عشان لااااازم نكلم بعض!

محتاجين ندردش شوية
ممممممم ممممممم
خف إيدك على رقبته شوية يا حسين.. محتاجين نتكلم..
……
باقولك محتاجين نتكلم.. ما بتردش ليه؟ ما هو شال إيده خلاص!
أنا؟! والله ما أخدت بالى حضرتك.. أصل شايفك بتقولها وبتبص الناحية التانية. واتهيألى إنى سمعتك بتتكلم إنجليزى فقلت يمكن عاوز حد تانى يتكلم معاك!
ممكن أكون باكلم حد تانى واكلمك فى نفس الوقت.. عادى.. ياللا نتكلم
عن إيه يا فندم؟ خير؟!! حضرتك عارف كويس اللى بيتكلم بيحصل له إيه. هو مش حسين برضه ممممم ممممم ممممم
اسمعنى كويس.. لو فيه شارع ما تقدرش تمشى فيه يبقى محتاجين نتكلم
شارع؟ حضرتك بتتكلم جد؟! هو فيه شارع أنا ممكن امشى فيه وانا مطمئن؟ ده مرة واحد كان ماشى جنب البوكس بتاع ال… ممممم مممم مممم
بلاش دى. لو فيه هدوم ما تقدرش تلبسها..
هدوم إيه يافندم اللى نلبسها؟! ده فيه محامى طلع فى التليفزيون يقول إن الاغتصاب واجب وطنى لأى بنت تلبس… ممم مممممم
بلاش كلام فارغ. ركز فى الحاجات المهمة. لو عندك أفكار تساعد البلد، أو تنقذ مريض، أو تخدم طفل يبقى لازم نتكلم.
أفكار إيه بس حضرتك. ده لو حد قال فكرة بيتقال له بتجيب الكلام ده منين؟ وهتموله ازاى؟ ولو قلنا إن الفلوس اللى بتتصرف عمال على بطال فى صفقات ال مممم ممممم أو إن النشاط الاقتصادى لل مممممم مممم
وبعدين إيه حكاية تساعد طفل دى؟ حضرتك سمعت عن البنت اللى دخلت السجن لما عملت مشروع لأطفال الشوارع؟! طب بلاش دى. مش فاكر لما الناس اتكلموا عن التعليم واتقال لهم يعمل إيه التعليم فى.. ممم ممممممم هو حضرتك مش عارف إن النشطاء ممم مممم وأى حد له نشاط سياسى على الأرض بي مممم ممممم ممممممم
أنا مش عاوزك تبقى دايما متشكك وخايف. إنت ليه مفيش جملة بتكملها على بعضها؟
حضرتك مش عارف؟ أنا مش متأكد إذا كان فيه ارتباط. لكن فيه حاجات كل ما اتكلم فيها حضرتك بتغمز حسين بي.. مممممم مممممم
شوف.. ده سبب وجيه للكلام. لو خايف فعلا إنك تعبر عن رأيك يبقى لازم نتكلم.
أهى دى أنا مش فاهمها. شفتها مع كل كلام حضرتك ده فى إعلان فى التليفزيون ومفهمتهاش. يعنى إيه لو خايف تتكلم يبقى لازم تتكلم؟! ما هو أنا خايف. وبعدين هم اللى اتكلموا راحوا فين؟! يعنى مثلا مممممم مممم وخد عندك كمان ممممم ممممممم
اسمع. لو حاسس إنك مضطر تسيب البلد يبقى لازم نتكلم.
أهى دى كمان سمعتها فى الإعلان وشايف إنها مظبوطة. ما ينفعش الناس تسيب البلد كده من غير ما تتكلم. تصور حضرتك أنا نص أصحابى سابوا البلد فى الظروف اللى إحنا فيها دى بشكل مفاجئ ودى مسألة أنا باعتبرها خسة ونذالة. إزاى يسيبوا البلد من غير ما ياخدونى معاهم؟! يرضيك؟!
لو بتواجه اضطهاد بسبب أصولك العرقية، أو جنسك، أو لونك، أو معتقداتك يبقى لازم نتكلم.
ههههه
بتضحك على إيه؟
لأ مفيش حاجة بس.. هههههه أصل.. ممممم مممممم
أنا مش فاهم إنت ليه مش عاوز تشارك! تعال نقعد كلنا ونتكلم. قول رأيك. وسمع الناس كلها صوتك. سمع قادة العالم أفكارك.
قادة العالم؟! أنا؟!
أيوه إنت. تعالى معانا واتكلم بصراحة. خايف من إيه؟
…
ما بتتكلمش ليه؟ باقولك إتكلم.
أصل حسين سرح شوية ومش واخد باله من الغمز. مستنيه يحط إيده زى كل مرة.