تناتيش

* تأكيد جمال مبارك فى التحقيقات أنه يتحدى أى وزير فى الدولة يقول إنه قد طلب منه شيئاً.. فكّرنى بالنكتة القديمة قوى بتاعة جمال، علشان خاطرى مشّيها جمال، لما راح معرض سيارات فسأل صاحب المعرض عن سعر أحدث عربية مرسيدس فى المعرض..
فنظر إليه صاحب المعرض (المنافق) وقال: يافندم ماتغلاش عليك.. خدها ببلاش!..
فتجهم وجه جمال، برضه مشّوها جمال المرة دى، وقال بحزم: إيه ده إنت عايز تدينى رشوة عربية مرسيدس..؟!!
فرد صاحب المعرض المنافق وهو يرتعد: أبداً يا أفندم.. بس دى سعرها غالى عليك قوى.. وأنا بصراحة ماأقدرش أجاملك مش علشان إنت ابن رئيس الجمهورية تجور على رزقى ورزق عيالى.. مش معقول أديك عربية وأخسر فيها.. عموماً لو عاوز تشتريها فسعرها، زى سعر السوق كله، مية جنيه عداً ونقداً.. وأرجوك ماتفاصلش معايا.. دا رزقى ورزق عيالى..!!
فقال له جمال، وبرضه مشّوها جمال: طيب وال بى. إم. دبليو اللى جنبها دى بكام..؟!
فرد صاحب المعرض: برضه من الآخر يافندم ومفيش فصال دى سعرها 50 جنيهاً ومش هاأقدر أنزّل فيها ولا مليم.. علشان رزقى ورزق عيالى..!
فقال له جمال: أنا طبعاً مايخلصنيش أجور عليك وعلى رزق عيالك.. خلاص ادينى 10 عربيات مرسيدس وعشرين عربية بى إم دبليو.. وخد الألفين جنيه دول.. وعوضى على الله..!!
* بالمناسبة.. عيب قوى قوى إن مساجين سجن طره يغنوا لجمال وعلاء أغنية «ماما زمانها جاية».. عيب مش دى أخلاق القرية أبداً.. قرية طره طبعاً..!!
* الأزمة الراهنة فى البلد الآن سببها حاجة واحدة بس هى إن الكل عايز يستبدل سيادة القانون.. بقانون سيادته..!!
ربنا يستر على البلد..!
* «الثائر الحق».. مقولة شيخنا الإمام محمد متولى الشعراوى رحمه الله؛ هى عِلم نافع يؤكد أن الشعراوى مازال يعيش بيننا ولم ينقطع عمله رغم رحيله.. رحمه الله.
* أجمل ما سمعته من د. عبدالعزيز حجازى رئيس الوزراء الأسبق أن شباب التحرير أثبتوا أنهم أذكى من الحكومة الذكية بتاعة الدكتور نظيف..!
* بعدما عملوا قانوناً فى فرنسا يقضى بمنح 49 يورو يومياً لمن يلازم مريضاً على وشك الموت.. أعتقد أن الشعوب العربية من المحيط للخليج ممكن تبقى كلها من الأثرياء.. فهى تلازم منذ سنوات طويلة مريضاً رِجله والقبر.. اسمه: التضامن العربى..!!
* كلمة ورد غطاها:
* شفت مجدى أحمد حسين أمين عام حزب العمل «المجمد» عمل إيه..؟! زار إيران معلناً ترشحه لرئاسة الجمهورية، فى مصر مش فى إيران طبعاً، معتبراً أن الثورة الإسلامية الإيرانية واعدة لوحدة المسلمين..!
** جرى إيه يا حاج مجدى دا أنت اسمك فى الانتخابات لسه مكتوب بالرصاص.. أمال هاتعمل إيه لما تدخل فى الجد شوية.. واضح إنك جيت تكحلها عميتها.. فأول القصيدة لامؤاخذة.. إيران..!!