تعليقا على الأسعار النهائية لشقق الإسكان المتوسط : «الحكومة بتسرق محدودي الدخل »

بعدما أعلنت وزارة الإسكان في مصر ، عن الأسعار النهائية لمشروع الإسكان المتوسط ، تداول عدد من نشطاء مواقع التواصل الاجتماعي كوميك ساخر من تلك الأسعار خاصة وأنها لمحدودي الدخل .
ونال الكوميك الكثير من التعليقات والتى دارت معظمها حول السخرية من ارتفاع الأسعار ، وبين حال محدودي الدخل والذي لا يملك إلا قوت يومه فكيف أن يبدأ سعر المتر بهذا الرقم المبالغ فيه على حد وصفهم ، وبين من فسر كيفية سداد المبلغ ، وأنه لم يتم دفعة مرة واحدة وذلك سيكون أوفر على المواطن ، وبين من أعجب بالأسعار وأثنى على الحكومة وطالبها بمشروعات أخرى لمحدودي الدخل .
أحمد يقول " الكلام دا للناس اللي معاها ملايين لكن الناس اللي زي محدودين الدخل يا ينتحرو ، يايهاجرو من البلد دي " ، ومصري يفسر اقتراح هذا المشروع بأن " الحكومة دي بتضحك علينا مع العلم أن تكلفة بناء الشقة مساحة 100 متر بالمنور والسلم لا تتعدى 60 ألف جنيه وده بدون سعر الأرض اللي هي فى الأصل ملك الحكومة وتوفرة وكلها صحراء و60 ألف ده لو المواطن العادي هو اللي هيبني .. ما بالك أن الحكومة بتاخد دعم فى كل حاجة مثل الأسمنت والحديد وكل حاجة وفى كما منقصات .. وبعدين تقولي 270 ألف لمحدود الدخل دى كمان غير الفوائد اللي البنك هيخدها يعني الحكومة بتسرق محدودى الدخل " .
محمد يسخر بالقول " ياجماعة كل 43 واحد يعملو جمعية وياخدو شقة " وأميرة تقول لو كان 300 ألف جنيه لمحدودى الدخل يبقى أحنا معدومي الدخل " ، أما عادل فيشرح كيفية سداد هذا المبلغ ويقول " طرق السداد متعددة والمواطن هو اللي بيحدد النظام اللي يناسبه منها نظام تقسيط الأربع سنين، ونظام تقسيط الخمس سنين والنظام الأكثر مناسبه لمعظم المواطنين نظام التمويل العقاري ودا بيتيح للمواطن التقسيط لفتره بتصل ل20 سنة ودا على حسب اختيارك ، وفيه دعم من خمسه آلاف جنيه ل عشرين ألف جنيه على حسب مرتب المتقدم " .
وإبراهيم يتساءل " طيب ممكن نعرف أيه الأسس اللي عرفت الحكومة أن متوسط الدخل يقدر يدفع الأرقام دي " ، وهند تقول " الغلبان بره الحسابات " .
وعلي يقترح أن الحكومة " تجيب 200 ألف وإحنا متنازلين عن الشقه والوظيفه والجنسية كمان " .
وكانت وزارة الإسكان في مصر ، أعلنت عن الأسعار النهائية لمشروع الإسكان المتوسط ، حيث بلغ سعر المتر فى القاهرة الجديدة ، والذي يتراوح بين 3900 إلى 4250 جنيها، وفقا للموقعين الذين سيتم طرحهما، تليها مدينة دمياط الجديدة بسعر 3700 جنيه، ثم مدينة 6 أكتوبر بسعر 3400 جنيه، فمدينة الشروق بسعر 3100 جنيه، ومدينة العبور بسعر 2900 جنيه، تليها مدينة العاشر من رمضان بسعر 2700 جنيه، وأخيرا مدينتي بدر والسادات بسعر 2550 جنيها.