فيديو| ميمي جمال: حسن مصطفى رفض مشاركتي في "مدرسة المشاغبين" بسبب عادل إمام

تحدثت الفنانة ميمي جمال عن رفض زوجها الفنان الراحل حسن مصطفى مشاركتها في مسرحية "مدرسة المشاغبين"، بسبب الفنان عادل إمام والفنان سعيد صالح، على حد قولها.
وقالت ميمي جمال خلال لقائها في برنامج "مساء dmc"، الذي تقدمه الإعلامية إيمان الحصري: "اشتغلت مع عادل إمام كتير لكن مشتغلتش معاه مسرح إلا كان في فترة كانوا بيعملوا (مدرسة المشاغبين) وكانت سهير البابلي في دور المدرسة وجات فترة عينيها تعبت ولازم تعمل عملية في باريس ف"سمير خفاجة" الله يرحمه المؤلف قال إحنا كده هنقف 15 يوم أو نجيب حد مكانها، وقال لحسن مصطفى جوزي نجيب ميمي فحسن قاله لأ، أنت عارف الصيع اللي موجودين سعيد وعادل ويونس بيقولوا إفيهات لو هي ضيعت إفيه لحد فيهم هيبصولي ويقولوا مراتك".
وأضافت: "هو عارف إني ممكن أقول بس ممكن أضيع إفيه لحد فقالي هتبقى مشكلة ومش عاوز يحطني في الموقف دا لكن سمير صمم وقال ميمي شاطرة وهتعمله".
وأوضحت ميمي جمال معنى كلمة "ضيعت الإفيه" وقالت: "الممثلة اللي بتشتغل مع كوميديان لازم تفرشله الإفيه تحس أنه هيبدأ يقول تريح ومتتكلمش والإفيه ينزل في الصالة ويتسمع لو اتكلمت في النص هبوظه فيه طريقة وحسن كان خايف لسعيد يتجنن عليا، لكن الحمد لله اشتغلت 15 يوم بعد ما سمير خفاجة أثر عليه، وقاله ميمي شاطرة هتعمله".
وأكملت "المسرحيات اللي بيبقى فيها كوميديانات كتير بيفكروا يعرضوها من البداية علشان الخوف من إن الإفيهات تزيد منهم، والرواية تتنسي".
وأردفت: "كلهم صحابنا، حسن وسعيد وعادل وأحمد زكي ويونس شلبي وهما مش بالنسبالي غرب، وعلى المسرح جنان، ويا ويلك لو تضيعي إفيه لحد بيقوله، وكل واحد ليه طريقته على المسرح".
وأكملت: "أحمد زكي كان لسه في بداياته، وكان ملتزم أوي، وما كنش بيقول إفيهات، وكان طالع شخصية غلبانة، والحمد لله عدت".
مسرحية "مدرسة المشاغبين" حققت نجاحًا كبيرا وقت عرضها عام 1971، وهي من بطولة عادل إمام، سعيد صالح، يونس شلبي، أحمد زكي، سهير البابلي، هادي الجيار، عبدالله فرغلي، حسن مصطفى، نظيم شعراوي، تأليف علي سالم، إخراج جلال الشرقاوي.
أقرأ أيضا:
هالة صدقي تداعب دولفين في حمام السباحة وسوسن بدر تعلق (فيديو)
"تقلد شريهان والساحرة".. الجمهور ينتقد إطلالة غادة عبدالرازق في صورها