نزل جوزى عشان يجرى على أكل عيشه، لكنه سابنى لأفكار كثيرة تجبنى وتودينى، الحمد لله رمضان عدّى على خير وقدرت أوفر مصاريف الشهر الكريم والأكل والعزايم والياميش، لكن هاعمل إيه العيد داخل وبعده دخول المدارس هاجيب منين فلوس لكل ده، ده غير مصاريف الكحك والعيدية ما أنا لازم أبين قيمتى وأنا داخلة على حماتى، وكمان لازم أدى عيدية لأولاد أخواتى وأولاد أخوات جوزى لأنه الأخ الكبير.. طيب وبعدين، وهاعمل إيه كمان فى فلوس لبس العيد بتاع العيال ما هو يا إمّا يبقى حاجة عليها القيمة عشان منظرى قدام أهل جوزى.. يا إمّا يبقى أبوبلاش كتر منه وعليا وعلى أبونسمة إللى تحت الكوبرى أروح أبضع من عنده واظبط العيال.. كده بقى الميزانية خرمت. لأن لو وفرت كل ده هاتصرف إزاى فى مصاريف المدرسة بتاعة العيال.. الحل فى الجمعية لازم أدخل جمعية مع جيرانى أو أصحابى فى الشغل، وآدى دقنى لو كفت ربنا يستر!! بس بجد حرام نخلص من المصيف يطلع رمضان وبعده العيد وفى الآخر المدارس لدرجة إنى بأفكر أشيل بؤجة على ضهرى وأدور على البيوت، زى البنات بتوع الصين، وتشترى فانوس ياحاج تشترى قميص نوم ياولية.؟