رسائل زوجة رايقة

أكيد العزوبية مش هتفضل ملازمانى زى التوأم الملتصق وأكيد هحب وهتخطب وهتجوز وهتخانق مع زوجى اللى أنا لسه مش عرفاه، وبما أن لغة التواصل بين الناس فى هذا العصر هى لغة خرساء لا تنطق وتعتمد على SMS وTexting، فأنا قررت أكتب رسائل لزوجى بدلا من النقاش والخناق والضغط العالى والشلل والجلطة، وخليه بقى يتخانق مع نفسه ويتشل لوحده، وأهو برضه الأسرة يبقى فيها فقيد واحد بدل ما يبقوا اتنين.
1- زوجى العزيز .. مساء الفل
مرحباً بك أينما حللت ونزلت بس المهم إنك لا تتدخل فيما لا يعنيك بمعنى خروجى سفرى شغلى صحابى الشوبنج وهكذا كلها أمور حيوية إذا وددت المشاركة فى سلام فأهلا بك وإن لم تود فاجعل السلام (برضه) هو السمة الغالبة على كل تصرفاتك وكلامك، وطالما أن هدومك فى دولابك وأكلك فى تلاجتك إذا لا ضرر ولا ضرار وإلا فكنبة الليڤنج على استعداد لاستقبالك فى أى لحظة، وأخيراً أتمنى لك قعدة بيت هنيئة لأنى ماليش تقل عليها وذلك تقديرا لمن ضحوا بحريتهم الشخصية فداء للبلاد ولأمن شعبها والله الموفق والمستعان والسلام عليكم ورحمة والله وبركاته.
2- زوجى العزيز، ازيك، النهارده عيد ميلادى.. ادينى بفكرك أهوه. لن أقبل إطلاقا جو أصل أنا راجل مش بفتكر المناسبات أو ما بعرفش أجيب هدايا . أنا النهارده ملكة من حقى كل الاهتمام والدلع والكلام الحلو، دا غير طبعا الهدية اللى تليق بيا.. أيوه أنا مادية وعاوزة هدية.
3- زوجى العزيز.. من فترة كدا وأنا حاسة إنك مش طايقنى ولما بكلمك بترد على وأنت بتقول فى سرك «يا رب يكون عندها دم وتحل عنى».. وأكيد أكيد أنا حاسة إنك بتعامل صحابك أحسن منى.. ولأنى قرأت دراسة أعدها المركز القومى للبحوث الاجتماعية والجنائية تأكد أن ملل الزوج أهم أسباب الطلاق، لذلك قررت أطلع مع صحابى على شرم فى الويك أند وأقضى يومين بحر وشمس وتان وغطس وكافيهات.. يمكن يا حبيبى لما أبعد عنك يومين أوحشك.
4- زوجى العزيز.. مش عارفة ليه مامتك حاشرة نفسها فى كل تفاصيل حياتى.. شكلى، لبسى، ديكورات البيت، نَفَسى فى الأكل، أسماء ولادى، دى حتى بتقول عليا أن ذوقى وحش خالص.. هى مش واخدة بالها انى اخترت ابنها واتجوزته!!
5- زوجى العزيز.. مش ملاحظ إنك فوضوى شويتين وهدومك مرمية فى كل حتة، وطلباتك كتير.. حبيبى خدعوك فقالوا إنك هتتجوز فلبينية!
6- زوجى العزيز.. النهارده عرفت من صاحبتى شوشو أن جوزها اللى هو صاحبك بيكدب عليها ويقولها أنه بيتأخر فى الشغل كل يوم وأنت عارف أنها مجنونة وبتغِير عليه موت.. وبرضه عرفت بالصدفة من صاحبتى ميمى اللى هى مراة صاحبك التانى اللى إنتوا بتسهروا عنده كل يوم فى الخباثة وإن هو دا السر الكبير اللى كنتم بتخبوه عننا.. وبناءً على ذلك يا حبيبى أنا قولت لشوشو إن جوزها بيكدب عليها وشوشو حلفت إنها مش هتخلى جوزها يسهر بره البيت تانى وراحت اتخانقت مع ميمى عشان كانت مشاركة فى الجريمة وميمى حلفت إنها مش هتخلى حد يسهر فى البيت عندها تانى.. وكدا يا حبيبى إنت هترجع تسهر معايا تانى عشان مش هتلاقى حد يعبرك.
7 - زوجى العزيز.. فاكر لما اتخانقنا مع بعض أيام الخطوبة من 15 سنة وقولت عليا إنى نكدية أنا زعلت خالص لما افتكرت.. أنت لازم تصالحنى أول ما ترجع البيت.
8- زوجى العزيز.. أنا زهقت من شكلك.. إوعى تفهمنى غلط.. أنا قصدى إنك لازم تعمل نيو لوك.. يعنى إيه رأيك مثلا فى قصة شعر ديفيد بكهام على لون شعر جورج كلونى.. أو ممكن قصة شعر براد بت على لون شعر سامى العدل على بدلة تامر حسنى فى «يا بنت الآيه».. الله يا بيبى هيبقى شكلك سو كيوت.
9- زوجى العزيز.. أنا نزلت عملت شوبنج يا بيبى ومش هتصدق أنا جبت حاجات تجنن ورخيصة موت يعنى كلها ب 10 آلاف جنيه بس، ولما جيت أدفع بالكريديت كارد مسيو ريكو صاحب الأتيليه مارديش خالص وحلف إنه يبعتلك الفواتير على الشغل.. أعمل إيه يا بيبى ما هو أحرجنى خالص فقولت له أوكيه.
