يخلق من الشبه أربعين!!

مش قادرة أصدق اللى قريته. يعنى آخر معلوماتى عنها أنى أقدر أغير لون وشكل اللبس أو شعرى لكن اختار شكل ابنى أو ابنتى؟! لا فى الخيال ولا على البال.
«عليه العوض ومنه العوض» أتارى ده اللى حصل فى الدنمارك، عملوا منتدى بيضم 600 ألف عضو من 190 دولة بس مش أى كلام منتقيين على الفرازة، «درجة أولى يعنى» ولكن لابد وحط تحتها عشر خطوط إن اللى بياخد العضوية لابد أن يتمتع بدرجة عالية من الجمال، وعلى فكرة فى لجنة مخصصة بتقيم الصور المرسلة، وتحدد متى سيتأهل لأخذ العضوية، وأنا اللى كنت فاكرة إن التأهيل بيكون من الجامعة على الشغل أو أتأهل للدورى أو حتى الكأس، أو أتأهل يعنى أتجوز من أساسه!!
لكن أتأهل فى «منتدى الخصوبة» أهو ده اللى مش ممكن أبدا.. الله يرحمك يا سيتى معرفتيش خلفتى ولد ولا بنت غير فى السبوع، لأ وقال إيه بيسموا ده علم وتكنولوجيا دى مش تكنولوجيا دى «تكنولوجيا» آه ده طبيخ وكمان حمضان ورحته طلعت «إيه العك ده»؟! يعنى إيه أقعد أقول عايزاه عينه واسعة ويكون طويل وبعضلات وشعره أصفر وكيرلى وكأنى ها اشترى كام متر قماش من الأزهر وافصله فستان بكم وقصير وبترتر!! دى حاجة تغيظ بس بيقولوا إن ده أفضل لوجود خلقه أفضل، وسعت أوى المرة دى، شوفتوا الهنا اللى بقينا فيه والراحة اللى بيريحوها لعرسان بره «يا حلاوة يا ولاد».
بقى كل اللى عليهم يختاروا شكل الولد والبنت من غير بقى ما تتعب نفسك وتضيع مجهودك على الفاضى، عشان خاطر تجيب عيال شبه القرود، توفر صحتك وهما هيخصبوا بويضة لست زى القمر مع حيوان منوى لراجل زى ما قال الكتاب ويجيبولك طفل كوكتيل جمال شبه اللى اسمها إيه بعد عملية التجميل، ولأجل الأمانة فى العمل والذمة والضمير، فكل من يزيد وزنه من أعضاء المنتدى أو يقل جماله بيطلعوله الكارت الأحمر، ويقوله المدير هارد لك يا حبيب والديك شوفلك منتدى تانى، لأن هذا المنتدى يحقق عمل خيرى بوجود وجوه جميلة دائما، بدل الوجوه «العكرة» اللى موجودة.. شوف إزاى.
وأنا اللى ظنيت فيه، طلع الراجل نيته حلوة.. أنا بس كل اللى محيرنى، إن أكثر من واحد يختار نفس الشكل لنفس الراجل والست اللى حيخصبوهم، ساعتها العيال لما يكبروا ويشوفوا بعض كده الدنماركيين هيقولوا لأولادهم إيه؟! عادى يا حبيبى على رأى المصريين «يخلق من الشبه أربخين».