القارىء مصطفي التلواني يكتب : هلت البشاير من اخر يناير

هلت البشاير من اخر يناير
ف قلب الميدان كل الخلق ثاير
يلا يا ليل فارقنا
راح نقدر نعافر
نبني الف مدنة
للصبح اللي زاير
كل عيون ولادنا
ونعلي هتافنا
ده هتافنا اصله هادر
راح يقطع سكوتنا
وصوت الحق شاطر
لم يسمع شيطانا
هلت البشاير من اخر يناي
ف قلب الميدان كل الخلق ثاير
اصل الميدان اسمه ميدان تحرير
لامم عموم البلد شاهد على التزوير
فيه المباني عِلل ساكتة بقالها كتير
معرفش ساكتة ازاي ! واخدة حقن تخدير
على كل تاجر وطن والاصل اسمه وزير
شغال حرامي خزن عينته منها كتير
كِبر ونتانة وعَفن .. تلامة ملهاش تفسير
تشوفهم ما بين الحرس تتمِلي بتكدير
متملكش غير الٌدعا .. يا رب انت قدير
امتى ميعاد غروب كل حٌكم الدون ؟
واهو جِه تلات الغضب شَقلِب كيان الكون
شفنا العساكر حطب مِتحَرقة بالخوف
لا نافعها عٌصى ودروع ولا حتى بالمولوتوف
قادرة تفرق جموع شعبنا الحَمَال
والضرب ف الممنوع لكن خسيس بطَال
لو أدخَل ف جسمي وجع يخرج قوام مكسوف
هلت البشاير من اخر يناير
ف قلب الميدان كل الخلق ثاير
وقسما بحلمنا المكشوف ع الشمس من فترة
لاتوضى واصلي صلاة الثورة
واسَبَح تسابيح النصر خلاص
دي هانت وبانت بداية الخلاص
وادعيلي يا أمي لجل ما حقي يعود
دي لو باتت نار بكرة تصبح بارود
يقيد ف جتت الكراسي وكل صنم معبود
يخاطب عموم الناس ويقول "فهمت" خلاص
لكن بعد ايه فات الاوان خلاص
مصيرك اصبح هَرَب ومفيش منه مَناص
لف بلاد الغرب ولا حتى حجاز
راح نلم سنينك ونولع فيها بجاز
"خاتمة"
اول دِرس انخلع
والتاني بيلخلخ
مليان بضعف وجَزع
جدرانه بيشَرَخ
قافل ببان السمع
والخلق بيسَرَخ
ارحل يادي الجدع
شكلك عديم الدم
انت كفيف البصر
ولا عديم الفهم
خد كل ليل وارحل
خد كل غم و هم
..
هلت البشاير من اول يناير
ف قلب الميدان وكل الخلق ثاير
كلماتي
مصطفى التلواني
"اصل الميادن اسمه ميادن تحرير"
اقتباس من تميم البرغوثي..من قصيدة..سألوني بتحب مصر قلت مش عارف