"هتوحشيني أوي يا حتة من أبويا".. بكلمات مؤثرة رانيا فريد شوقي تنعى شقيقتها

نعت الفنانة رانيا فريد شوقي شقيقتها المنتجة ناهد فريد شوقي، التي رحلت عن عالمنا يوم الثلاثاء الماضي.
وكتبت رانيا على حسابها بموقع "إنستجرام": "للأسف بنعتاد الأحباب في حياتنا كأنهم خالدين في الدنيا زي ما نعتاد النعم كأنها مستمرة إلى الأبد وده من عيوب البشر، أختي الحبيبة الغالية ناهد أنا بعتذر لك لأني اعتدك في حياتي يمكن خيالي كان أضعف من إني أتصور فراقك يمكن خدتنا مشاحنات الدنيا وربنا نور بصيرتنا ورجعنا لحضن بعض والحب اللي اتربينا عليه، وحبنا لبابا كان دايمًا بيجمعنا يمكن لأني نسيت أننا بنكبر كلنا يمكن لأني جيت الدنيا لقيتك أختي الكبيرة القوية العنيدة اللي ماتعرفش حاجة اسمها استسلام وإرادتها من حديد قوتك كانت بطمني عليكي".
وتابعت: "أنا مش عارفة أنا بكتب إيه بس اللي حساه أكبر بكتير من أي كلام مازلت مش مستوعبة ولما حد بيقول الله يرحمها بتخض في الفترة الأخيرة كنت بشوف فيكي بابا بكل حركاته وطريقة كلامه ونظراته وهزارك وقولت للأحفاد اللي ماشافوش جدهم ناهد بقت نسخة من جدكم لما تشوفوها كأنكم شفتوه سبحان الله".
واستكملت : "والغريب إني من الشخصيات اللي بتخاف تدخل على حد متوفي لأنه بيبقى آخر انطباع بيفضل في الذاكرة عن الشخص لكن لما دخلت وشوفت وشك مبتسمة كأنك نايمة وبتحلمي حلم جميل حسيت إنك شوفتي فريد ابنك بيستقبلك وخدك لحبايبك بابا وطنط هدى ومها أختنا ده تفسيري لابتسامتك الهادية الجميلة الواضحة أوي اللي هونت علينا كلنا فراقك واللي مش هتفارقني اللي باقي من عمري كنتي راضية بكل أقدار الله ومسلمة أمرك لله، إلى أن نلتقي يا أختي سلميلي على بابا، وقوليله الحياة من غيرك مش حياة ونفسي يجيلي في الحلم بقاله فترة غايب عني هتوحشيني أوي يا حتة من أبويا ومن قلبي".
وسيقام مساء اليوم الخميس، عزاء المنتجة ناهد فريد شوقي ابنة الفنان الراحل فريد شوقي، ووالدة الفنانة ناهد السباعي، بمسجد الشرطة بالشيخ زايد في قاعة الوهاب عقب صلاة المغرب.
View this post on Instagram
A post shared by Rania Farid Shawky (@rania_farid_shawky)