع هنا أكتر من التراكات الأجنبية، وعلشان الناس كان شكلها نايم ومحتاجين يفوقوا ويندمجوا أكتر، فاخترت تراك «فرتكة»، والمفروض أن الإيفنت ده كان من شهر يونيه اللى فات، وهذا ما لا يعلمه كثيرون.
وأضافت: المهم قبل ما الفيديو ينتشر على السوشيال ميديا بساعات لقيت بنت بعتالى الفيديو الأول على صفحتى الخاصة، وشوفته وقولتلها إن مكنش ينفع تصورنى، لأن الفقرة دى كانت للسيدات فقط، وحتى كان فيه منظمون ولاد خرجوا وقفوا فى الشارع وقت الفقرة دى، وطلبت منها تمسحه من صفحتها، وعملت كده فعلا، لكنى تفاجأت بعد ساعات بأصدقائى بيقولولى إن فيه فيديو انتشر ليكى على بيدجات على فيس بوك والظاهر إن حد شافه عندها فاتشير، وعلشان كده أنا مش فاهمة إيه وجه الاعتراض حتى على الفيديو، أنا برقص رقص زومبا، وده نوع من الرقص معروف دوليا يندرج تحته «belly dance» والفلامنكو وكل أنواع الرقص الشعبى العالمى المتعارف عليه غير أنى كنت لابسة لبس كويس جدا غير مغرى أو مكشوف، وكمان دى فى الأول والأخر فقرة بنات فقط.
وأوضحت ريم أنها بدأت لعب زومبا منذ شهر أبريل هذا العام واتجهت إلى الزومبا، لأنها فى الأساس باليرينا فى الأوبرا قبل أن تنتقل إلى فرقة الرقص الحديث، ثم توقفت، ولأنها لا تستطيع أن تعيش بدون رقص تعرفت على الزومبا وعشقتها وقررت أن تكون مدربة زومبا، وبالفعل تدرب حاليا زومبا وباليه.
وعن رأى الفنان محمد صبحى فى الفيديو قالت ريم: « أول ما شاف الفيديو كلمنى وقالى إنه مش شايف أى حاجة غلط فى الفيديو، وأنها حركات رقص عادية ولبس كويس وأضاف: أنا اعتراضى الوحيد على التراك، لأن دا مش فن يا ريم ومينفعش تسمعيه، فشرحت له وجهة نظرى فى سبب الاختيار فقالى تمام وجهة نظرك، بس أنا مبحبش النوع ده من الأغانى بلاش تسمعيه، وسألنى على حركة اتعملت فى الفيديو والناس كلها علقت عليها، لما حطيت إيدى تحت التى شيرت وكل التعليقات قالت إنى بعمل حركات إغراء دى مش حركات إغراء دى حركة متعارف عليها فى كل أنواع رقص الهيب هوب، وهى رمز لنبض القلب ودليل على المحبة.
أما بالنسبة للأشخاص الذين علقوا وقالوا إنها مصابة بالهستيريا بسب شرب الحشيش أو الترامادول فقالت: «أنا أقصى حاجة شربتها فى حياتى كانت الريد بول».
وبعيدا عن الفيديو سألنا ريم عن سبب ابتعادها عن الشاشة فقالت: «أتلقى من فترة لأخرى عروضا سينمائية ودرامية كنت أراها غير مناسبة، لأن عمرى ما هشارك فى فيلم خارج أو هعمل مشهد خارج وتعرض على من قبل المشاركة فى فيلم أنتجته أكبر شركة إنتاج موجودة حاليا فى السوق ورفضت، لأن أنا حتى عمرى ما دخلت لهم سينما علشان أشوف فيلم أنتجوه، أما المسلسلات فآخر حاجة اتعرضت على دور فى مسلسل «طريقى»، وفعلا روحت وعملت كاستينج بس للأسف تم اختيار فنانة أخرى شافوا أنها مناسبة أكتر منى».
وعن مشاركتها فى برنامج «أعزائى المشاهدين.. مفيش مشكلة» مع محمد صبحى اختتمت: أنا فعلا مشاركة فى البرنامج لأن فى فقرة فيه عبارة عن مسرحية، ومازلنا نجرى بروفات على تلك العروض حاليا.