حق الوزير بطرس غالي وفرقة مصلحة الضرائب عندما تقتحم الاندية وتفتش في دفاترها مادام »السفه« الكروي وصل إلي دفع بالملايين في لعيبة كسر ودفع بالدولارات في حكام كورة.. أظن ان جماعة المالية ينظرون للموضوع ده بمنطق: ماداموا بيدفعوا كده يبقي احنا أولي وأحق. المصلحة كانت في الاسماعيلي بالأمس وستصل الي المصري البورسعيدي غدا. وإلي الاسكندرية حيث الاتحاد والاوليمبي وغيرهما.. وستكون الحسبة الكبيرة عندما يراجعون أوراق الاهلي والزمالك ولا الجزيرة والصيد.. نعم الصيد الكبير اللي الآلاف والملايين ملهاش حساب عندهم. ومادام موضوع الحكام هكذا. ومادام التحكيم أصبح صعبا ويتطلب خبراء أجانب وتكنولوجيا ومعلومات. يبقي لازم نعمل كلية للحكام! أومعهدا عاليا عاما أوخاصا. تصدقوا ان الخريجين وخاصة الاوائل منهم حيكلوا عيش أحسن من خريجي كليات الطب والهندسة ويدخل معهد الحكام مكتب التنسيق وتبقي الطوابير عليه بالهبل.. امال ايه.. ماهو مولد وصاحبه غايب. كورة وفتة وسبوبة أحلي من المهلبية.. الخريج من دول لما يروح يتجوز يقول لا بو العروسة وبكل فخر: أنا حكم ك،ورة... معي بكالوريوس أوليسانس كورة.. ونفتح سوقا جديدا وفريدا ونعمل لهم درجات ومربوط وظيفي. ومفيش مانع ابدأ أن يدخل القطاع الخاص ويصنع لنا حكام كورة شيك... كل ده مفيش مانع امامه مادام اللي تكسب به العب به. الناس اللي وصل بهم الحد الي التفكير بهذه الطريقة يبقوا مايزعلوش لما يصل عندهم مأمور الضرايب.. يدق عليهم الباب ويقول لهم: أنتم بتصرفوا في الحكام واللعيبة يبقي لازم تدفعوا ساعتها سنسمع البكاء والعويل واللطم علي الخدود.. ولا الدفع للاجانب حلو والدفع للبلد وحشا.