أول قصيدة كتبتها كانت عشانك آخر قصيدة كتبتها كانت عشانك وعرفت صورتى لما طلت من عيونك وعشقت شعرى لما عدى فوق لسانك يا أحلى شمس بتبدر الضى ف عيونى من صغرى كانوا الناس عليك بيحسدونى وبقيت ملاكك بالخطايا كتفونى وبقيت شيطانك قالوا يخرب بيت شيطانك وأنا مش هاممنى ينصفونى.. يظلمونى ويلبسونى ميت عباية مش بتاعتى نفس إللى قالوا إن أنا مظلوم معاكى بيقولوا عنك طيبة وفيّا اتخدعتى وأنا زيى زى بقيت صحابى الطيبين حالفين ما ندخل فى الحياة غير من بيبانك وملخصين العمر كله فى غنوتين وإنت إللى حفظانا وعجنانا ف غيطانك أول قصيدة كتبتها صرخة وليدك آخر قصيدة كتبتها صرخة شهيدك وعشقت طرحك يا للى سترانى بجريدك ومغسلانى اليوم بإيدك من وريدك ومدوقانى من عناقيدك حنانك