ماجد المصري: شخصيتي في مسلسل "ضرب نار" مميزة والتفاصيل بها كثيرة

كشف الفنان ماجد المصري، تفاصيل قبوله لشخصية زيدان سيف الدين، في مسلسل ضرب نار، قائلًا: "جالي تليفون مع صديقي المنتج محمود كمال من شركة سينرجي، وقالي دور مهم جدًا عايزك تلعبه، قولتله أقرأ الأول، وبعتلي المعالجة والحلقات لقيت اسم نصر عبدالرحمن على الورق وهو اسم كبير وعارف أن في ياسمين عبد العزيز وأحمد العوضي وأحمد بدير وانتصار ومجموعة كبيرة أوي من الممثلين".
وقال "المصري" في حواره لبرنامج "مساء دي إم سي" على فضائية "دي إم سي" اليوم الأربعاء: "حسيت أن زيدان شخصية محيرة شوية كلمت نصر عبدالرحمن قالي زيدان شخصية مميزة في المسلسل ومش عارف يجمع بين الخير والشر هتحبه ومش هتعرف تكرهه، وشخصية زيدان في المسلسل التفاصيل فيها كتير ومتأكد إنك هتستمتع جدًا جدًا لو لعبت الشخصية صح".
وتابع: "قريت الورق، وتحمست له جدًا وقولتلهم أنا جاهز للتصوير".
وعن أدائه لأعمال بها بطولة جماعية، رد قائلًا: "في ناس بتشتري البطولة الجماعية وناس لا ممكن تبقى مفيدة وممكن لا المهم الممثل يبقى موافق على دا من جواه، لأنه لو مش موافق هيبان عليه ومش هيعرف يشتغل وهيبقى واخد باله إن المسلسل مش له لوحده بس هل هيقبلها ولا لا هيبقى مش مركز اوي في التفاصيل اللي بيتعملها".