10 - زوجى العزيز.. نظرا للخسارة الفادحة اللى لحقت بيك امبارح بسبب مسيو ريكو أنا قررت إن إحنا لمدة شهر مش هناكل غير أكل بيتى بس آه والله صدقنى.. يلا تعالى بدرى عشان نلحق نعمل أوردر من أم حسن.
11 - زوجى العزيز.. الويك إند قرب وعشان أنا عارفة إنك كسول وبتحب تنام يوم الجمعة وتقضيه فى البيت وتتحجج إنك هلكان طول الأسبوع.. فقررت أنى أكسر الروتين عشان تفوق شوية من الكسل وقلت لمامتك أننا هنفطر معاها الساعة 9 الصبح فى بيتها فى مصر الجديدة وبعدين شوشو وجوزها هيستنونا فى النادى فى المعادى وبعدين هنروح نتغدى أنا وأنت بس فى مركب على النيل تجنن فى العجوزة وبعد كدا هنروح لميمى والشلة فى كافيه فى الزمالك وبعد كدا نرجع أكتوبر عشان حجزت تذكرتين سينما ميد نايت.
12 - زوجى العزيز.. أحب ألفت انتباهك لحاجة إنى لما بكون بلبس وبعمل ميك أب وبجهز نفسى فى كل مرة تفضل تزن وتقولى كدا هنتأخر.. فى كل مرة من يوم ما اتجوزنا!!. مش قادرة أصدق دا أى إنسان طبيعى كان زمانه يأس من الزن وتقبل الأمر الواقع.. هو أنت ليه مش إنسان طبيعى يا حبيبى.
13- زوجى العزيز.. أرجوك لا تسألنى عن مصروف البيت لأن زى ما الأكل مهم أكيد برضه راحتك النفسية فى البيت مهمة يعنى مثلا فيها إيه لما اعمل شوية تغييرات محدودة فى البيت كل شهر زى مثلا أنى اشترى بعض التحف والأباجورات ولما أفكر أنى أخلى جو البيت رومانسى اشترى كل الورد اللى فى المنطقة.. أفرشلك بها الأرض وأملى البيت شموع من اللى بالألوان وشموع من اللى بالروائح وشموع من اللى بتنور وشموع من اللى مربعة وشموع من المدورة وشموع....، حبيبى أنا ههريك رومانسية.
14- زوجى العزيز.. حبيبى أنت مش محتاج كل مرة تفضل تجادلنى وتناقشنى عشان فى الآخر تقولى «أنتى صح بس سيبينى أنام عشان عندى شغل بكرة».. أنت المفروض تعترف أنى صح من الأول عشان نقدر نناقش أكتر من موضوع وتعرف أن رأيى صح فيهم كلهم.
15- زوجى العزيز.. بما إنك إنسان مؤمن وعارف إن كل شىء قضاء و قدر أحب أزف إليك الخبر... من الآخر كدا أنا عربيتى كويسة بس زى ما قال سلطان السكرى «كل حاجة فيها كويسة بس لوحدها».. أصل أنا عملت حادثة ومخضوضة والصدمة كبيرة على جدا، خصوصاً بعد ما سحبت الرجل اللى خبطنى من قفاه وعملت له محضر وفضل يبوس رجلى عشان أتنازل عنه لأنه مفلس وكان سايق عربية الشغل والظباط والعساكر فى القسم فضلوا يتحيلوا على وبعد 6 ساعات من المحايلة أتنازلت بس بعد ما أخدت صورة بطاقته وعنوان بيته وشغله واعتراف صوتى أن هو اللى خبطلى العربية احتياطى عشان لو حبيت أغير رأيى بعد أعصابى ما تهدى... لأن الرجل كان مفترى جداً استغل أنى ست ومخضوضة ولوحدى.. عارف يا بيبى احنا فعلا عايشين فى مجتمع ذكورى وبالمناسبة دى أنت لازم تصلحلى العربية على حسابك عشان تخفف عنى الصدمة.
16- زوجى العزيز.. مصروف البيت خلص.. أظن أن الرسالة وصلت.
17 - زوجى العزيز.. مش معنى إنى بحب المفاجآت أنك تجبلى صحابك فجأة على البيت وتقول لى إحنا عندنا سهرة بلاى ستاشن النهارده يلا اعملى العشا.. أنت فاهم المفاجآت غلط.
ياحبيبي
18 - زوجى العزيز.. مش معنى إنى بحب الشيف الشربينى وبتفرج عليه طول اليوم إنك تغير منه وتغير القناة، دا رجل اقتحم مجال الطبيخ بكل قوة وجسارة وأثبت وجوده فى حياة كل ست مصرية.. إيه رأيك لو اقتحمت أنت مطبخى النهارده وأثبت لى إنك «شربينى» فى حياتى.
19 - زوجى العزيز.. آه لو تعلم مدى عشقى لكرشك المبعجر، لأن مافيش واحدة بنت ناس غيرى ممكن تقبل بالحقيقة المرة دى، يعنى مافيش واحده هتعبرك فأصلا ماتحاولش تبص لغيرى.
20 - زوجى العزيز.. ياريت تشوفلك شغلانة غير التريقة على صحابى، إيه يعنى لما شوشو تربى 20 كلب فى بيتها مش أحسن ما يضلوا الطريق ويبقوا كلاب ضالة.. وإيه يعنى لما ميكى تعمل الكيك بالملح بدل السكر ما هما أصلا الاتنين شبه بعض.. لما شيرى تروح فرح زيكو أخوك وهى لابسة حجاب مايا دياب... أنت أوڤر على فكرة. •