* إلى وزير الداخلية المحترم منصور عيسوى: ماينفعش إن الدراع اليمين للعادلى وهو اللواء حمدى عبد الكريم يظل كما هو فى الوزارة باختصاصاته وسلطاته وبابا غنوجه..! وماينفعش أن اللواء أبو القمصان المسئول عن الانتخابات واللى حدثت فى عهده أكبر عملية تزوير للانتخابات أن يظل كما هو مسئولاً عن الانتخابات!.. بصراحة مش ناقص غير أن العادلى وباقى الشِلة يرجعوا مرة تانية للوزارة..!! * كما توقعت الأسبوع الماضى.. قررت الحكومة الاقتراض من صندوق النقد الدولى..! وهو تصرف منطقى جداً لتلبية المطالب الفئوية التى لا حصر لها وسد عجز الموازنة..! ربنا يخلى لنا المعتصمين والمعتصمات والمضربين والمضربات.. الأحياء منهم والأموات.. اللى خلونا نمد ايدنا للى يسوى واللى مايسواش..!! * أنا زعلان قوى من الراجل بتاع أبوالنمرس اللى دبح مراته علشان بتناغشه وبتتدلع عليه..!! قال إيه بسلامته قتلها لأنها قالت له أدعك لك ركبتك اللى واجعاك بالروج بدلاً من المرهم.. فقتلها على الفور..!! بصراحة الراجل ده يستاهل يعدموه مرتين.. مرة لأنه قتل مراته.. ومرة تانية لأنه ماكانش فاهم هى عايزة منه إيه..؟! روح يا شيخ.. منك لله. * كلمات من زمن فات: أستأذن قارئى العزيز فى استحضار ذاكرة ما كتبته عن الفساد والفاسدين والتى تؤكد أننى كنت واقفاً فى ميدان التحرير على مدى 18 عاماً مضت، لم يسلم فيها وزير ولا غفير من سن قلمى: * الناس ماشية فى الشارع بتكلم نفسها، وبتقول إن العلاوة اللى اداها الرئيس مبارك للموظفين والغلابة باليمين أخذتها الحكومة بالشمال.. حتى قبل أن تدخل جيوبهم! الناس ماشية كاشفة راسها وبتدعى «على.. .. ..» قصدى على «الحكومة» إن ربنا يمد فى عمرها وتزود الأسعار كمان وكمان..! الناس بتقول كلام كتير.. كتير على الحكومة.. مش هاقدر أكتب ولا كلمة منه.. لأن الكتابة أدب وأنا راجل مؤدب..!! * الغريبة.. أن المرة الوحيدة اللى اجتمعت فيها الحكومة مع مجلس الشعب علشان يتفقوا.. اتفقوا على الشعب!.. «نشرت فى 11 مايو عام 2008»