تزوير

تزوير
زوروا التاريخ
أقطعوا صفحات كتير
واكتبوهم من جديد
علموا كل الولاد
أن سيدنا ابو لهب
مش شخص واحد
ده ألف شخص
بينط في كل صفحه
بألف وش وألف شكل
أبو لهب دجال كبير
أخطر ألف من مره
م اللي اتكتب
جوه صفحات التاريخ
ابو لهب ابو الف وش
يعرف يغش
عشان كده
بقي أمير
وشغلته تاجر حمير
وكمان وزير
طيار ..غفير..
أو حتي كوتش
باله طويل
وبخبرته
عارف يكون ملك الحمير
لكن بيكره جهلهم
علشان كده ديما يسافر
ويسيبلهم بلد الحمير
ابو لهب راجل خطير
له ألف ساعد
ميت مساعد
دجال وطوشي
يبيع ولاده وارضهم
مهم حمير
والبيع حلال في اللي رضي
في الاصل أنه ينحني
أو يبقي واحد م الحمير
فمتكتبوش عن الحقيقه
لانها أثبات خطير
علي إننا ممكن نغور
من وش سيدنا أبو لهب
بس المهم منزعجوش
منبصلوش في لقمته
ولا نرفع العين الحسوده
لجل ما تدوم نعمته
ومتزعلوش
ولا تغضبوش من شخطته
مانتو رضيتوا من زمان
بوس جزمته
فخلاص بقه
وطوا كمان
والحسوا كل التراب
عشان ما تنضف سكته
ويكون سعيد
راضي وتضحك سحنته
أصله خلاص قرر
يورث عزبته
بحميرها وبكل اللي فيها
لكن هياخد فرشته
علشان ناوي ينام
نومه الاخير
ناوي يسلم عهدته
أشرف نبوي